Kodi Musasaka Kudziwa Anango Anafuna Kupfunza?

Khala mukucitisa cincino pfunziro ya Biblya, thangwi yanji nkhabe bvunzisa nyakupfunza wanu khala ali na axamwali, acibale peno anyakudziwana ace akuti mbadakomerwambo na kupfunza pinapfunzisa Biblya? Iye angakwanise kulonga madzina mazinji. M’kutawiriswa na nyakupfunza wanu, mungakwanise kulonga dzinace munaendemwe kaona anthu anewa towera kuapasa pfunziro ya Biblya. Mungakwanise kulonga: “[Dzina ya nyakupfunza wanu] asakomerwa na kupfunza Biblya, na iye asanyerezera kuti imwe mbamudafunambo kuphindula na ndandanda wathu wa pfunziro ya Biblya yakukhonda lipa.” Buluka penepo pangizani mwacigwagwa macitiro a pfunziro, m’kuphatisira bukhu yakuti Biblya Isapfunzisanji.

Khala muna nyakupfunza wakuti ali kuenda kutsogolo, mungakwanise kumuwangisa kuti afokotoze masasanyiro a pfunziro kwa axamwali na piwalo pya banja pyakuti mbipidakomerwa na pfunziro. Iye angakwanise kuacemerera kuti abwere kaona pfunziro yace. Peno khala pyenepi nkhabe kwanisika, iye angakwanise kucita masasanyiro akuti imwe muagumane towera kuapangiza masasanyiro a pfunziro. Kucita pyenepi mbukudawangisa nyakupfunza kuti atome kugawana na anango cidziwiso cace ca Biblya.

Ale anaacitira imwe maulendo akubwerezera akukhonda phonya angakwanisembo kukupangizani anthu anango, ngakhale kuti iwo ene asati kutawira pfunziro ya Biblya yakukhonda phonya. Munaapasa imwe bukhu yakuti Biblya Isapfunzisanji, mungakwnaise kubvunza: “Kodi musadziwa anthu anango akuti mbadakomerwambo kutambira bukhu ninga iyi?”

Na thangwi ya kucimbiza kwa midzidzi, tisafunika kuphatisira njira zonsene zakukwanisika towera kuphedza anthu kubva na kutawira mphangwa zadidi. Kodi musasaka kudziwa anango anafuna kupfunza?