Towezerani Citsandzo Ca Aprofeta—Sofoniya
1. Kodi Sofoniya atumikira ninga mprofeta pantsi pa makhaliro api? Ndi citsandzo canji cadidi cidakhazikisa iye kwa ife?
1 Ndi pakati pa pyaka madzana manomwe M. N. W., ulambiri wa Baale ukhacitwa pakweca mu Yuda. Amoni, Mambo wakuipa akhadamala kwene kuphiwa, mbwenye Mambo wamphale Yosiya ndiye akhatonga. (2 Pya dziko. 33:21–34:1) Mu ndzidzi unoyu, Yahova asankhula Sofoniya toera kudziwisa mphangwa za kutonga Kwace. Ngakhale kuti Sofoniya akhali wa dzindza ya atongi a Yuda, iye nee afewesa mphangwa za kutonga kwa Yahova kukhafuna iye kucita kuna atsogoleri a Yuda. (Sof. 1:1; 3:1-4) Munjira ibodzi ene, ife tisawangisira toera kusangizira cipapo ca Sofoniya, na kucalira kuti acibale akhonde kupingiza kulambira kwathu Yahova. (Mat. 10:34-37) Ndi mphangwa zipi zidamwaza Sofoniya, na ndi maphindu api adakhala na iye?
2. Tisafunika kucitanji toera kupulumuswa pa ntsiku ya kuipirwa kwa Yahova?
2 Sakani Yahova: Basi ene Yahova ndiye anakwanisa kupulumusa anthu pa ntsiku yakuipirwa kwace. Natenepa, Sofoniya akulumiza anthu a ku Yuda toera kusaka Yahova, kusaka cilungamo, na kusaka kucepeseka ndzidzi mbuciripo. (Sof. 2:2, 3) Pyenepi ndi sawasawa lero. Ninga Sofoniya, ife tisawangisa anthu toera kusaka Yahova, mbwenye ife ene tisafunikambo kucita pibodzi pyene, mbatikhala akutonga toera kukhonda ‘kuthauka mu kutowerera Yahova.’ (Sof. 1:6) Mbuto mwace, ife tisasaka Yahova kubulukira mu kupfundza mwacidikhodikho Mafalace, na kucita phembero toera kuphemba citsogolero cace. Ife tisasaka cilungamo kubulukira mu kukhala na umaso wa makhaliro adidi na wakucena. Tisasaka kucepeseka kubulukira mu kukulisa maonero akungonjera, na kubvera na ntima onsene pitsogolero pya gulu ya Yahova.
3. Thangwi yanji tisafunika kupitiriza kupangiza maonero akulinganira mu utumiki?
3 Maphindu Adidi: Mphangwa za kutonga zidamwaza Sofoniya zakulumiza anthu anango mu Yuda, makamaka mphale Yosiya, wakuti atoma kusaka Yahova mbaciri mwana. Mukupita kwa ndzidzi, Yosiya acita kampanya ikulu kakamwe toera kufudza ulambiri wa adzimunthu mu dziko ya Yuda. (2 Pya dziko. 34:2-5) Lero, maseze mbeu zinango za Umambo zisagwa nkhundu mwa njira, pamwala, peno pakati pa minga, zinangombo zisagwa pa mataka adidi mbazibala misapo. (Mat. 13:18-23) Ife tisanyindira kuti Yahova anadzapitiriza kupasa nkhombo kuwangisira kwathu munapitiriza ife kukhala aphinga m’basa yakumwaza mbeu za Umambo.—Sal. 126:6.
4. Thangwi yanji tisafunika ‘kudikhira Yahova na cifuno cikulu’?
4 Ayuda anango akhanyerezera kuti Yahova cipo mbadacita pinthu. Mbwenye Yahova akhadalonga kuti ntsiku yace ikulu ikhali cifupi. (Sof. 1:12, 14) Basi ene ale adasaka kuthawira kuna Yahova ndiwo akhafuna kupulumuswa. (Sof. 3:12, 17) ‘Munadikhira ife Yahova na cifuno cikulu,’ tendeni tikomerwe mu kukhala akuphatana na anyakukhulupira andzathu mu kulambira Mulungu wathu wankulu!—Sof. 3:8, 9.