Bruxura Ipswa Inafunika Kugawirwa!
1. Kodi tinadzagawiranji nkati mwa nthanda ya Bingu, na ndi cipi cifuniro ca bukhu ineyi?
1 Pa Nsonkhano wathu wa Gawo wa 2009 wakuti “Mantenha-se Vigilante!” pabuluswa bruxura ipswa ya nsolo wakuti A Bíblia—Qual É a sua Mensagem? Nkati mwa nthanda ya Bingu kuzungulira dziko yonsene yapantsi mipingo inadzatoma kwene kugawira bruxura ineyi. Kodi bruxura ineyi inaphedza tani anthu mu cisa cathu? Anthu azinji, makamaka ale akuti nee ali mu uphemberi Wacikristu, ali na cidziwiso cakucepa ca Bhibhlya. Natenepa, bruxura isafokotoza pa tsamba 3 kuti yacitwa towera ‘kupangiza anthu piri m’Bhibhlya’
2. Kodi tinakwanisa tani kugawira bruxura ineyi?
2 Tinadzaigawira Tani: Tingakwanise kulonga mafala ninga awa: “Tisafuna kudziwa maonero anu a pinalongwa apa. [Lerini 2 Timoti 3:16.] Azinji analonga na ife asatawira mafala anewa; anango asanyerezera kuti Bhibhlya ndi bukhu yadidi basi. Kodi ndi api manyerezero anu thangwi ya Bhibhlya? [Dikhirani ntawiro.] Mwakukhonda tsalakana pinakhulupira ife, pana mathangwi adidi towera kudinga Bhibhlya tekhene. [Lerini ndima yakutoma padzulu pa tsamba 3.] Munaleri imwe ndima ineyi inalonga mwacigwagwa thangwi ya Bhibhlya, imwe munadzaona cinthu cakutsanzayisa kakamwe: Bhibhlya iri na nsolo ubodzi ukulu na mphangwa ibodzi ene.”
3. Kodi ndi cipi citsanzo cinango cakuti tinakwanisa kuciphatisira, makamaka mu cisa cakuti anthu azinji nee ali mu uphemberi Wacikristu?
3 Pana maonero anango, makamaka tingamwaza mphangwa ku mbuto zakuti anthu azinji nee ali mu uphemberi Wacikristu: “Tisafuna kudziwa maonero anu pa pinthu pidalembwa m’Malemba (peno m’bukhu ino yakucena). [Lerini Masalmo 37:11.] Kodi musanyerezera kuti dziko yapantsi inadzakhala tani ingakwaniriswa profesiya iyi? [Dikhirani ntawiro.] Ici ndi citsanzo cibodzi ca cidikhiro na ubalangazi cakuti anthu a madzinza onsene na acikhulupiro cakusiyana-siyana anakwanisa kutambira kubulukira m’Bhibhlya.” Lerini ndima padzulu pa tsamba 3, na perekani bruxura.
4. Kodi tinakwanisa tani kuphatisira bruxura towera kutomesa pfunziro ya Bhibhlya?
4 Kutomesa Pfunziro ya Bhibhlya: Tingacita ulendo wakubwerera, tisafunika kukumbusa mwanaciro nyumba pinthu pidalonga ife na kudinga ndima ibodzi peno ziwiri zakubverana na pinthu pyenepi, mbatiphatisira mibvunzo inagumanika kunkhomo kwa khundu inadinga ife. Peno khala pa ndzidzi unoyu tisafuna kupangiza bukhu yakuti Biblya Isapfunzisanji, panango tinakwanisa kuleri na mwanaciro nyumba tsamba yakumalisa ya bruxura, timpase bukhu pontho kubvunza kuti ndi misolo ipi inafuna iye kudziwa na kudinga pabodzi ndima ibodzi peno ziwiri pa nsolo unoyu udasankhula iye. Ife tonsene tisafunika kucita khundu mwakukwana mu kugawira bruxura ino nkati mwa nthanda ya Bingu!