Bokosi Ya Mibvunzo

◼ Kodi ndi pyakuthema kwa m’bodzi wa Mboni za Yahova kuenda kakonzwa na kutsalakanwa pa nyumba ya ungumi peno yakutsalakanira akukalamba na atenda yakutsogolerwa na gulu yauphemberi?

Magulu akusiyana-siyana a mauphemberi asatsogolera nyumba za ungumi peno zakutsalakanira akukalamba na atenda zakuti zisakonza peno kutsalakana utenda wa piaka pizinji. Kazinji kene, nyumba zenezi nee zisamangwa na cifuno ca kuendesa kutsogolo pifuno pya Babilonya Wankulu tayu. (Apok. 18:​2, 4) Pakutoma iwo amanga nyumba zenezi panango towera kucita malonda. Lero, nyumba zinango za ungumi ziri na dzina ene basi yauphemberi, mbwenye zinango ziciri kutsogolerwa pang’ono na atsogoleri auphemberi.

Khala m’bodzi wa Mboni za Yahova asafuna kuenda ku nyumba ya ungumi peno yakutsalakanira akukalamba na atenda, iye asafunika kutonga ekhene khala anaenda ku nyumba yakuti panango isacita khundu ya gulu ya uphemberi peno nkhabe. Cikumbuntima ca munthu unango cingakwanise kuntawirisa kuenda, mbwenye cikumbuntima ca unango cingakwanise kunkhondesa kucita pyenepi. (1 Tim. 1:⁠5) Mbwenye pana pinthu pinango pyakuti pingakwanise kutonga cisankhulo ca munthu, na ndi pyadidi kupidinga.

Mwacitsanzo, nyumba ya ungumi peno yakutsalakanira akukalamba na atenda yakuti iri na dzina ya uphemberi panango ndiyo basi inagumanika pa cisa. Peno khala iripo nyumba inango cifupi, ire yakuti panango iri na dzina ya uphemberi ingakwanise kukhala na ukonzi wadidi. Nyumba ineyi ya ungumi yakukhala na dzina ya uphemberi panango ndiyo basi iri na mitombwe yakulinganira yakubverana na utenda, peno ndiyo basi iri na madotoro peno anyakucita operasau anafuna kutsalakana utenda wanu. Pontho, m’midzidzi inango nyumba za ungumi zakuti zisatsogolerwa na uphemberi zingakwanise kulemedza maonero anu akukhonda kuphatisira ciropa ninga Nkristu, mu ndzidzi wakuti nyumba zinango za n’khundu peno za utongi zingakwanise kukhonda kulemedza.Natenepa pyenepi ndi pinthu pingasi pinafunika imwe kudinga pakusankhula nyumba ya ungumi inafuna kuenda imwe kakonzwa.

Khala mwatonga kuenda ku nyumba ya ungumi peno yakutsalakanira akukalamba na atenda yakutsogolerwa na uphemberi, mungakwanise kuona pyenepi ninga muli kulipa basi basa idacitwa. Mungakwanise kuona ninga kuti gulu yauphemberi ikucita malonda a ntundu unango, na kugula kwanu malonda anewa nee kunaphedzera kuthambaruka kwa uphemberi waunthawatawa tayu. Imwe muli kulipa mitombwe peno basa idacitwa basi.

Mwandimomwene, ninga Nkristu, m’makhaliro anewa imwe musafunika kucita mphole-mphole towera mukhonde kucita khundu na pang’ono pene m’macitiro a ulambiri waunthawatawa. Pontho, nee musafunika kuphatisira pidzo pinaphatisirwa kazinji kene na mauphemberi ninga “Padre” peno “Irmã,” kwa anthu anaphata basa peno adabwera kudzaona nyumba. (Mat. 23:⁠9) Musafunika kudinga mwadidi kuti masasanyiro anewa akhale a malonda basi akuti imwe mutambire ukonzi na mabasa akufunika, tayu pinango.

Mungakhazikwa ku nyumba ineyi ya ungumi, mungakwanise kulonga kuti ndimwe m’bodzi wa Mboni za Yahova na kuti musafuna kucedzerwa na akulu a mpingo apacisa. Pyenepi pinadzakucitisani kuti mutambire ciphedzo cakuthema cauzimu mu ndzidzi unafuna imwe kukhala kweneku.​​—⁠1 Ates. 5:⁠14.

Piwalo pyakukhulupira pya banja, akulu a mpingo apacisa, na anango m’mpingo asafunika kutsalakana mwadidi pyakufuna pyauzimu pya abale na alongo akukalamba akuti asakhala ku nyumba zakutsalakanira akukalamba na atenda, makamaka zakutsogolerwa na gulu yauphemberi. Citsalakano m’pinthu pyenepi cinadzakhala cakuwangisa kakamwe kwa anthu anewa akukalamba na cinadzacitisa kuti akhonde kuphatanizwa m’mabasa auphemberi, pikumbukiro, peno mabasa anango akulandana na anewa anacitwa mu nyumba zenezi.

Na ntsonga zenezi m’manyerezero, m’bodzi na m’bodzi asafunika kudinga makhaliro onsene adaphatanizwa mwenemu na buluka penepo kucita cisankhulo cace cene ca nyumba ya ungumi peno yakutsalakanira akukalamba na atenda inafuna kuenda iye kakonzwa.​​—⁠Agal. 6:⁠5.