“Leka Kuagopa Tayu”
1. Kodi ndi pinenso pipi pyakulandana na pya Yeremiya pyakuti tinakwanisa kuthimbana napyo?
1 Mudapapswa Yeremiya basa ninga mprofeta, iye apibva kukhala ninga wakukhonda thema. Mbwenye Yahova ampasa cibaso, “leka kuagopa tayu,” na amuwangisa towera kukwanirisa basa idapaswa iye. (Yer. 1:6-10) Mu ntsiku zathu, nthedza peno kusowa cinyindiro kunakwanisa kukhuya kucita kwathu khundu mu utumiki. Kugopa kuti anthu anatawira tani peno anationa tani kunakwanisa kuticitisa m’midzidzi inango kusiya utumiki wathu. Kodi tinakwanisa tani kukunda kugopa kweneku na ndi nkhombo zipi zinafuna kutambira munthu m’bodzi na m’bodzi?
2. Kodi kukhunganyika kunatiphedza tani towera kukunda kugopa kwathu mu utumiki?
2 Khunganyikani Mwanyapantsi: Kukhunganyika mwadidi kunakwanisa kutiphedza towera kukunda kugopa kwathu. Mwacitsanzo, tingakhunganyika mwanyapantsi towera kulonga na ale anatigwanda mafala, ife tinakwanisa kutawira mipingizo yakudzolowereka. (Mis. 15:28) Thangwi yanji nkhabe kucita makhundu akuyesera pa Kulambira kwa Banja towera kukhunganyikira mipingizo izinji ku xikola na mu utumiki?—1 Ped. 3:15.
3. Kodi kunyindira Yahova kunatiphedza tani towera kukunda kugopa?
3 Nyindirani Yahova: Ntombwe wadidi towera kukunda kugopa ndi kunyindira Mulungu wathu. Yahova atipasa cibaso cakuti iye anadzatiphedza. (Iza. 41:10-13) Kodi ndi citsidzikizo cipi cikulu kakamwe cakuti tinakwanisa kukhala naco? Mwakuthimizira, Yezu atipasa cibaso cakuti ngakhale pangaoneka makhaliro akukhonda dikhirika, nzimu wakucena wa Mulungu unakwanisa kuticitisa kupereka umboni mu njira yadidi. (Mar. 13:11) Natenepa, tisafunika ndzidzi onsene kuphemba Yahova nzimu wace wakucena.—Luka 11:13.
4. Kodi ndi nkhombo zipi zinabwera thangwi ya kupirira mu utumiki mwakukhonda tsalakana pinenso?
4 Nkhombo: Tingapirira mu utumiki mwakukhonda tsalakana pinenso, tinakhala akuwanga towera kupembera pakuthimbana na mayesero antsogolo. Tisakulisa cipapo na kukhonda kugopa—makhaliro a anthu anadzala na nzimu wakucena. (Mach. 4:31) Kusiyapo pyenepi, tingakunda kugopa kubulukira ku ciphedzo ca Yahova, tisawangisa cikhulupiro na cinyindiro cathu ku nkono wakupulumusa wa Mulungu. (Iza. 33:2) Pontho tisakhala akutsanzaya kudziwa kuti tisakomeresa Babathu wakudzulu. (1 Ped. 4:13, 14) Na thangwi ineyi, tilekeni kugopa kumwaza mphangwa za Umambo na cipapo, ndzidzi onsene mbitinyindira ciphedzo ca Yahova!