Kodi Munakwanisa Kupita Pa “Nsuwo Ukulu” Towera Kucita Basa?
1 Mudafungulwa “nsuwo ukulu” towera mpostolo Paulu acite basa, mwakufuna iye abanza mwai unoyu towera kuendesa kutsogolo pifuno pya Umambo mokhonda tsalakana kuinjipa kwa anyamalwa. (1 Akor. 16:9) Lero amwazi mphangwa a Umambo akukwana 642.000 kuzungulira dziko yonsene yapantsi apita pa nsuwo ukulu towera kucita basa mukukhala apainiya a nzidzi onsene.
2 Makhaliro Asacinja: Maseze makhaliro athu a cincino angakwanise kupingiza basa yathu mbwenye makhaliro asacinja. Natenepa, m’midzidzi inango mphyadidi kudinga makhaliro athu ene a cincino mbuto mwa kudikhira makhaliro adidi. (Koel. 11:4) Kodi imwe ndimwe mphale peno ntsikana wakuti mwamala kwene xikola ya mabukhu makulu? Kodi imwe ndimwe nyakubala wakuti ananu anatoma xikola cincino? Kodi imwe muli paduzi na kutambira phanceni ku basa yanu yadziko? Macinjo enewa angakwanise kukupasani nzidzi uzinji na kukucitisani kupita mu basa ya upainiya wa nzidzi onsene. Mulongo unango wakuti akhali na ungumi wa nyatwa-nyatwa atonga kupita mu basa ya upainiya mbakhali na piaka 89 pyakubalwa. Thangwi yanji? Nakuti iye akhadapiringana caka nee kuenda ku nyumba ya ungumi, iye akhapibva kuti ungumi wace mbudantawirisa kupita mu basa ya upainiya.
3 Mukulonga pya Paulu, iye pakutoma akhafuna kuenda kaona abale ace ku Korinto. Mbwenye iye acinja manyerezero ace thangwi ya mphangwa zadidi. Azinji akuti ndi apainiya a nzidzi onsene lero acita macinjo mazinji towera akhale apainiya. Anango asankhula kukhala na umaso okhonda funa pizinji mbafika pa kuenda ku basa namaulo peno namacibese basi towera kugula pyakufuna pyawo pang’ono basi pya umaso. Iwo asakhala akukomerwa mu mwai wawo wa basa. (1 Tim. 6:6-8) Mabanja anango acita macinjo mu nkhaliro wawo wa umaso towera mamuna basi aphate basa, mbipicitisa nkazi kutumikira ninga mpainiya.
4 Lekani kukhonda mwakucimbiza nyerezero yakukhala mpainiya thangwi yakugopa kuti nkhabe kwanirisa midzidzi yakufunika. Ndi midzidzi miwiri na mphindi zingasi basi zinafunika pa ntsiku. Khala nee muli na cinyindiro cakukwanirisa midzidzi yakufunika, yeserani mu nthanda ibodzi peno ziwiri kukhala mpainiya wakuphedza na cifuno cakucita midzidzi 70. Pyenepi pinadzakucitisani kukhala wakukomerwa na basa ya upainiya. (Sal. 34:8) Longani na ale anaphata basa cincino ninga apainiya. Panango iwo athimbanambo na makhaliro mabodzi ene na anu. (Mis. 15:22) Phembani Yahova kuti apase nkhombo kuwangisira kwanu towera kuthimizira utumiki wanu.—1 Jwau 5:14.
5 Basa Yakuphindulisa: Kutumikira ninga mpainiya wa nzidzi onsene kusabweresa nkhombo zizinji. Kusakucitisani kukhala na citsanzayo cikulu kakamwe cinabwera na kupasa mwakudzala manja. (Mach. 20:35) Upainiya unadzathimizira luso yanu yakuphatisira undimomwene wa Mafala a Mulungu mu njira ya ulungami. (2 Tim. 2:15) Unadzathimizira miyai yanu ya kuona dzanja ya Yahova mbikakuphedzani. (Mach. 11:21; Afil. 4:11-13) Pontho upainiya unadzakuphedzani kukulisa makhaliro auzimu, ninga kupirira, na unadzakucitisani kufendezera duzi Yahova. (Tgo. 4:8) Kodi munakwanisa kupita pa nsuwo uyu ukulu towera kucita basa mukukhala mpainiya wa nzidzi onsene?
[Study Questions]
1. Kodi ndi upi “nsuwo ukulu” udafungulirwa ife towera kucita basa?
2. Thangwi yanji m’midzidzi inango ndi pyadidi kudinga makhaliro athu?
3. Kodi anango acita tani macinjo towera akhale apainiya a nzidzi onsene?
4. Kodi tingakwanise kucitanji khala nee tiri na cinyindiro cakukwanirisa midzidzi yakufunika?
5. Thangwi yanji upainiya wa nzidzi onsene ndi basa yakuphindulisa?