Ncemerero Wakupambulika
1. Kodi kampanya yakugawira micemerero ya misonkhano ya 2014 inadzatoma lini?
1 Nyerezerani kuti musafuna kuphikira axamwali anu peno acibale anu cakudya cakupambulika, cakuti musafunika kuwangisira kakamwe toera kucikhunganya, mwakukhonda penula munakhala wakugalamuka kakamwe pa kuacemera. Munjira ibodzi ene, basa izinji ikucitwa toera kukhunganya phwando yauzimu inafuna kudzaperekwa pa misonkhano ya gawo na ya dziko yonsene mu caka 2014. Masumana matatu mbudzati kufika nsonkhano wathu wa gawo tinadzakhala na mwai wakucemera anango toera kugumanika pa nsonkhano. Ninji pinafuna kutiphedza toera kukhala akugalamuka pa kucemera anango?
2. Ninji cinafuna kutikulumiza toera kucita khundu mwakukwana mu kampanya?
2 Kunyerezera mwadidi kuti anthu asaphindula tani na phwando yauzimu inapereka Yahova pa misonkhano yathu ya gawo, kunatikulumiza toera kucita khundu mwakukwana mu kampanya. (Iza. 65:13, 14) Tisafunikambo kukumbukira kuti kampanya inacita ife pacaka isabweresa maphindu. Anango anafuna ife kucemera anadzagumanika pa nsonkhano pabodzi na ife. Mwakukhonda tsalakana kuti mbangasi anafuna kugumanika, kuwangisira kwathu mu ndzidzi wa kampanya kunadzasimba Yahova na kupangiza kupasa kwace mwakudzala manja.—Sal. 145:3, 7; Apok. 22:17.
3. Tinadzagawira tani micemerero?
3 Nsoka ubodzi na ubodzi wa akulu a mpingo unadzaona kuti mpingo unakwanisa tani kugawira micemerero mu cisa consene, kuphatanizambo pitsogolero pya kusiya micemerero pa nyumba zinakhonda kugumanika anthu peno kuigawira pakupereka umboni m’mbuto zapakweca mu cisa ca mpingo. Pakumala kwa sumana tisafunika kugawira marevista pabodzi na micemerero, khala ndi pyakuthema. Sabudu yakutoma ya nthanda ingakhala pakati pa kampanya, tisafunika kugomezera kugawira micemerero, mbuto mwa kutomesa mapfundziro a Bhibhlya. Pakumala kwa kampanya, tinadzakomerwa kudziwa kuti tawangisira kakamwe toera kukhala akugalamuka pa kucemera anthu azinji toera kugumanyikana na ife pa phwando yauzimu idakhunganya Yahova!