Kodi Musafunisisa Kucinja?
1. Kucinja kwa pinthu mu dziko kusatiphemba toera kucitanji?
1 Pa 1 Akorinto 7:31, Bhibhlya isalandanisa dziko ninga kucinja-cinja kwa makhundu anacitwa na anthu m’matsendzo. Kucinja kwa pinthu mu dziko pisaphemba kuti ndzidzi onsene ticinje njira zathu zakumwaza mphangwa, na ndandanda wathu. Kodi musafunisisa kucinja?
2. Thangwi yanji tisafunika kucinja kuti titowerere gulu ya Yahova?
2 Njira Toera Kumwaza Mphangwa: Ndzidzi onsene mpingo Wacikristu usacinja njira zakupereka umboni. Mudatuma Yezu anyakupfundzace paulendo wakutoma, iye aapanga kuti akhonde kukwata cakudya peno kobiri mu pikhwama pyawo. (Mat. 10:9, 10) Natenepa, mu kupita kwa ndzidzi iye acinja pitsogolero thangwi ya kuidiwa kukhafuna kucitwa anyakupfundzace na kuthimizirika kwa basa yakumwaza mphangwa mu pisa pinango. (Luka 22:36) Mu pyaka dzana yakutoma, gulu ya Yahova isaphatisira njira zakusiyana-siyana zakumwaza mphangwa, mwacitsandzo—matsamba makulu akupereka umboni, maprogramu a pa radio, miotokala ya mitcini ya kugaluza mafala—mwakubverana na pire pikhafunika pa ndzidzi unoyu. Lero, nakuti anthu azinji nkhabe kugumanika mu nyumba zawo, kusagomezerwa kakamwe toera kuthimizira utumiki wathu wa nyumba na nyumba mu kupereka umboni wapakweca na wantsusukano. Tisawangiswambo toera kuenda nyumba na nyumba nakumaulo khala anthu asagumanika kubasa namasikati. Munazungunuka gareta yakudzulu ya Yahova, kodi imwe musaitowerera?—Zak. 1:20, 21.
3. Kucinja kusatiphedza tani toera kupereka mwadidi umboni mu cisa cathu?
3 Maperekero Aumboni: Ninji pinadzudzumisa anthu a mu cisa canu? Mpfuma? Banja? Uphanga? Mphyakuphindulisa kudziwa nyatwa na makhaliro akudziwika a mu cisa cathu toera tikhunganyike maperekero aumboni akuthema. (1 Akor. 9:20-23) Anaciro nyumba angalonga pinthu pinaadzudzumisa, mbuto mwa kulonga midida inadziwa ife mbatipitiriza na maperekero aumboni adakhunganyika ife, mphyadidi kakamwe kucinja maperekero aumboni mwakubverana na pinthu pinaadzudzumisa.
4. Thangwi yanji tisafunika kucinja mwakucimbiza?
4 Mwakukhonda dembuka matsendzo a dziko ino anadzamala, pontho nyatwa ikulu inadzatoma. ‘Ndzidzi udasala ndi ung’ono.’ (1 Akor. 7:29) Mphyakufunika kakamwe kucinja mwakucimbiza, toera ticite pizinji mu ndzidzi wakucepa udasala!