Tinaphedza Tani Ale Akuti Nkhabe Kwanisa Kuleri Mwadidi?

1. Ndi pinentso pipi pinaoneka pa kupfundzisa Bhibhlya anthu akuti nkhabe kwanisa kuleri mwadidi?

¹ Anaciro nyumba akuti nkhabe kwanisa kuleri mwadidi panango ali na cifuno ku pinthu pyauzimu, mbwenye ananentseka na Bhibhlya peno mabukhu anango. Kugawira bukhu Biblya Isapfunzisanji kwa anthu anewa, makamaka paulendo wakutoma, panango nee kunabweresa maphindu adidi. Tinakwanisa tani kuaphedza mwauzimu? Tabvundzisa amwazi mphangwa a m’madziko 20 toera kudziwa pinacita iwo. Maonero awo asagumanika pantsi apa.

2. Ndi mabukhu api alipo toera kuphedza munthu wakuti nkhabe kwanisa kuleri mwadidi?

² Khala nyakupfundza nkhabe kwanisa kuleri mwadidi peno nkhabe kwanisa kuleri, munakwanisa kutoma na bruxura Bverani Mulungu, peno Bverani Mulungu toera Mukhale Kwenda na Kwenda. Mpainiya unango wa ku Estados Unidos asapangiza munthu mabruxura mawiri ene, mbabvundza kuti ndi ipi idakomerwa na iye kakamwe. Ofesi ya filiali ku Keniya yalonga kuti mabruxura anewa asaphedza kakamwe kweneku, thangwi mu pisa pya Afrika, anthu asapfundziswa kubulukira mu kucedza pya mbiri za pyakucitika, tayu kubulukira ku mibvundzo na matawiro. Ngakhale kuti munthu adapfundza asakomerwa kuleri na kutawira mibvundzo, njira ineyi yakupfundzisa inacitisa munthu adapfundza pang’ono kukhonda kupibva mwadidi. Khala nyakupfundza asakwanisa kuleri pang’ono, amwazi mphangwa azinji asatoma mu kuphatisira mabruxura Mphangwa Zadidi Za Mulungu!, Munakwanisa Kukhala Xamwali Wa Mulungu!, peno Bukhu Yanga Ya Mbiri Za Bibilya.

3. Ndi udziwisi upi wakuti unatiphedza toera kupfundzisa ale akuti nkhabe kwanisa kuleri?

³ Simbani: Ale akuti nkhabe kwanisa kuleri panango anakhala na manyadzo, pontho azinji asapwazika okhene. Kuaphedza toera kupibva mwadidi, kazinji kene ndi cinthu cakutoma toera kuapfundzisa undimomwene. Anthu azinji akuti nkhabe kwanisa kuleri ndi akufewa nsolo, pontho anakwanisa kupfundza kuleri. Natenepa, pangizani cilemedzo cakuthema kwa iwo, mbamuatsalakana mwadidi. (1 Ped. 3:15) Angaona kuti kuwangisira kwawo ndi kwakuphindulisa, pontho kuti akuthambaruka mwauzimu, iwo anadzakulumizika toera kupitiriza kupfundza. Natenepa, asimbeni na ntima onsene.

4. Tinakwanisa tani kuwangisa ale akuti nkhabe kwanisa kuleri toera kukhunganyika pfundziro?

⁴ Ngakhale kuti nyakupfundza nkhabe kwanisa kuleri mwadidi, muwangiseni toera akhunganyike pfundziro yace. Amwazi mphangwa anango ku Afrika Wakubangwe asawangisa anyakupfundza awo toera kuphemba ciphedzo ca acibale peno axamwali awo akuti anakwanisa kuaphedza. M’mwazi mphangwa ku Britanya, asapereka bukhu yace kuna nyakupfundza wace pakudinga naye ndima zingasi toera aone kuti kukhunganyika kusaphedza kakamwe kugumana matawiro khala aikhwa nthemba. Pyenepi pisawangisa anyakupfundza toera kukhunganyika. M’bale unango ku Indiya, asawangisa anyakupfundzace toera kudinga mwanyapantsi pithundzithundzi pya pfundziro ya sumana inafuna kudza, na kunyerezera mwacidikhodikho.

5. Tinapangiza tani kupirira pakucitisa pfundziro?

⁵ Khalani Wakupirira: Mwakukhonda tsalakana bukhu inaphatisira imwe, ikhani manyerezero pa ntsonga zakufunika, mbamuphedza nyakupfundza wanu toera kuzibvesesa mwadidi. M’maulendo akutoma, panango mphyadidi kucedza m’mphindi 10 mpaka 15. Lekani kuyesera kudinga mphangwa zizinji, panango mphyadidi kudinga ndima zingasi paulendo ubodzi. Khala nyakupfundza nee asaleri mwakuthamanga, khalani wakupirira. Iye anadzakulumizika toera kuthimizira luso yace yakuleri mu ndzidzi unakulisa iye uxamwali wace na Yahova. Toera kuphedza nyakupfundza wanu kuti acite pyenepi, mphyadidi kumphemba toera agumanike pa misonkhano ya mpingo.

6. Tinakwanisa tani kuphedza anthu toera kupfundza kuleri?

⁶ Nyakupfundza Bhibhlya angapfundza kuleri, mwakucimbiza anakwanisa kuthambaruka mwauzimu. (Sal. 1:1-3) Azinji aphedza anyakupfundza awo mu kuphatisira bukhu yakuti Dzolowerani Kuleri na Kulemba m’mphindi zingasi pakumala kwa pfundziro ibodzi na ibodzi. Nyakupfundza angafewa manungo, panango munakwanisa kumpasa cinyindiro mu kumpangiza cinthu cidakwanisa iye kupfundza. Mpaseni cinyindiro cakuti Yahova anadzapasa nkhombo kuwangisira kwace, pontho muwangiseni toera kucita phembero. (Mis. 16:3; 1 Jwau 5:14, 15) Amwazi mphangwa anango ku Britanya asawangisa anyakupfundza awo toera kukhazikisa pifuno pyakulinganira pyakuti pinaaphedza toera kuthambaruka​—ninga, pakutoma kudziwa maletra, buluka penepo, kudziwa kusaka na kuleri malemba, pakumalisira, kuleri mabukhu akubuluswa m’Bhibhlya adathumburuzwa munjira yakukhonda nentsa. Kuphedza anthu toera kupfundza kuleri, kazinji kene kusaphataniza kuaphedza toera kukhala na cifuno ca kucita pyenepi, tayu basi kuapfundzisa kuti anacita tani.

7. Thangwi yanji nee tisafunika kulangalira kumwaza undimomwene kwa ale akuti nkhabe kwanisa kuleri mwadidi?

⁷ Yahova nkhabe kupwaza anthu akuti nee apfundza kakamwe. (Yob. 34:19) Yahova asayang’ana ntima wa munthu. (1 Pya dziko. 28:9) Natenepa, lekani kulangalira kumwaza undimomwene kwa ale akuti nkhabe kwanisa kuleri mwadidi. Imwe muli na mabukhu mazinji akuti munakwanisa kuaphatisira toera kutoma nawo. Pakumalisira, munakwanisa kucinja bukhu toera kuphatisira bukhu Biblya Isapfunzisanji mbamumphedza kuti akhale na cidziwiso cakuthimizirika ca Bhibhlya.