Njira Zipswa Zakupereka Umboni Wapakweca

1. Ndi citsandzo cipi cidakhazikisa Akristu a pyaka dzana yakutoma?

¹ Akristu a pyaka dzana yakutoma acita pizinji kusiyapo kumwaza mphangwa nyumba na nyumba. Iwo aperekambo umboni wapakweca. (Mach. 20:20) Mwacitsandzo, iwo akhaenda ku templo toera kugumana anthu azinji. (Mach. 5:42) Mu ndzidzi ukhali Paulu ku Atena, iye akhamwaza mphangwa ntsiku zonsene m’mbuto zamalonda. (Mach. 17:17) Lero, njira yathu yakutoma toera kumwaza mphangwa zadidi ikupitiriza kukhala utumiki wa nyumba na nyumba. Kusiyapo njira ineyi, tisamwazambo mphangwa m’mbuto zakukoyera miotokala, zamalonda, maparki, m’miseu mikulu ya mu nzinda na mbuto zinango na cifuno ca cakumwaza mphangwa konsene kunagumanika anthu. Nakuti amwazi mphangwa onsene asawangiswa toera kupereka umboni wapakweca m’mbuto zakukwanisika, azinji anadzakhala na mwai wakucita khundu mu njira ziwiri zipswa zakupereka umboni wapakweca.

2. Ndi njira ipi yakupereka umboni idatoma mu nthanda ya Bingu ya 2011?

² Umboni Wapakweca M’mizinda Yakuti iri na Anthu Azinji: Ninga pyalembwa mu Anuário das Testemunhas de Jeová de 2013 matsamba 16 na 17, njira zipswa zakupereka umboni wapakweca zatoma mu nzinda wa Nova York mu caka ca 2011 mu nthanda ya Bingu. Meza na makarinya akubalikiswa mwadidi toera kuikha mabukhu a pilongero pyakusiyana-siyana akuti akhaikhwa m’mbuto za mizinda zakupita anthu azinji anafamba na miyendo. Ntsiku zonsene pikwi pya anthu asafamba, mbapita na mbuto ineyi, kuphataniza azinji anakhala nyumba zakuti zisayang’anirwa na ale akuti kazinji kene nkhabe gumanika panyumba. Maphindu akhali akuti azinji apangiza cifuno ku mabukhu athu. Mu nthanda ibodzi basi kwa gawirwa marevista 3.797 na mabukhu 7.986. Azinji akhagwanda na njira akhaphemba pfundziro ya Bhibhlya. Nakuti cifuno cikulu cikhali kutomesa mapfundziro a Bhibhlya, mbuto zonsene zikhasiyiwa na ale akhapangiza cifuno zikhatumizwa mwakucimbiza ku mpingo wacifupi toera kuthimizira cifuno ca munthu unoyu.

3. Kodi njira ineyi ikumwazika tani?

³ Nakuti njira ineyi isabweresa maphindu, cincino ikumwazikambo mu dziko yonsene yapantsi m’mbuto zinango zakuti iri na anthu azinji. Ofesi ya filiali inadzaona kuti ndi mizinda ipi yakuti mbidaphindula na njira ineyi. Kazinji kene, ineyi ndi mizinda yakuti iri na miotokala mizinji, maofesi peno nyumba zizinji, pontho anthu azinji asafamba na miyendo. Natenepa, ofesi ya filiali inadzapita n’cibverano na mipingo inafuna kucita khundu na kupereka pitsogolero. Kazinji kene anaphatisirwa ndi apainiya a ndzidzi onsene na akupambulika, ngakhale kuti m’mbuto zinango apainiya akuphedza anakwanisambo kucita khundu m’basa ineyi.

4. Kodi basa ineyi yakupambulika isacitwa tani?

⁴ Umboni Usaperekwa Tani: Ale anacita khundu m’basa ineyi yakupambulika kazinji kene asadikhira munthu abwere cifupi na meza peno karinya. Munthu angafendedzera cifupi, iye asamphemba toera akwate bukhu inakomerwa na iye. Mwakukomerwa apainiya asatawira mibvundzo yonsene kubulukira m’Malemba. Khala munthu akwata bukhu, apainiya nee asalonga pya masasanyiro a cakupereka. Mbwenye khala munthu asafuna kudziwa kuti basa yathu isaphedzerwa tani, iwo anakwanisa kufokotoza kuti pyakupereka pisatumizwa ku mbuto zinagumanika m’bukhu. Pingakwanisika iwo asabvundza: “Musafuna munthu toera akucedzereni kunyumba kwanu?” peno “Musadziwa kuti tisagawirambo mapfundziro a Bhibhlya akukhonda lipa kubulukira m’bukhu ineyi?”

5. Ndi maphindu api adakhala na anyakumanga banja mu kucita khundu m’basa ineyi?

⁵ Kucita basa ineyi kwakhala kwakuphindulisa kakamwe. Anyakumanga banja anango alemba: “Kuimira pa meza na kuona ntsiku zonsene pikwi pya anthu mbagwanda pa mbuto ineyi kwakhuya mitima yathu kuti basa ikulu ikucitwa toera kulonga na anthu onsene pa dziko yapantsi. Kuona mwinji unoyu wa anthu na kunyerezera kuti Yahova mwandimomwene asatsalakana tani munthu payekha kwawangisa cifuno cathu toera kupitiriza kuikha pa mbuto yakutoma basa yakumwaza mphangwa mu umaso wathu. Tanyerezera kuti Yahova asadinga mitima yonsene ya ale anapita cifupi na meza mbakasaka ale akuthema. Pontho tapibva ninga tiri kuphedziwa na aanju.

6. (a) Ndi masasanyiro api anango aumboni wapakweca akucitwa m’mipingo mizinji, na ndi akusiyana tani na umboni wapakweca m’mizinda yakuti iri na anthu azinji? (b) Kodi mipingo inabverana tani pakupereka umboni wapakweca?

⁶ Umboni Wapakweca Wakukhunganywa pa Mpingo: Kusiyapo basa yakupambulika ya umboni wapakweca, masasanyiro mapswa akucitwa na misoka ya akulu a mpingo toera kupereka umboni wapakweca mu pisa pyawo. Mwa masasanyiro anewa, amwazi mphangwa asaphatisira meza peno karinya m’mbuto zinapita na anthu azinji m’madire a pisa pya mpingo. Pyenepi ndi pyakusiyana na basa yakupambulika ya umboni wapakweca m’mizinda yakuti iri na anthu azinji, yakuti amwazi mphangwa asabuluka m’mipingo mizinji toera kumwaza mphangwa m’mbuto ibodzi ya mwinji wa anthu mu nzinda udasankhulwa na ofesi ya filiali.​—Onani bokosi “Kubverana Ndi Kwakufunika.”

7. M’mbuto zakuti ndi zakuthema, kodi akulu a mpingo anacita tani masasanyiro toera kupereka umboni wapakweca pa cisa?

⁷ Akulu a mpingo anadzadinga pabodzi khala pisa pya mpingo piri na mbuto zakuti ziri na anthu azinji, mbatonga khala ndi pyakuthema kucita masasanyiro akupereka umboni wapakweca. Meza peno karinya isafunika kuikhwa m’mbuto zakuthema zakuti ziri na miotokala mizinji, mbuto zamalonda, maparki, miseu mikulu, maloja mang’ono, maxikola, mbuto zinaphama ndeka, na mbuto zinacitirwa misonkhano ya dziko. Pana phindu yakuikha meza pa mbuto ibodzi ene, mu ntsiku zibodzi zene, na m’midzidzi ibodzi ene. Pisaoneka kuti meza zinaikhwa m’maloja mang’ono zisabweresa maphindu kakamwe kusiyapo zire zinaikhwa pa mbuto yakuti pana loja ibodzi ikulu, mbuto zakuti kazinji kene anthu asaikha manyerezero awo toera kupita loja ineyi basi. Mbuto zinango, ninga zinafamba anthu na miyendo, zinakhala zakuphedza kakamwe kuphatisira karinya ing’ono toera kuikhira mabukhu. Akulu a mpingo anakwanisa kucita download mu Web site yathu maarkivo akupambulika toera kuikha marevista A Sentinela na Despertai! na bukhu Biblya Isapfunzisanji. Maarkivo anewa asasanywa basi ene toera kuaphatisira pakupereka umboni wapakweca. Ale anacita khundu anadzacita basa mu njira ibodzi ene ninga ale anaphata mizinda yakuti iri na anthu azinji, pontho asafunika kutowezera pitsogolero pya muyang’aniri wa basa ya m’munda. Iwo angapaswa mbuto na munthu adapangiza cifuno wakuti nee asakhala mu cisa cawo, mwakucimbiza, iwo asafunika kulemba pa formularyu Queira Visitar (S-43) mbapasa mulembi wa mpingo.

8. Khala m’mpingo mwanu nkhabe masasanyiro toera kupereka umboni wapakweca, kodi ndi miyai ipi iripo toera kupereka umboni wapakweca?

⁸ Umboni Wapakweca mu Utumiki Wanu: Panango, mipingo inango nkhabe mbuto mu cisa cawo zinagumanika anthu azinji akufamba na miyendo toera kuphatisira meza peno karinya ing’ono yakuikhira mabukhu. Natenepa, ngakhale m’mipingo ineyi, amwazi mphangwa asawangiswa toera kupereka umboni wapakweca mu utumiki wawo. Kodi mu cisa canu muli na maloja akuti asadzala anthu? Muli na parki peno mbuto zakuti anthu asagumanika pabodzi pene? Muli na mbuto zakuti zisacitirwa misonkhano ya dziko? Khala ndi tenepo, pitirizani kupereka umboni wapakweca.

9. Thangwi yanji tisafunika kunyerezera kumwaza mphangwa konsene kunagumanika anthu?

⁹ Ndi cifuno ca Yahova kuti ‘anthu onsene apulumuke, adziwembo mapfundzisiro adidi.’ (1 Tim. 2:4) Natenepa, tisayesera kulonga na anthu azinji pya mphangwa za Umambo, kumala mbakudzati kufika. (Mat. 24:14) M’mbuto zizinji ndi kwakunentsa kugumana anthu panyumba. Mbwenye, tinakwanisa kulonga nawo mu ndzidzi wakuti iwo nee ali panyumba m’mbuto zapakweca. Panango, umboni wapakweca ndi njira ibodzi basi yakuti anthu anango anadzakhala na mwai wakubva mphangwa zadidi. Na thangwi ineyi, tinakwanisa kukwanirisa utumiki wathu mu kumwaza mphangwa konsene kunagumanika anthu.​—2 Tim. 4:5.

[Bokosi pa tsamba 5]

Kubverana Ndi Kwakufunika

Pyalongwa kuti midzidzi inango amwazi mphangwa a mipingo yacifupi asapereka umboni wapakweca mu nseu ubodzi ene, m’mbuto ibodzi ene yakukoyera miotokala, ya malonda peno mbuto zakunjipa miotokala. Amwazi mphangwa a mipingo yakusiyana asagawira marevista pa mbuto ibodzi ene, mu sala yakudikhira, peno asamwaza mphangwa m’mbuto zibodzi zene za malonda. Midzidzi inango, pyenepi pisacitisa anyamalonda na anyakuendekana kukhala akuipirwa, ngakhale kuti amwazi mphangwa nee akucita basa mu ndzidzi ubodzi ene. Natenepa, mphyadidi kuphata basa mu cisa ca mpingo wanu mu ndzidzi unapereka imwe umboni wapakweca.

Khala amwazi mphangwa asafuna kupereka umboni wapakweca mu cisa ca mpingo wacifupi, iwo asafunika kulonga na muyang’aniri wa basa ya m’munda. Iye anapita n’cibverano na muyang’aniri wa basa ya m’munda wa mpingo unango toera kutawiriswa. Mipingo ya pilongero pyakusiyana yakuti isamwaza mphangwa mu cisa cibodzi cene, ayang’aniri a basa ya m’munda asafunika kupita n’cibverano toera kucalira kucitisa anthu kuipirwa. Mu kubverana mwadidi, pinthu pyonsene ‘pinacitwa mwakuthema na mwakundendemera.’​—1 Akor. 14:40, Chibverano Chachinchino.