Pfunzisani Anyakukhurudzika Kufamba M’njira Ya Mulungu
1 Anyakupfunza a Kristu a piaka dzana yakutoma alongwa ninga anthu akutoweza “njira.” (Mach. 9:2) Cikristu candimomwene cisaphataniza njira zonsene za umaso wa munthu. (Mis. 3:5, 6) Natenepa, munacitisa ife mapfunziro a Biblya tisafunika kucita pizinji kupiringana kupfunzisa basi cidziwiso candimomwene ca pipfunziso pya Biblya. Tisafunikambo kuphedza anyakupfunza a Biblya kufamba m’njira ya Yahova.—Sal. 25:8, 9.
2 Kufuna Yahova Na Yezu: Cinthu cakunensa kakamwe kwa anthu akusowa ungwiro ndi kucitisa manyerezero, makhaliro, malongero na mafambiro awo kubverana na cifuno ca Mulungu! (Arom. 7:21-23; Aef. 4:22-24) Mbwenye, kufuna Mulungu na Mwanace kusakulumiza anyakukhurudzika kucita pyenepi. (Jwau 14:15; 1 Jwau 5:3) Kodi tinaphedza tani anyakupfunza athu a Biblya kusakulira kufuna kweneku?
3 Phedzani nyakupfunza wanu kudziwa ntundu wa umunthu wa Yahova. Mbale unango afokotoza: “Anthu nkhabe kwanisa kufuna munthu wakuti nkhabe kundziwa, natenepa, munatomesa ine pfunziro, ndisapfunzisa anyakupfunza anga a Biblya dzina ya Mulungu kubulukira m’Biblya, na ndisasaka njira za kugomezera makhaliro a Yahova.” Kugomezera citsanzo ca Yezu ndi njira yadidi kakamwe ya kucita pyenepi. (Jwau 1:14; 14:9) Phatisiranimbo bokosi inagumanika kunkhomo kwa nsolo ubodzi na ubodzi wa bukhu yakuti Biblya Isapfunzisanji towera kuphedza nyakupfunza kunyerezera makhaliro akudzumatirisa a Mulungu na Mwana wace.
4 Pfunzisani Kubulukira Ku Citsanzo: Ninga apfunzisi na atsogoleri, tisapangiza anango kubulukira ku mabasa athu kuti kufamba m’njira ya Mulungu kusabvekanji. (1 Akor. 11:1) Mwacitsanzo, anyakupfunza azinji a Biblya hadadzoloera tayu kulonga na anyaphena pya pikhulupiro pyawo. Natenepa, pasafunika kupirira na luso towera kuaphedza kukulisa kufuna, cikhulupiro na cipapo cakufunika kuti acite khundu m’basa ya kumwaza mphangwa na kucita anyakupfunza. (2 Akor. 4:13; 1 Ates. 2:2) Kufuna kwathu kutsogolera anyakupfunza athu kunadzatikulumiza kukhala ku khundu yawo munacita iwo mathanyo akutoma m’utumiki Wacikristu.
5 Citsanzo canu cingakwanise kupfunzisa anyakupfunza a Biblya pinthu pyakufunika pya makhaliro Acikristu. Munaenda imwe kaona anyakuduwala peno munamwanyika imwe anango mwakukomerwa pa misonkhano yampingo, iwo asaona kufuna kubulukira m’mabasa. (Jwau 15:12) Munacita imwe khundu m’kucenesa Nyumba ya Umambo peno kucita pinthu m’kuphedza anango, muli kuapfunzisa kutumikira. (Jwau 13:12-15) Munaona iwo kuti imwe nee mukusaka pinthu pizinji m’umaso, iwo asaona kuti ‘kutoma kusaka dziko [peno umambo] ya kudzulu na udidi wayo’ kusabvekanji.—Mat. 6:33.
6 Basa ya kupfunzisa anango na ya kucita anyakupfunza kubulukira m’Mafala a Mulungu isaphemba kuwangisira kukulu. Ndi kwakukomeresa tani kuona anyakukhurudzika ‘kufamba mu udidi [peno undimomwene]’!—3 Jwau 4.
[Study Questions]
1. Kodi kucita anyakupfunza kusaphatanizanji?
2. Kodi ndi ninji cinafuna kukulumiza nyakupfunza wa Biblya kubvera mitemo ya Mulungu?
3.Kodi tinakwanisa tani kuphedza anyakupfunza kusakulira kufuna Yahova na Yezu?
4. (a) Thangwi yanji anyakupfunza azinji a Biblya asaona basa ya kumwaza mphangwa kukhala yakunensa? (b) Kodi tinakwanisa tani kuphedza anyakupfunza athu kucita mathanyo akutoma m’utumiki Wacikristu?
5. Kodi citsanzo cadidi cisaphedza tani anyakupfunza a Biblya kuona pinaphatanizwa m’kutowerera mitemo ya Mulungu?
6. Kodi pana maphindu anji kuphedza anyakukhurudzika kutumikira Yahova?