Maminda Ali Kuchena Thangwi Pinthu Pyamala Kola
1. Kodi ndi basa ipi yakufunika yakuti iri kwenda kutsogolo?
1 Pakumala kupereka umboni kwa nkazi wa ku Samariya, Yezu alonga kwa anyakupfunzace: “thukulani maso, yanganani maminda ali kuchena thangwi pinthu pyamala kola.” (Jwau 4:35, 36) Basa yakubvuna kwa uzimu ikhaenda kutsogolo, na Yezu akwanisa kuona mwanyapantsi kuti basa ineyi mbidacitwa mu dziko yonsene yapantsi. Kubulukira ku mbuto yace kudzulu, Yezu akupitiriza kuphata basa ineyi yakubvuna. (Mat. 28:18,19) Kodi ndi ninji pinapangiza kuti basa ineyi ikuthimizirika munafika iyo kunkhomo?
2. Kodi ndi kuthimizirika kupi kunapangiza kuti basa yakubvuna mu dziko yonsene yapantsi ikuenda kutsogolo?
2 Kubvuna Mu Dziko Yonsene Yapantsi: Nkati mwa caka ca basa ca 2009, amwazi mphangwa athimizirika m’mapurusentu akukwana 3,2 mu dziko yonsene yapantsi. Madziko akuti basa yakumwaza mphangwa isakhondeswa kwathimizirikambo mapurusentu 14. Numero ya mapfunziro a Bhibhlya adaperekwa pa lipoti ya nthanda zonsene ndi akupiringana 7.619.000. Numero ineyi ndi ikulu kupiringana anyakumwaza mphangwa na yathimizirika pikwi pixanu kupiringana numero ya lipoti ya mapfunziro a caka ca 2008. Nakuti basa isathimizirika mwakucimbiza m’mbuto zizinji, madziko mazinji asaphemba amisionaryo adapfunza xikola ya Gileade. Maminda a pilongero pyakunja asabala misapo izinji m‘madziko mazinji. Pyenepi ndi cipangizo cakuti Yahova asacimbizisa basa mu ndzidzi uno wakumalisa kubvuna. (Iza. 60:22) Kodi muli na maonero adidi a “maminda” anu?
3. Kodi anango asanyerezeranji thangwi yakubvuna mu cisa cawo?
3 Kubvuna Mu Cisa Canu: Anango asalonga tenepa, “anthu a mu cisa canga nkhabe kutawira.” Ndimomwene kuti pisa pinango pisaoneka ninga pyakukhonda kubala misapo pingalandaniswa na pinango peno na midzidzi yakale. Na thangwi ineyi Mboni zinango zinakwanisa kunyerezera kuti kubvuna kwafika kunkhomo mu pisa pyenepi na basa inacitwa cincino ndi kulokotera anthu akucepa adasala basi. Kodi manyerezero anewa mbandimomwene?
4. Kodi ndi n’khaliro upi wadidi thangwi ya utumiki wathu wakuti tisafunika kukhala nawo, na thangwi yanji?
4 Kubulukira pakutoma mpaka kunkhomo, ndzidzi wakubvuna ndi ndzidzi wa basa kakamwe. Onani kucimbiza kunapangizwa m’mafala awa a Yezu: “Pinafuna kubvunwa mphizinji, mbwenye anyabasa achepa. Phembani mphapo mombamunda kuti atume pontho anyabasa anango, towera abvune pyonsenene.” (Mat. 9:37, 38, Mphangwa Zadidi) Yahova, Mbuya wakubvuna, ndiye anadziwa mbuto na ndzidzi wakubvuna. (Jwau 6:44; 1 Akor. 3:6-8) Kodi basa yathu ndi ipi? Bhibhlya isatawira: “Ndoko ukhabzwale mbeu yako na machibese, uibzwale pontho na mawulo.” (Koel. 11:4-6) Ande, pa ndzidzi wakuti kubvuna kukufika kunkhomo si ndzidzi wakupuma tayu!
5. Thangwi yanji tisafunika kupitiriza kumwaza mphangwa na mphinga mu cisa cakuti anthu asaoneka ninga akukhonda tawira?
5 Pitirizani Na Kubvuna: Ngakhale kuti cisa cathu cisaphatwa basa kazinji kene na anthu asaoneka ninga akukhonda tawira, pana mathangwi adidi toera kuphata basa mwaphinga na mwakucimbiza. (2 Tim. 4:2) Kucinja kwa makhaliro kunaoneka pa dziko kusacitisa anthu kucinjambo makhaliro awo mbanyerezera kakamwe pya ntsogolo. Pa ndzidzi wakuti aphale na atsikana akukula, iwo panango anapibva kuti asafuna kugumana citsidzikizo na ntendere m’manyerezero. Khama yathu panango inakwanisa kutundusa anthu anango. Ale akuti nee abvesera mphangwa mu ndzidzi wa nduli panango anabvesera ntsogolo. Ngakhale ale akuti mwakufuna asakhonda mphangwa zathu asafunika kucenjezwa.—Ezek. 2:4, 5; 3:19.
6. Khala cisa cathu ndi cakunensa, kodi ndi ninji cinafuna kutiphedza toera kukhala aphinga?
6 Khala cisa cathu ndi cakunensa, kodi ndi ninji cinafuna kutiphedza toera kukhala aphinga? Panango, kusiyapo kumwaza mphangwa nyumba na nyumba basi, tinakwanisa kuthimizira utumiki wathu mu kuphatisira njira zinango, ninga kuphatisira ntokodzi peno kumwaza mphangwa mu pisa pya malonda. Peno tinakwanisa kucinja maperekero athu umboni toera kuphatisira njira zipswa. Tinakwanisa kucinja ndandanda wathu toera kucita utumiki namaulo peno pa midzidzi yakuti anthu asagumanika panyumba. Panango tinasankhula kupfunza cilongero cipswa toera kufikira anthu azinji na mphangwa zadidi. Panango tinakwanisa kuthimizira utumiki wathu mu kukwata upainiya wa ndzidzi onsene. Peno tinakwanisa kucinja toera kwenda ku mbuto yakuti iri na anyabasa akubvuna akucepa. Khala tiri na maonero adidi thangwi ya basa yakubvuna, pingakwanisika ife tinadzawangisira toera kucita khundu mwakukwana m‘basa iyi yakufunika kakamwe.
7. Mpaka lini tisafunika kupitiriza na basa yakugumanyisa anthu?
7 Alimi ali na ndzidzi wakucepa toera kubvuna, natenepa iwo nee asafunika kupuma peno kulimira mpaka kumalisa basa. Basa yakubvuna mwauzimu isaphembambo kucimbiza kubodzibodzi. Mpaka lini tisafunika kupitiriza m‘basa ineyi yakugumanyisa anthu? Mu ndzidzi wa “kumala kwa pantsi [peno kwa makhaliro a pinthu, Tradução do Novo Mundo] mpaka “kumalisirathu.” (Mat. 24:14; 28:19) Ninga Ntumiki wankulu wa Yahova, tisafuna kumalisa basa idanyindirwa ife. (Jwau 4:34; 17:4) Tendeni tipitirize na utumiki wathu mwaphinga, mwakutsanzaya na makhaliro adidi mpaka kunkhomo. (Mat. 24:13) Kubvuna kusati mala!
[Ntsonga ikulu pa tsamba 2]
Kubulukira pakutoma mpaka kunkhomo, ndzidzi wakubvuna ndi ndzidzi wa basa kakamwe