Fudzani Manyerezero Onsene Anacimwanisa Anthu Kudziwa Mulungu!

1. Ndi cenjezo ipi idapereka mpostolo Paulu kuna Akristu akudzodzwa?

“LEKANI,” ineyi ndi cenjezo idapereka mpostolo Paulu kuna Akristu a mu ndzidzi wa apostolo. Kulekanji? ‘Kuleka kupitiriza kutowezera anthu a dziko.’ (Aroma 12:2) Thangwi yanji iye apereka cenjezo ineyi yamphambvu kuna amuna na akazi akuti akhadaperekeka kuna Mulungu, mbadzodzwa na nzimu wakucena?—Aroma 1:7.

2-3. Sathani asayesera tani kutipeusa kuna Yahova? Mphapo tinakwanisa tani kufudza pinthu “pidakhomereka kakamwe” m’manyerezero mwathu?

² Pisaoneka kuti Paulu akhadzudzumika thangwi Akristu anango akhakhuyiwa na manyerezero a anthu pabodzi na udziwisi wa anthu a dziko ya Sathani. (Aef. 4:17-19) Pyenepi pinakwanisambo kucitika kuna ife tonsene. Sathani ndi ntongi wa dziko ino, natenepa iye anakwanisa kuphatisira misampha yakusiyana-siyana toera kutipeusa. Mwacitsandzo, khala ife tisafuna kukhala akufunika peno akubvekera, Sathani anaphatisira pyenepi toera kutipeusa kuna Yahova. Iye anakwanisambo kuphatisira pidapfundza ife panyumba, kuxikola na pidapfundza ife kubulukira kwa andzathu apacisa toera kuticitisa kunyerezera ninga iye.

³ Kodi ndi pyakukwanisika kuna ife kufudza pinthu “pidakhomereka kakamwe” m’manyerezero mwathu? (2 Akor. 10:4) Paulu atawira: “Ife tisafudza manyerezero akuphonyeka na mipingizo yonsene inacimwanisa anthu kudziwa Mulungu, pontho ife tisaikha mu ubitcu manyerezero onsene toera abvere Kristu.” (2 Akor. 10:5) Inde, na ciphedzo ca Yahova, ife tinakwanisa kufudza manyerezero onsene akuipa. Ninga ntombwe unamalisa mphambvu ya venenu, Mafala a Mulungu anatiphedza toera kufudza manyerezero akuipa a dziko ya Sathani.

“CINJANI MANYEREZERO ANU”

4. Ndi macinjo api akuti azinji a ife taacita mu ndzidzi udatoma ife kupfundza undimomwene?

⁴ Nyerezerani macinjo akhafunika imwe kucita mu ndzidzi udatoma imwe kupfundza undimomwene wa Bhibhlya na cisankhulo cidacita imwe toera kutumikira Yahova. Toera kutumikira Yahova, azinji a ife asiya kucita pinthu pyakuipa. (1 Akor. 6:9-11) Ife tisapereka takhuta kakamwe kuna Yahova thangwi yakutiphedza toera kusiya kucita pinthu pyenepi pyakuipa.

5. Mwakubverana na Aroma 12:2, ndi pinthu pipi piwiri pyakuti tisafunika kupicita?

⁵ Natenepa, ife cipo tisafunika kunyerezera kuti nkhabe funikabve kucita macinjo. Maseze tasiya kucita madawo makulu akhacita ife mbatidzati kubatizwa, tisafunika kuwangisira kakamwe toera kucalira pinthu pyonsene pyakuti pinatiyesera toera kucita pontho madawo anewa. Tinacita tani pyenepi? Paulu atawira: “Lekani kupitiriza kutowezera anthu a dziko, mbwenye cinjani manyerezero anu.” (Aroma 12:2) Natenepa tisafunika kucita pinthu piwiri. Cakutoma, ife tisafunika kusiya ‘kutowezera anthu a dziko ino.’ Caciwiri, tisafunika ‘kucinja manyerezero athu.’

6. Tisapfundzanji na mafala a Yezu anagumanika pa Mateu 12:43-45?

⁶ Kucinja kudalonga Paulu kusaphataniza pizinji kupiringana maonekero athu akunja. Kucinja manyerezero athu kusaphataniza makhundu onsene a umaso wathu. (Onani bokosi “Kucinja peno Kusangizira?”) Kucinja kweneku kusaphatanizambo kucinja makhaliro athu, mabvero na pifuno pyathu. Natenepa tonsene tisafunika kubvundzika: ‘Kodi macinjo anacita ine toera ndikhale Nkristu ndi aciphamaso, peno ndikuacita toera ndikhale Nkristu wandimomwene?’ Kudziwa kusiyana kweneku ndi kwakufunika. M’bukhu ya Mateu 12:43-45, Yezu alonga pinthu pyakuti tisafunika kupicita. (Lerini.) Mafala anewa asatipfundzisa ntsonga yakufunika kakamwe: Ife tisafunika kubulusa manyerezero akuipa, mbatiikha manyerezero anakomeresa Mulungu.

“PITIRIZANI KUSASANYIRA MPHAMBVU INATSOGOLERA MANYEREZERO ANU”

7. Tinakwanisa tani kucinja uunthu wathu wankati?

⁷ Kodi ndi pyakukwanisika kucinja pipendamiro pyathu peno uunthu wathu wankati? Bhibhlya isatawira: “Pitirizani kusasanyira mphambvu inatsogolera manyerezero anu, pontho musafunika kubvala uunthu upswa, udacitwa mwakubverana na cifuno ca Mulungu, mu ulungami wandimomwene na kukhulupirika.” (Aef. 4:23, 24) Mwandimomwene, ndi pyakukwanisika kucinja uunthu wathu wankati, mbwenye pisanentsa. Tisafunika kucita pizinji kupiringana kukunda manyerezero akuipa peno kusiya kucita pinthu pyakuipa. Tisafunika kucinja “mphambvu inatsogolera manyerezero” athu. Pyenepi pisaphataniza kucinja pifuno pyathu, pipendamiro pyathu na mathangwi anatikulumiza toera kucita pinthu. Pyenepi pisaphemba kuwangisira kakamwe.

8-9. Kodi pidacitikira m’bale unoyu pisapangiza tani kufunika kwa kucinja uunthu wathu wankati?

⁸ Cincino tendeni tione citsandzo ca m’bale m’bodzi wakuti akhamwa kakamwe, pontho akhali wanthonga. Pidatoma iye kupfundza Bhibhlya, acita macinjo, mbabatizwa. Pyenepi pyapereka umboni wadidi kakamwe pacisa cikakhala iye. Ntsiku inango namasiku, pidamala iye kwene kubatizwa, ayeserwa munjira yakuti nee akhaidikhira. Mamuna m’bodzi wakuledzera abwera panyumba pace mbamphemba toera amenyane naye. Pakutoma m’bale unoyu apirira mayesero anewa. Mbwenye pidatoma mamuna unoyu kutikana dzina ya Yahova, m’bale aipirwa kakamwe mbacimwana kupirira. Iye alamuka mbam’menya. Thangwi yanji iye acita pyenepi? Maseze kupfundza Bhibhlya kwam’phedza toera kukunda pifuno pyakumenya anango, iye nee akhadacinja mphambvu inatsogolera manyerezero ace. Munjira inango, iye nee akhadacinja uunthu wace wankati.

⁹ Ngakhale tenepo, m’bale unoyu nee abwerera nduli. (Mis. 24:16) Na ciphedzo ca akulu a mpingo, iye apitiriza kuthambaruka. Mukupita kwa ndzidzi akhazikiswa ninga nkulu wa mpingo. Ntsiku inango namasiku, kunja kwa Nyumba ya Umambo, iye athimbana na mayesero mabodzi ene adathimbana na iye kale. Mamuna m’bodzi wakuledzera akhafuna kumenya m’bodzi wa akulu a mpingo. Kodi m’bale wathu acitanji? Mwakukhurudzika na mwakucepeseka alonga na mamuna unoyu wakuledzera, mbam’phemba toera akhurudzike, pontho am’phemba toera abwerere kunyumba kwace. Thangwi yanji m’bale acita pinthu mwakusiyana paulendo unoyu? Iye akhadacinja mphambvu inatsogolera manyerezero ace. Mwandimomwene, iye akhadacinja mbakhala munthu wakucepeseka na wantendere. Pyenepi pisapasa mbiri Yahova.

10. Tisafunika kucitanji toera kucinja uunthu wathu wankati?

¹⁰ Macinjo ninga anewa nee asacitika okha. Mbwenye tisafunika kuwangisira kakamwe, ngakhale mu pyaka pizinji. (2 Ped. 1:5) Macinjo anewa nee asacitika basi ene thangwi tisatumikira Yahova mu ndzidzi uzinji. Ife tisafunika kuwangisira toera tikwanise kucinja uunthu wathu wankati. Tendeni tione pinthu pingasi pyakufunika kakamwe pyakuti pinatiphedza toera kucita macinjo anewa.

TINACINJA TANI MPHAMBVU INATSOGOLERA MANYEREZERO ATHU

11. Kodi phembero inatiphedza tani toera kucinja mphambvu inatsogolera manyerezero athu?

¹¹ Cinthu cakutoma na cakufunika kakamwe toera kucicita ndi phembero. Ife tisafunika kuphembera ninga pidacita nyamasalmo: ‘Mulungu, citani ntima wakucena nkati mwanga, pontho ikhani manyerezero mapswa na akuwanga muna ine.’ (Masal. 51:10) Ife tisafunika kudzindikira kuti tisafuna kucinja mphambvu inatsogolera manyerezero athu na kuphemba ciphedzo ca Yahova. Tinakwanisa tani kukhala na cinyindiro cakuti Yahova anatiphedza toera kucinja? Ife tinakwanisa kuwangiswa na pikiro idacita Yahova kuna Aizraeli mu ntsiku za Ezekyeli: ‘Ndinadzaapasa ntima ubodzi, ndinadzaikha nzimu upswa mwa iwo, pontho ndinadzaapasa ntima wa nyama [pyenepi pisabveka, ntima wakubvera pitsogolero pya Mulungu].’ (Ezek. 11:19) Yahova akhafuna kakamwe kuphedza Aizraeli toera acinje, pontho iye asafunambo kutiphedza.

12-13. (a) Mwakubverana na Masalmo 119:59, ndi pinthu pipi pinafunika ife kunyerezera mwacidikhodikho? (b) Ndi mibvundzo ipi yakuti tisafunika kucitika tekha?

¹² Cinthu caciwiri cakufunika kakamwe toera kucicita ndi kunyerezera mwacidikhodikho. Pakuleri Bhibhlya ntsiku zonsene, tisafunika kunyerezera mwacidikhodikho pinaleri ife toera tikwanise kudzindikira manyerezero na mabvero akuti tisafunika kuacinja. (Lerini Masalmo 119:59; Aheb. 4:12; Tiya. 1:25) Ife tisafunikambo kudzindikira pipendamiro pyathu toera tikhonde kupeuswa na udziwisi wa anthu a dziko. Tisafunika kutawira kuti tiri na makhundu anango toera kuasasanyira, mbatiwangisira toera kucita pyenepi.

¹³ Natenepa tisafunika kubvundzika: ‘Kodi ndiri na bibvu pang’ono peno ntcanje muntima mwanga?’ (1 Ped. 2:1) ‘Kodi ndisapibva kuti ndine wakufunika kakamwe kupiringana anango thangwi ya mbuto idabuluka ine, ndapfundza kakamwe peno ndiri na kobiri izinji?’ (Mis. 16:5) ‘Kodi ndisapwaza anthu ale akuti nee ali na pinthu ninga piri na ine, peno ale akuti ndi a dzindza inango?’ (Tiya. 2:2-4) ‘Kodi ine ndisakomerwa na pinthu pinapereka dziko ya Sathani?’ (1 Juw. 2:15-17) ‘Kodi ndisakomerwa na pinthu pyauphanga na pinthu pyaulukwali?’ (Masal. 97:10; 101:3; Amosi 5:15) Matawiro a mibvundzo ineyi anatiphedza toera kudzindikira makhundu anafunika ife kusasanyira. Tingakwanisa kucinja mabvero na manyerezero anewa, tinatsandzayisa Babathu wakudzulu.—Masal. 19:14.

14. Thangwi yanji ndi pyakufunika kakamwe kwa ife kusankhula axamwali adidi?

¹⁴ Cinthu cacitatu cakufunika kakamwe kwa ife ndi kusankhula axamwali adidi. Mwakukhonda tsalakana khala tisadzindikira pyenepi peno nkhabe, ife tisakhuyiwa kakamwe na axamwali athu. (Mis. 13:20) Kubasa peno kuxikola, ife tisakhala na anthu akuti nee anatiphedza toera kunyerezera munjira inakomeresa Mulungu. Mbwenye ife tinakwanisa kugumana anthu adidi toera kucita nawo uxamwali pa misonkhano yathu Yacikristu. Pa misonkhano ineyi, ife tinakwanisa kukulumizwa “toera kupangiza ufuni na kucita mabasa adidi.”—Aheb. 10:24, 25, cidzindikiro capantsi.

KHALANI “AKUWANGA MU CIKHULUPIRO”

15-16. Sathani asayesera tani kucinja manyerezero athu?

¹⁵ Kumbukani kuti Sathani asafuna kucinja manyerezero athu. Iye asaphatisira mitundu mizinji ya pipfundziso toera kuticitisa kupenula undimomwene wa Mafala a Mulungu.

¹⁶ Sathani asapitiriza kucita mbvundzo ubodzi ene udacita iye kuna Eva m’munda mwa Edheni: ‘Ndimomwene kuti Mulungu alonga kuti . . . ?’ (Gen. 3:1) Mu dziko ino yakutongwa na Sathani, kazinji kene ife tinabva mibvundzo ninga iyi: ‘Ndimomwene kuti Mulungu asakhondesa kusembana mamuna na mamuna peno nkazi na nkazi? Ndimomwene kuti Mulungu nee asafuna kuti mucite maphwando a Khisimisi na a ntsiku yakubalwa? Kodi mwandimomwene Mulungu wanu asakukhondesani kuikhwa ciropa? Khala Mulungu ndi waufuni, mwandimomwene ndiye anakukhondesani kucedza na acibale peno axamwali adabuluswa mu mpingo?’

17. Kodi tisafunika kucitanji munthu angaticita mibvundzo thangwi ya pinakhulupira ife? Pontho mwakubverana na Akolose 2:6, 7 ninji pinafuna kudzacitika kuna ife?

¹⁷ Ife tisafunika kunyindira pinakhulupira ife. Khala nee tisagumana matawiro a mibvundzo yakufunika thangwi ya pinthu pinakhulupira ife, tinatoma kupenula khala pinthu pinakhulupira ife ndi pyandimomwene peno nkhabe. Kupenula kweneku kunakwanisa kudzudzumisa manyerezero athu na kufudza cikhulupiro cathu. Mphapo tisafunika kucitanji? Bhibhlya isatipanga kuti tisafunika kucinja manyerezero athu toera tidzindikire tekhene pinthu ‘pyadidi, pyakuthema na pyakutawirika kuna Mulungu.’ (Aroma 12:2) Tingapfundza mwakukhonda phonya, tinakwanisa kudzindikira undimomwene unapfundza ife m’Bhibhlya. Tinakwanisa kukhala na cinyindiro cakukwana cakuti midida ya Yahova ndi yadidi. Buluka penepo, tinadzakhala ninga muti wakuti uli na mitcitci yakuwanga, mbatikhala “akuwanga mu cikhulupiro.”—Lerini Akolose 2:6, 7.

18. Ninji pinafuna kutiphedza toera kutsidzikizika ku misampha ya Sathani?

¹⁸ Nkhabe munthu anakwanisa kuwangisa cikhulupiro cathu. Natenepa ife tisafunika kupitiriza kucinja mphambvu inatsogolera manyerezero athu. Pontho, ndzidzi onsene tisafunika kuphemba nzimu wakucena wa Yahova toera ukwanise kutiphedza. Tisafunika kunyerezera mwacidikhodikho na kupitiriza kudzindikira mathangwi anaticitisa kunyerezera munjira ineyi. Tisafunika kukhala na axamwali adidi, pontho tisafunika kucedza na anthu akuti anatiphedza toera kukhala na manyerezero adidi. Tingacita pyenepi, tinatsidzikizika ku misampha ya Sathani, pontho pinatiphedza toera kufudza “manyerezero akuphonyeka na mipingizo yonsene inacimwanisa anthu kudziwa Mulungu.”—2 Akor. 10:5.