Ndzidzi Wa Kudya Na Kutsanzaya Mwauzimu
1 Mwakufuna Yahova asatsalakana pyakufuna pyauzimu pya anzakazi ace. Mu ndzidzi wakuti anthu azinji n’dziko ali pa nyatwa yauzimu, ife tiri kudyeswa mwadidi mwauzimu. (Iza. 65:13) Njira ibodzi inaphatisira Yahova towera kutidyesa mwauzimu ndi misonkhano yathu ya gawo inacitwa piaka pyonsene. Kodi mukucita masasanyiro towera mugumanike pa makhundu onsene a Nsonkhano wa Gawo unafuna kudza wakuti “Kutsogolerwa Na Nzimu wa Mulungu”? Yakhunganywa phwando yauzimu yadidi na yakupasa ungumi.
2 Khunganyikani Mwanyapantsi: “Pinanyerezera nyakuphata basa pisampfumisa.” (Mis. 21:5) Natenepa, munamalisa imwe kucita masasanyiro anu towera kugumanika pa ntsiku zonsene zitatu za nsonkhano, lekani kunyinyirika tayu kuphemba patrau wanu ndzidzi wa kuenda ku nsonkhano wa gawo. Khala munadzafuna mbuto zakugona, kodi mwacita kale masasanyiro? Pontho munafunika kucita masasanyiro a cakudya camasikati towera mudye na abale anu pa mbuto ya nsonkhano wa gawo. Citani masasanyiro akuti mufike pa nsonkhano mwakukhonda dembuka ntsiku zonsene towera mugumane mbuto na kucita khundu mu nyimbo yakutoma na phembero.
3 Ife tisafunika kuonesesa kuti nguwo zinafuna kudzabvala ife ndi zakulinganira na zadidi. (1 Tim. 2:9, 10) Misonkhano ya gawo isatipasa mwai wadidi kakamwe wakupereka umboni kwa anthu onsene pa cisa. Mu kubvala mu njira yakulemedzeka mu nzinda wa nsonkhano na kubvala makaraxa athu, ife tisakhala akusiyana na anthu akukhonda kukhulupira na tisacitisa kuti anyakutiona akhuiwe mu njira yadidi.
4 Bveserani Mwacidikhodikho: Mwandimomwene ife nkhabe funa kuluza na khundu ene ibodzi ya cakudya cauzimu cinafuna kupaswa ife pa phwando ineyi yauzimu! (Mis. 22:17, 18) Kutowezera m’Biblya yathu mu ndzidzi unalerwi malemba na kulemba ntsonga mwacigwagwa kunadzatiphedza towera tikhale akubvesera programu na kucalira pidzudzumiso. Buluka penepo namaulo, tingakwanise kuphatisira pidalemba ife towera kulonga na anango ntsonga zikulu za programu. M’piaka pyakumalisa pisaoneka kuti anapiana anango asakhala pabodzi pa nsonkhano wa gawo na asacedza nkati mwa programu peno kutumizirana mphangwa m’mitokodzi yawo ya m’manja. Khala tiri na anapiana, kuphataniza akuthutuka, pingakwanise kukhala pyakuphindulisa kwa ife kukhala nawo pabodzi na kubvesera programu ninga banja mbuto mwa kutawirisa anapiana athu kukhala pa mbuto inango yakusiyana na yathu na anapiana anzawo.
5 Tsanzayani Na Ubale: Cakudya cadidi ndi cakutsanzayisa kakamwe cingadyiwa pabodzi na axamwali. (Mis. 15:17) Mu njira ibodzibodzi, kugumanyikana na abale athu na alongo kusathimizira citsanzayo cathu pa nsonkhano wa gawo. Natenepa, programu ingalimira, ndi pyakukomeresa tani kumwanyika anango na kutsanzaya na ubale! (Sal. 133:1) Munatiphemba muimiriri mu njira yadidi kuti tikhale pantsi nyimbo zamalimba mbazisati kutoma, ife tisafunika kumalisa makani athu na kukhala towera kubvesera kutoma kwa programu.
6 Phatisirani Mwai Onsene Towera Kupereka Umboni: Kazinji kene misonkhano ya gawo isatipasa miyai yadidi kakamwe towera kupereka umboni. Azinji a ale anagumanika pa nsonkhano wa gawo akuti asaenda ku restauranti pakumala programu asabvunzwa na anyakupereka cakudya na anango pya nsolo uli pa karaxa ya nsonkhano wa gawo. Pyenepi pisatomesa makani na kucitisa kuti umboni wa undimomwene uperekwe. Buluka penepo anango adabvunza acemererwa kuti agumanike pa makhundu a nsonkhano na aenda.
7 Pikwi na pikwi pya midzidzi pyabvungwa towera kukhunganya programu ineyi, kukhunganya mbuto yakucitira nsonkhano, madepartamentu, na kukhunganya nkhani zonsene. Kuwangisira konsene kudacitwa towera kukhunganya phwando ineyi yauzimu kusapangiza citsalakano cakufuna ca Yahova kwa mbumba yace. Tendeni tonsene tigumanike pa nsonkhano unoyu na kudya mwauzimu! Munacita ife pyenepi, mwakusiyana na dziko, ife tinadzakhuwa ‘mwakutsandzaya’ thangwi ya ukhali wadidi wa ntima.—Iza. 65:14.
[Study Questions]
1. Kodi Yahova asatsalakana tani pyakufuna pyauzimu pya anzakazi ace?
2. Kodi kukhunganyikira nsonkhano mwanyapantsi kusaphatanizanji?
3. Kodi tisafunika kucita masasanyiro a kubvala nguwo za ntundu wanji?
4. Kodi ndi ninji pinafuna kudzaphedza ife pabodzi na mabanja athu kuphindula kakamwe na programu?
5. Kodi tinakwanisa tani kuthimizira kutsanzaya kwathu pa nsonkhano wa gawo?
6. Longani cakugumanikana naco canu cene cinapangiza kuti tinapereka tani umboni kwa anthu a mu nzinda wa nsonkhano wa gawo.
7. Thangwi yanji tisafunika kugumanika pa nsonkhano wa gawo unafuna kudza?