Phindulani Mwakukwana Na Misonkhano Ya Basa Ya Mmunda

¹ Misonkhano yakuphindulisa ya basa ya mmunda isapasa cipapo candimomwene na citsogolero cakuphata basa mbatisati kuenda m’utumiki. Iyo isaticitisa kuphata basa pabodzi na mpingo m’kumwaza mphangwa towera tikwanise kuphata basa na anango m’kuphedzana na kupfunzisana. (Mis. 27:17; Koel. [Mlal.] 4:9, 10) Kodi tinacitanji kuti tikwanise kuphindula mwakukwana kubulukira ku misonkhano ineyi?

² Ntsogoleri Wa Nsonkhano: Kazinji kene, nkhabe perekwa mphangwa zakuthonyeka mwanyapantsi towera kudingwa pa misonkhano ineyi. Natenepa, kukhunganyika mwadidi ndi kwakufunika khala ndimwe anafuna kutsogolera nsonkhano. Lekani kucitisa lemba ya ntsiku mwakukhonda kukhunganya, maseze mungakwanise kusankhula kuiphataniza pa kuceza khala iyo isabverana na utumiki. Nyerezerani mphangwa zakuti zinadzakhala zakuphedza kwa anafuna kuenda kamwaza mphangwa pa ntsiku ineyi. Mwacitsanzo, mungakwanise kulonga peno kupangiza maperekero umboni. Mungakwanise kusankhula kubwerezera papswa pinthu pinagumanika m’bukhu ya Raciocínios, na m’bukhu ya Escola do Ministério, peno khundu ipswa ya Nsonkhano Wa Basa. M’midzidzi inango, mungakwanise kudinga kuti munathimbana tani na nyatwa zinagumanika m’cisa canu, peno mungakwanise kulonga njira za kusakulira kufuna na kutomesa mapfunziro a Biblya, makamaka khala amwazi mphangwa azinji anadzaenda kacita maulendo akubwerezera. M’kukhonda tsalakana pinafuna imwe kulonga, khalani wakugalamuka na wakuwangisa.

³ Tomesani nsonkhano m’nzidzi wakuthema, ngakhale musadziwa kuti anango anadzadembuka. Phatisira nzeru pa kugawa misoka, na pa kupasa cisa kwa ale anacifuna. Nzidzi wa nsonkhano nkhabe funika kupiringana mphindi 10 peno 15 na khala ukutowerera nsonkhano wa mpingo usafunika kucitwa m’nzidzi wakucepa. Mbumusati kumalisa nsonkhano, onsene asafunika kudziwa munthu anafuna kuenda na iwo na kunafuna iwo kuenda kaphata basa. Nsonkhano usafunika kumaliswa na phembero.

⁴ Imwe Mungakwanise Kuphedza: Tenepa ninga misonkhano ya mpingo, tisapangiza cilemedzo kwa Yahova pabodzi na kutsalakana anango m’kufika m’nzidzi wakuthema. Tawirani pa nsonkhano. Musafunika kusiya kuti ntsogoleri akugaweni na munthu unango, peno mungacite masasanyiro anu ene nsonkhano mbusati kutoma. Mungafuna kucita masasanyiro anu ene, wangisirani ‘kufungula mitima yanu’ towera kuphata basa na amwazi mphangwa akusiyana-siyana, mbuto mwa kuphata basa na axamwali apantima m’nzidzi onsene. (2 Akor. 6:11-13) Nsonkhano ungamala, calirani kucinja masasanyiro, na ndokoni mwakucimbiza ku cisa.

⁵ Cifuniro ca misonkhano ya basa ya mmunda ndi cibodzibodzi ninga ca misonkhano ya mpingo. Iyo yacitwa towera tikwanise “[kuoneranambo] mbatiphedzana, towera munthu na munthu apangize ndzache kunfuna kwache mbachita mabasa adidi.” (Aheb. 10:24, 25, Mphangwa Zadidi) Tingawangisira towera kuphindula na misonkhano ineyi, tinadzaphedzwa kukwanirisa utumiki wathu—inde ‘basa yadidi!’

[Study Questions]

1. Kodi misonkhano ya basa ya mmunda inakwanisa tani kutiphedza?

2. Kodi ndi pinthu pipi pyakuti ntsogoleri wa nsonkhano angakwanise kupilonga?

3. Kodi ndi nzidzi ungasi unafunika kubvungwa pa nsonkhano, na ndi ninji pinafunika kucitwa m’nzidzi unoyu?

4. Kodi ndi ninji pinafuna kudzaphedza onsene kuphindula mwakukwana na misonkhano ya basa ya mmunda?

5. Kodi ndi cipi cifuniro ca misonkhano ya basa ya mmunda?