Bokosi Ya Mibvundzo

◼ Kodi Ana Asafunika Kupfundzanji Toera Akwanise Kukola Mwauzimu?

Anyakubala Acikristu asacita pizinji toera kukuza anawo mwakubverana na ‘cipfundziso na citsogolero ca Yahova.’ (Aef. 6:4.) Mwacitsandzo, anyakubala asaona kuti mphyakuphindulisa kudinga lemba ya ntsiku pabodzi na anawo ntsiku zonsene namacibese. Nkati mwa kulambira kwa banja na midzidzi inango, mabanja asaona mbacedza pya vidyu idaona iwo, kucedza pya ntsonga zakufunika za misolo ya bukhu Os Jovens Perguntam, kuyesera cakucitika ca m’Bhibhlya, peno kukhala na makhundu akuyesera. Mbwenye toera ana ‘athambaruke mbakola mwauzimu,’ asafunikambo kupfundziswa undimomwene wakuzika wa Bhibhlya.​—Aheb. 6:1.

Nyerezerani pinthu pinapfundzisa ife anthu anagumana ife mu cisa cathu. Paulendo wakutoma na wakubwereza, tisawangisira toera kutomesa pfundziro ya Bhibhlya mu kuphatisira bukhu Biblya Isapfunzisanji. Tingamalisa bukhu ineyi, tisaphatisira bukhu ‘Khalani Mu Ufuni Wa Mulungu.’ Thangwi yanji? Bukhu Biblya Isapfunzisanji isaphedza anyakupfundza toera kukhala na cidziwiso cakutoma ca Bhibhlya. Bukhu ‘Mu Ufuni Wa Mulungu’ isaaphedza toera kuphatisira midida ya Bhibhlya mu umaso wawo wa ntsiku na ntsiku. Kupfundza mabukhu mawiri ene kusaphedza anthu apswa toera kukhala na ‘mitcitci’ yakuwanga mwa Kristu, na ‘cikhulupiro cakuwanga.’ (Akol. 2:6, 7) Kodi mphangwa zenezi zinaphedzambo anathu tayu? Iwo asafunikambo kupfundziswa pya ciomboli, Umambo wa Mulungu, na makhaliro a anyakufa. Ana asafunikambo kudziwa thangwi yanji Mulungu asalekerera nyatwa, na anakwanisa tani kudzindikira ntsiku zakumalisa za makhaliro ano a pinthu. Asafunika akhale na cinyindiro cakuti Mboni za Yahova ziri na undimomwene. Aphale na atsikana asafunikambo kubvesesa midida ya Bhibhlya na kudziwa kuti anapfundzisa tani ‘luso yawo yakunyerezera.’ (Aheb. 5:14) Mwandimomwene, anyakubala asafunika kudinga thunga na luso yakubvesesa kwa anawo. Mbwenye ana azinji ali na luso yakupfundza pinthu pyakuzika pya undimomwene wa Bhibhlya, ngakhale kuti ndi ang’ono.​—Lk. 2:42, 46, 47.