Kunyerezera Mwacidikhodikho Pabodzi Na Kuphembera Ndi Kwakufunika Kwa Atumiki Aphinga
1. Kodi ndi ninji cidaphedza Yezu kukhonda peuswa ku basa yace yakutoma?
1 Yezu amala ndzidzi onsene wakumaulo mbakakonza anthu na kubulusa mademonyo. Mudagumanwa iye na anyakupfunzace mangwana mwace, iwo alonga: “Anthu onsene ali kukusaka,” mbamphemba kupitiriza na mabasa ace a mphambvu. Mbwenye, Yezu nee mbadapeuswa ku basa yace yakutoma ya kumwaza mphangwa zadidi. Iye aatawira: “Tendeni ku pisa pya chifupi towera ndipfundisembo kweneko; thangwi ya ipyo ndadza.” Kodi ndi ninji cidaphedza Yezu kuikha manyerezero ku basa yace? Iye akhadalamuka na kweru toera kuphembera na kunyerezera mwacidikhodikho. (Marko 1:32-39) Kodi kunyerezera mwacidikhodikho pabodzi na kuphembera kunatiphedzambo tani kukhala amwazi mphangwa aphinga?
2. Kodi ndi ninji pinafunika ife kunyerezera mwacidikhodikho pyakuti pinatiphedza kukhala a phinga mu utumiki?
2 Kunyerezeranji Mwacidikhodikho? Yezu akhaona kuti anthu ‘akhali mu umphawi ninga mabira anasowa nkumbizi.’ (Mat. 9:36) Mu njira ibodzibodzi, tisafunika kunyerezera kuti anthu asafuna kakamwe mphangwa zadidi. Tisafunika kuona kucimbiza kwa midzidzi inakhala ife. (1 Akor. 7:29) Tinakwanisa kunyerezera mabasa na makhaliro a Yahova, mwai wathu wakukhala Mboni za Yahova na mpfuma zakufunika kakamwe zauzimu zinapfunza ife kubulukira ku Mafala a Mulungu zakuti anthu azinji mu cisa cathu nkhabe kuzidziwa.—Sal. 77:11-13; Iza. 43:10-12; Mat. 13:52.
3. Kodi ndi ndzidzi upi unakwanisa ife kunyerezera mwacidikhodikho?
3 Kodi Ndi Upi Ndzidzi Wakunyerezera Mwacidikhodikho? Ninga mudacita Yezu, anango asalamuka na kweru. Anangombo asaona kuti mphyadidi kunyerezera mwacidikhodikho namasiku mbadzati kuenda kagona. (Gen. 24:63) Ngakhale kuti tiri na pinthu pizinji toera kucita, tinakwanisa kugumana ndzidzi toera kunyerezera mwacidikhodikho. Anango asanyerezera mwacidikhodikho munakwira iwo maximbombo. Pontho anango asaphatisira ndzidzi wakupuma pa basa namasikati toera kunyerezera mwakukhonda kudzudzumiswa. Azinji asaona kuti kunyerezera mwacidikhodikho mbadzati kutoma utumiki wa m’munda, ngakhale mu ndzidzi wakucepa, kusaaphedza kumwaza mphangwa mwaphinga na mwacipapo.
4. Thangwi yanji tisafunika kunyerezera mwacidikhodikho?
4 Kunyerezera mwacidikhodikho pabodzi na kuphembera kunadzawangisa cifuno cathu ca kutumikira Yahova, kunadzatiphedza kuona ulambiri wathu ninga cinthu cakufunika kakamwe mu umaso wathu na kunadzawangisa kutonga kwathu toera kupitiriza kumwaza mphangwa. Ntumiki Wankulu wa Mulungu, Yezu, aphindula kubulukira mu kunyerezera kwace mwacidikhodikho, na ife tinadzaphindulambo.