Basa Yakupambulika Yakugawira Katsamba Kutomera 20 Ya Nthanda Ya Malandalupya Mpaka 16 Ya Nthanda Ya Bingu!

¹ Kutomera N’ciposi ntsiku 20 ya nthanda ya Malandalupya mpaka pakumala masumana manai amumphu, ife tinadzacita basa yakupambulika ya kugawira katsamba kapswa kakuti Kodi Musafuna Kudziwa Undimomwene? Tiri kudikhira kuti basa ineyi yakupambulika ya kugawira pa dziko yonsene yapantsi inadzacitisa anthu azinji kufuna pfuli ibodzi basi ya udidi peno undimomwene.—Jwau 17:17.

² Katsamba keneka kasapereka matawiro adidi a Bhibhlya ku mibvunzo mitanthatu yakufunika: “Kodi Mulungu asatitsalakanadi?” “Kodi nkhondo na nyatwa zinadzamala?” “Kodi ndi ninji pinacitika kwa ife tingafa?” “Kodi pali cidikhiro kwa anyakufa?” “Kodi ndinakwanisa tani kuphembera mbindibviwa na Mulungu?” na “Kodi ndinakwanisa tani kugumana citsanzayo mu umaso?” Magereja a Cikristu caunthawatawa cipo akwanisa kupereka matawiro adidi ku mibvunzo ineyi. Ngakhale anthu azinji akuti si Akristu tayu asanentseka na mibvunzo ineyi, mbwenye iwo nkhabe dziwa kuti Bhibhlya isapereka matawiro adidi. Natenepa, tisadikhira kuti mphangwa zenezi zinakhala zakukomeresa kwa anthu azinji.

³ Malisani Cisa Canu: Wangisirani towera kumalisa cisa canu m’basa yanu ya nyumba na nyumba ninga munakwanisikira ipyo. Khala cisa canu ndi cikulu, akulu a mpingo anakwanisa kukupangani kuti musiye pa ulendo wakutoma katsamba kabodzi pa nyumba zakukhonda gumanika anthu. Kumbukani kupasa katsamba keneka kwa anyakuendekana, acibale, anyakudziwana nawo ku basa peno ku xikola, na anango akuti kazinji kene musalonga nawo. Panango munakwanisa kucita masasanyiro towera kutumikira ninga mpainiya wakuphedza nkati mwa nthanda ya Malandalupya peno Bingu. Muli na mwana peno nyakupfunza Bhibhlya wakuti ali kuthambaruka mwauzimu na anakwanisa kukhala wakuthema towera kucitambo na ife basa ineyi yakupambulika ninga m’mwazi mphangwa wakukhonda kubatizwa? Khala ndi tenepo, dziwisani akulu a mpingo.

⁴ Pyakulonga Pakugawira: Towera kufikira anthu azinji na mphangwa, ndi pyadidi kukhala na maperekero umboni acigwagwa. Mu njira yakukhonda nentsa, bvunzani anaciro nyumba ubodzi mwa mibvunzo mitanthatu inagumanika pa tsamba yakutoma na apangizeni panagumanika ntawiro pa katsamba. Pyenepi pinadzacitisa kuti amwazi mphangwa onsene acinje maperekero awo umboni mwakubverana na pyakufuna pya cisa. Khala munthu unango apangiza cifuno, lembani pyenepi na citani ulendo wakubwerezera. Pakumala kwa sumana ibodzi na ibodzi, marevista mapswa anakwanisa kugawirwa pabodzi na katsamba. Basa ineyi yakupambulika ingamala pa 16 ya nthanda ya Bingu, tinadzagawira bukhu yakuti Biblya Isapfunzisanji. Pimatsamba pyonsene pyakusala pinadzaphatisirwa mu njira ibodzi ene ninga pimatsamba pinango.

⁵ Tomesani Pfunziro Ya Bhibhlya: Katsamba keneka kasasanywa makamaka towera kutiphedza kutomesa mapfunziro a Bhibhlya. Pakucita ulendo wakubwerezera kwa munthu adapangiza cifuno, imwe munakwanisa kubvunza kuti ndi undimomwene upi wa Bhibhlya udabweresa ubalangazi peno cisudzulo kwa iye? Mpangiseni pa tsamba yakumalisa panalonga thangwi ya masasanyiro athu a pfunziro ya Bhibhlya, na mpaseni bukhu yakuti Biblya Isapfunzisanji. Pingakwanisika, dingani mwacigwagwa ndima ibodzi peno ziwiri za nsolo wakuti uli na mphangwa zakuthimizirika za ntsonga idasankhula iye.

⁶ Yahova asayang’ana ale akuti anadzamulambira “mu nzimu na mu udidi [peno undimomwene].” (Jwau 4:23) Tendeni tonsene ticite khundu m’basa ineyi yakupambulika towera tiphedze anango kuti adziwe undimomwene!