Programu Ipswa Ya Nsonkhano Wa Cisa

Kodi pisakwanisika tani kukhala akukhunganyika towera kuthimbana na ale anapingiza kakamwe ulambiri wandimomwene? Kodi tinakwanisa tani kukunda mphambvu zakuti kazinji kene zisayesera kutibweza ku dziko yakuipa? Programu ya nsonkhano wa cisa wa caka ca basa ca 2009 inadzatawira mibvunzo ineyi yakufunika kakamwe. Nsolo ndi wakuti “Pitirizani Kukunda Pyakuipa Na Pyadidi.” (Arom. 12:​20, [12:​21, Tradução do Novo Mundo] ) Dingani pinatidikhira.

Nkhani zinafuna kudzakamba muyang’aniri wa gawo ziri na misolo iyi: “Kuwangiswa Towera Kukunda Pyakuipa Na Pyadidi,” “Lekani Kunyindirika Kakamwe Mwekhene Tayu!,” “Pyakuipa Pyonsene Pinamala Cincino!,” na “Kuwangisa Cikhulupiro Cathu Towera Kukunda Dziko.” Muyang’aniri wa cisa anadzafokotoza misolo yakuti “Uno Ndi Ndzidzi Wakukhala Akugalamuka,” wakubuluswa pa Aroma 13:​11-​13, na “Lekani Kufewa Pa Ntsiku Ya Nyatwa,” wakubuluswa pa Misangani 24:​10. Pontho muyang’aniri wa cisa anadzakamba nkhani yakuti “Kutsalakana Pyakufuna Pyapacisa.” Nkhani inango yakuwangisa inadzakhala na nsolo wakuti “Kodi Munakwanisa Kucita Utumiki​​—⁠Mu Kukhala Mpainiya?” Nkhani yakutoma mwa nkhani ziwiri zakusiyirana iri na nsolo wakuti “Khalani Akukhunganyika Towera Kuthimbana Na Manyengerero A Dyabo.” Iyo inadzatiphedza kuona na kukhonda manyengerero akucenjera a Dyabo mu kulonga pya tekinolojiya, ubalangazi, na kupfunza. Nkhani yakusiyirana yakuti “Khalani Na Mphambvu Towera Kupirira Mu Ntsiku Ino Yakuipa” inadzatipangiza kuti tinakwanisa tani kuphatisira mwadidi kakamwe uphungu wakupumirwa unagumanika pa Aefesi 6:​10-​18.

Pana kubverana kakamwe pakati pa kukunda pyakuipa kutomera pa phata inabuluka ipyo na kumwaza mphangwa za Umambo. (Apok. 12:​17) Si pyakudzumisa tayu kuona kuti Sathani akupitiriza kupomokera Mboni za Yahova! (Iza. 43:​10, 12) Mbwenye Dyabo anadzapembera tayu thangwi ife tiri akudzitonga ‘kupitiriza kukunda pyakuipa na pyadidi.’ Citani masasanyiro adidi towera muphindule kakamwe kubulukira ku makhundu onsene manai a nsonkhano unoyu wa cisa.