Utumiki Wathu Usadzindikirika Thangwi ya Kupirira
1. Yahova asapangiza tani kupirira kuna anthu?
1 Yahova asapangiza kupirira pakutsalakana anthu. (Eks. 34:6; Sal. 106:41-45; 2 Ped. 3:9) Citsandzo cikulu kakamwe cakupirira kwa Yahova cisapangizika m’basa yakumwaza Mphangwa za Umambo n’dziko yonsene yapantsi. Yahova asaphata basa na anthu mu pyaka cifupi na 2.000, pontho iye akupitiriza kukwewera anthu adidi toera kukhala na uxamwali na iye. (Jwau 6:44) Tinasangizira tani kupirira kwa Yahova mu utumiki wathu?
2. Tinapangiza tani kupirira pakuphata basa mu cisa cathu?
2 Utumiki wa Nyumba na Nyumba: Tisasangizira kupirira kwa Yahova mu kumwaza mphangwa “nee kupuma” mu cisa cakuti anthu adzati kupangiza cifuno. (Mach. 5:42) Mwakukhonda tsalakana, tisapirira kupwazwa, kusingirirwa na mipingizo mu utumiki wathu. (Mko. 13:12, 13) Tisapangizambo kupirira mukupitiriza na kuwangisira toera kuthirira mbeu za undimomwene, ngakhale kuti ndi kwakunentsa kugumana anthu anapangiza cifuno panyumba.
3. Thangwi yanji tisafunika kupirira pakucita ulendo wakubwerezera na pakucitisa pfundziro ya Bhibhlya?
3 Mapfundziro a Bhibhlya: Kukula kwa muti kusafunika kupirira. Tinakwanisa kuuthirira, mbwenye nee tinakwanisa kuucimbizisa kukula. (Tgo. 5:7) Mu njira ibodzi ene, kukula mwauzimu kusacitika mwa pang’ono pang’ono. (Mko. 4:28) Ale anapfundza na ife Bhibhlya angakwanise kuona kukhala kwakunentsa kusiya pikhulupiro pya uphemberi wa uthambi peno pidzolowero pyakukhonda bverana na Bhibhlya. Nee tisafunika kuyesera kucimbizisa kukula mwauzimu mu kukakamiza anyakupfundza athu toera kucinja. Kupirira ndi kwakufunika toera kugumana ndzidzi wakukwana kuti nzimu wa Mulungu uphate basa mu ntima wa nyakupfundza.—1 Akor. 3:6, 7.
4. Kupirira kunatiphedza tani toera kupereka umboni kwa acibale athu akukhonda khulupira?
4 Acibale Akukhonda Khulupira: Ngakhale kuti tisafuna na ntima wathu wonsene kuti acibale athu akukhonda khulupira apfundze undimomwene, tisapangiza kupirira tingadikhira ndzidzi wakuthema toera kucedza nawo pya cikhulupiro cathu, mbaticita mphole-mphole toera tikhonde kulonga mphangwa zakunjipa. (Koel. 3:1, 7) Mukupita kwa ndzidzi, citsandzo cathu cinadzapangiza kuti makhaliro athu ndi api mwakubverana na undimomwene, mbitipitiriza dzololo toera kulonga pya cikhulupiro cathu na ntima wakupfulika na cilemedzo cikulu. (1 Ped. 3:1, 15) Ndimomwenedi, utumiki unadzindikirika na kupirira unadzakhala wakuphindulisa pontho unadzakomeresa Baba wathu wa kudzulu.