Bokosi Ya Mibvunzo

◼ Khala anyakufuna kumanga banja asafuna kuphatisira Nyumba ya Umambo towera kucita phwando yawo yakumanga banja, ndi ntsonga zipi zinafunika iwo kucedza na akulu a mpingo?

Maphwando akumanga banja anacitwa mwakubverana na midida ya Bhibhlya asalemedza Yahova. Pyenepi ndi pyandimomwene makamaka mu kulonga pya maphwando akumanga banja anacitwa pa Nyumba ya Umambo, nakuti anthu pa cisa asaona maprogramu anacitwa penepo ninga cipangizo ca gulu yathu. Natenepa towera kuti “pinthu pyonsene pichitwe mwakuthema pontho mwakundendemera,” ndi pyadidi kuti akulu a mpingo adinge na anyakufuna kumanga banja ntsonga zingasi zakulonga pya phwando angafuna kuphatisira Nyumba ya Umambo towera kucitira phwando yawo.—1 Akor. 14:40, Chiverano Chachinchino.

Anyakufuna kumanga banja angafuna kuphatisira Nyumba ya Umambo towera kucita phwando yawo asafunika kucita phembo yakulemba kwa komiti yakuyang’anira basa ya mpingo inacita khundu ya nyumba ya umambo ineyi. Tsamba yawo isafunika kuperekwa mwanyapantsi na isafunika kupangiza ntsiku pabodzi na n’dzidzi unafuna iwo kuphatisira nyumba ya umambo. Iwo asafunika kudziwa kuti akulu a mpingo nkhabe kudzacinja ndandanda wa misonkhano towera kupasa mbuto phwando yakumanga banja tayu. Mwakuthimizira, mankhadzi wankazi na wamamuna asafunika kukhala na makhaliro adidi, mbakhala akubverana na midida ya Bhibhlya pabodzi na miyambo yakulungama ya Yahova.

Towera kukhala na cinyindiro cakuti phwando yakumanga banja inapangiza mwadidi cilemedzo kwa Mulungu wathu wakulemedzeka, anyakufuna kumanga banja asafunika kudinga masasanyiro awo a kumanga banja pabodzi na komiti yakuyang’anira basa mbasati kuakhazikisa. Maseze akulu a mpingo nkhabe kuyesera kukhazikisa maonero awo kwa anyakufuna kumanga banja, khala pakucitwa masasanyiro anango akuphonyana na mwambo, macinjo asafunika kucitwa. Nyimbo zinafunika kuimbwa ndi zire basi zakusankhulwa mu Melodias do Reino, peno zinagumanika m’bukhu yathu ya nyimbo. Phembani komiti yakuyang’anira basa ya mpingo mbamusati kubalikisa Nyumba ya Umambo peno kucinja maikhiro a mipando. Pithunzithunzi pingabuluswa peno mavidyu angagravarwi, pyenepi nkhabe funika kudodomesa kulemedzeka kwa n’dzidzi unoyu tayu. Akulu a mpingo anakwanisa kutawirisa kuenda kayesera kuti phwando inacitwa tani pa Nyumba ya Umambo khala kuyesera kweneku nkhabe dzudzumisa masasanyiro a misonkhano ya mpingo. Nee ncemerero ubodzi usafunika kuikhwa pa kwadru ya pidziwiso. Mbwenye, akulu a mpingo anakwanisa kupereka cidziwiso cacigwagwa nkati mwa Nsonkhano Wa Basa towera kudziwisa mpingo pya phwando inafuna kudzacitwa pa Nyumba ya Umambo.

Maseze si ntemo tayu kuti anyakugumanika onsene asafunika kukhala akubatizwa, nee pinakhala pyakuthema tayu kucemerera pa phwando yakumanga banja anthu akuti makhaliro awo a umaso ndi akuphonyana kakamwe na midida ya Bhibhlya peno akuti makhaliro awo mbadacitisa mibvunzo m’manyerezero a anyakugumanika pa phwando. Phwando isafunika kutsogolerwa na nkulu wa mpingo wakuthema, pingakwanisika. Akulu a mpingo ndi akuthema kupfunzisa Mafala a Mulungu, natenepa iwo ndi akuthema kakamwe towera kugomezera midida ya Malemba yakuti inaphata basa pa n’dzidzi unoyu wakufunika kakamwe.—1 Tim. 3:2.

Nakuti phwando yakumanga banja isapangizambo makhaliro a nkulu wa mpingo anafuna kuimirira masasanyiro a phwando, iye asafunikambo kupangwa mwanyapantsi masasanyiro ayo. Iye anadzagumanyikana na anyakufuna kumanga banja towera adziwe makhaliro awo mu n’dzidzi wa kubvunzirana; anyakufuna kumanga banja asafunika kulonga pinthu pyandimomwene na pyakunyindirika kwa iye. Khala mankhadzi wankazi peno wamamuna akhadamanga kale banja, iye asafunika kupangiza kuti ali wakusudzuka towera kumanga pontho banja mwakubverana na Malemba pabodzi na mwambo. (Mat. 19:9) Pyenepi pisaphataniza kupangiza nkulu wa mpingo tsamba yakutawirisa kumwalana.

Anyakufuna kumanga banja angacedza mwaufulu na angabverana wadidi na akulu a mpingo, phwando yakumanga banja inadzakhala n’dzidzi wakutsanzayisa kwa onsene.—Mis. 15:22; Aheb. 13:17.