Phedzani Anyakupfunza Biblya Kuti Akhale Amwazi Mphangwa Zadidi Za Umambo
1 Basa idapasa Yezu anyakupfunzace ninga pinapangizwa pa Mateo 28:19, 20 ikhali ikulu kakamwe. Anyakupfunza a Kristu apangwa kuti acite anyakupfunza azinji akuti, patsogolo pace, mbadapitiriza na basa yakucita anyakupfunza. Phata mbidaikhwa towera mphangwa zadidi za Umambo wa Mulungu zimwazwe pa ulendo wakumalisa pa dziko yonsene yapantsi nkati mwa ndzidzi wakumalisa, unakhala ife cincino.—Mat. 24:14.
2 Anyakupfunza athu a Biblya angakwanise kukhala anathu peno anthu anango akuti asafuna kupfunza Biblya na ife. Mwandimomwene ife tisafuna kuphedza anthu anewa towera adzindikire na akwanirise kupitawirira kwawo kwa kuphedza anthu anango kuti akhale anyakupfunza a Yezu Kristu.—Luka 6:40.
3 Apfunziseni Kuti Apereke Umboni: Wangisani ale anapfunza na imwe kuti apangembo anango pinapfunza iwo. Apangeni pyakugumana napyo pyakuwangisa pya basa ya m’munda. Pfunzisani ananu kutomera uwana wawo towera acite khundu mu utumiki mu njira yakuphindulisa mwakubverana na luso yawo. (Sal. 148:12, 13) Pangizani na pinalonga na pinacita imwe kuti utumiki ndi wakufunika kakamwe mu umaso wanu.—1 Tim. 1:12.
4 Yahova asaphatisira ale basi anatawira na anabvera mitemo yace yakulungama. Ndimomwene kuti amwazi mphangwa apswa nkhabe dziwa pizinji ninga amwazi mphangwa akale, akupereka, na atumiki a Umambo akubatizwa, mbwenye iwo asafunika kukhulupira na kukwanisa kufokotoza pipfunziso pyakutoma pya Biblya. (Onani Organizados, tsa. 79-82.) Nakuti iwo asiyaniretu na “Babilonya Wankulu” na nkhabebve kucita khundu m’pinthu pyonsene pya ndale, iwo asafunika kugumanika m’misonkhano ya mpingo mwakukhonda phonya.—Apok. 18:2, 4; Jwau 17:16; Aheb. 10:24, 25.
5 Mungaona kuti m’bodzi wa anyakupfunza anu athema kukhala m’mwazi mphangwa wakukhonda kubatizwa, lekani dembuka tayu kudziwisa nyakuyang’anira wakutsogolera. Iye anadzacita masasanyiro akuti akulu a mpingo awiri agumanyikane na imwe pabodzi na nyakupfunza wanu wa Biblya towera aone khala iye athema kukhala m’mwazi wakukhonda kubatizwa wa mphangwa zadidi za Umambo pabodzi na mpingo. Buluka penepo unadzakhala mwai wanu kupitiriza kupfunzisa nyakupfunza Biblya munakuperekerani iye m’basa ya m’munda.