Bokosi Ya Mibvundzo

◼ Ndi midida ipi ya Bhibhlya inalonga pyakuphatisira ntokodzi wa m’manja tingagumanika pa misonkhano Yacikristu na tingacita khundu mu utumiki?

“Pantsi Pano Pinthu Pyonsene Pina Midzidzi Yapyo.” (Koel. 3:1): Mitokodzi ya m’manja isapasa anthu mwai toera kulemba mphangwa, peno kulonga na anango mu ndzidzi onsene. Mbwenye pana midzidzi yakuti Akristu nkhabe funa kudzudzumiswa na mitokodzi yawo. Mwacitsandzo, misonkhano yathu ndi ndzidzi toera kulambira Yahova, kutambira cipfundziso cauzimu, na kubalangazana. (Deut. 31:12; Sal. 22:22; Arom. 1:11, 12) Tinakwanisa kufunga mitokodzi yathu tingafika pa misonkhano mbitiona mphangwa zathu pakumala kwa misonkhano? Khala nee tafunga ntokodzi wathu thangwi pana cinthu cakuti cisafunika kutsalakanwa mwakucimbiza kakamwe, tisafunika kubweza volume toera tikhonde kudzudzumisa anango.

‘Citani Pyonsene Thangwi Ya Mphangwa Zadidi.’ (1 Akor. 9:23): M’midzidzi inango, pana mathangwi adidi toera kuphatisira ntokodzi mu utumiki. Mwacitsandzo, m’bale anatsogolera nsoka anadzafuna kumenya ntokodzi toera kudziwa kuti anango akumwaza kupi mphangwa mu cisa. M’midzidzi inango, amwazi mphangwa asaphatisira mitokodzi yawo toera kulonga na munthu adapangiza cifuno peno nyakupfundza Bhibhlya mbadzati kucita ulendo wakubwereza, makamaka khala munthu unoyu asakhala kutali pang’ono. Khala tiri na ntokodzi wa m’manja, tisafunika kucita gaxu-gaxu toera ukhonde kutidzudzumisa mu ndzidzi unacedza ife na mwanaciro nyumba. (2 Akor. 6:3) Mu ndzidzi unadikhira ife amwazi mphangwa anango, mbuto mwakulonga pa ntokodzi peno kulemba mphangwa kuna axamwali athu, ndiye tani kuikha manyerezero athu mu utumiki na kutsalakana andzathu ali na ife m’basa ya m’munda?

Tsalakanani Anango. (1 Akor. 10:24; Afil. 2:4): Nee tisafunika kukhala a mphwayo mu kukhonda fika nakweru ku misonkhano ya basa ya m’munda, mbitinyerezera kuti ndzidzi onsene tinamenya ntokodzi peno kutumiza mphangwa kuna munthu toera kudziwa mbuto inamwazwa mphangwa. Tingafika mwakudembuka, kazinji kene nsoka usafunika usasanyirwe. Mwandimomwene, midzidzi inango mwakukhonda funa, makhaliro anaticitisa kufika mwakudembuka. Mbwenye tingakhala na nsambo wakufika nakweru, tisapangiza cilemedzo ku masasanyiro a Yahova, kuna m’bale anatsogolera nsoka, na kwa amwazi mphangwa andzathu.