Phedzani Aboliboli Kupfundza Pya Yahova
1. Kodi Yezu apangiza tani ntsisi kuna aboliboli?
1 Zikhadasala ntsiku zingasi toera Yezu aphiwe. Mukhabuluka iye mu nzinda wa Yeriko, aboliboli awiri anyakuphemba-phemba akhuwa: ‘Mbuya, tibverenimbo ntsisi!’ Maseze Yezu akhanyerezera pya nyatwa zikhafuna thimbana na iye, alimira mbaacemeresa na kuawangisa. (Mat. 20:29-34) Tinatowezera tani ntsisi zidapangiza Yezu kuna aboliboli?
2. Tinapereka tani umboni kuna boliboli anagumana ife m’mbuto zakuti ziri na anthu azinji?
2 Khalani Nyakuphedza: Mungagumana boliboli, panango m’mbuto zakuti ziri na anthu azinji, ndziwiseni kuti ndimwe ani na perekekani toera kumphedza. Nakuti kazinji kene asakhala anthu akupwaziwa, panango pakutoma ananyinyirika. Mbwenye, makhaliro anu auxamwali na cifuno candimomwene panango pinancitisa kutawira mwakukhonda nentsa. Pontho, kumbukani kuti pana mitundu yakusiyana-siyana ya uboliboli na pyenepi pinadzakupasani maluso akuti munamphedza tani. Mungamala kumphedza, munakwanisa kundziwisa kuti mukucita basa yakupfundzisa Bhibhlya. Muleririni lemba ninga ya Masalmo 146:8 peno Izaiya 35:5, 6. Khala iye asaleri Cibraile, mbvundzeni khala asafuna bukhu ya Cibraile yakuti inadzamphedza kupfundza pizinji thangwi ya Bhibhlya. Munakwanisambo kumphedza toera akhale na maaudyo a mu jw.org. Khala ntcini wace wandzeru uli na programu yakuleri na kubulusa mafala (leitor de tela), panango iye anakomerwa na misolo ya mabukhu athu anagumanika mu jw.org akuti anakwaniswa kucitwa download mu RTF (Rich Text Format).—Onani bokosi “Pakuphedza Boliboli . . . ”
3. Tinasaka tani aboliboli n’cisa cathu?
3 Sakani Aboliboli: Kazinji kene ife nee tisagumana aboliboli mu utumiki wa nyumba na nyumba thangwi azinji a iwo nee asapibva mwadidi kulonga na alendo angafika pa nyumba pawo. Natenepa, tisafunika kuwangisira kakamwe ‘kusaka’ anthu anewa toera kuamwazira mphangwa. (Mat. 10:11) Kodi muli na ndzanu wakubasa peno wakuxikola wakuti ndi boliboli? Cedzani naye. Khala n’cisa canu muli na xikola ya aboliboli, phembani toera kuikha mangasi a mabukhu athu a Cibraile m’bhibhliyoteka ya xikola. Pana munthu anadziwa imwe wakuti ali na wacibale wa boliboli? Kodi n’cisa canu muli na pigawiko pinaphedza aboliboli peno pinapereka ciphedzo ca nyumba kwa aboliboli? Longani na wacibale wace, nyakutambira alendo peno muyang’aniri kuti Mboni za Yahova zisafuna kakamwe kuphedza aboliboli na perekekani toera kubweresa mabukhu a Cibraile peno maaudyo. Mpangizeni pikiro ya Bhibhlya yakuti mwakukhonda dembuka Mulungu anadzamalisa uboliboli kwenda na kwenda. Munakwanisambo kupangiza vidyu ya mu jw.org ya nsolo wakuti “Sem ela, eu me sentiria perdido,” inalonga pya mamuna wakuti aphindula thangwi yakukhala na Bhibhlya mu Cibraile. Mukulonga cifuniro ca ulendo wanu, panango munafungula njira toera kucedza na boliboli m’bodzi na m’bodzi.
4. Kodi cakugumanikana naco ca Janet cisatipfundzisanji?
4 Mulongo Janet wakuti ndi boliboli aenda kacedzera aboliboli anakhala nyumba zinatsalakanwa aboliboli. Iye atoma kucedza na ntsikana. Janet ampanga, “Yezu awangisa aboliboli toera kupangiza pinafuna kudzacita iye kuna aboliboli onsene.” Iwo adinga pabodzi Apokalipse 21:3, 4, pontho Janet afokotoza kuti pikiro ineyi inadzakwaniriswa tani na Umambo wa Mulungu. Ntsikana amatama pang’ono buluka penepo alonga: “Cipo ndabva kale boliboli mbakhala na maonero adidi ninga anewa. Anthu azinji akuti asaona, asakhulupira kuti anthu asakhala aboliboli thangwi ya cinthu cidacita iwo peno ayavu awo.” Janet atumizira ntsikana link ya bukhu Biblya Isapfunzisanji na cincino asapfundza pabodzi Bhibhlya kawiri pasumana.
5. Maseze nee tinakwanisa kuwangisa aboliboli ninga pidacita Yezu, kupangiza kwathu citsalakano kuna aboliboli kunadzabweresa nkhombo zanji?
5 Mwandimomwene, nee tinakwanisa kuwangisa aboliboli ninga pidacita Yezu, mbwenye tinakwanisa kuphedza onsene adacitiswa uboliboli wa m’manyerezero na mulungu wa makhaliro ano a pinthu, kuphataniza uboliboli wakumanungo toera kubvesesa undimomwene wa Mafala a Mulungu. (2 Akor. 4:4) Yezu awangisa amuna awiri cifupi na Yeriko thangwi iye “aabvera ntsisi.” (Mat. 20:33) Tingapangizambo citsalakano kuna aboliboli, tinadzatsandzaya na mwai wakuphedza anango toera kupfundza pya Yahova, ule anafuna kudzamalisa uboliboli kwenda na kwenda.
[Bokosi pa tsamba 3]
Pakuphedza Boliboli . . .
• Longani na iye ene, mbwenye lekani kunkhuwira. Boliboli nee asaona, mbwenye kazinji kene asakwanisa kubva mwadidi.
• Phatani nkono wace pakuntsogolera. Mungacita pyenepi anakwanisa kukutowererani mu ndzidzi unafamba imwe. Mungaona djenje, citca, mwala peno cinthu cinango mphyadidi kundziwisa.
• Khalani wakusudzuka toera kuphatisira mafala akuti “onani” na “yang’anani” ninga mukulonga na munthu wakuti asaona. Boliboli asaphatisirambo mafala anewa. Iwo “asaona” munjira inango, ngakhale kuona m’manyerezero mwawo cinthu cinalongwa.
• Cedzani pa mbuto yakusowa dzumbi. Kazinji kene aboliboli nee asapibva mwadidi angakhala pa mbuto ya dzumbi kakamwe, thangwi mphyakunentsa kwa iwo kudziwa pinacitika nkhundu mwawo.
• Ndziwiseni mungafuna kubuluka pana iye. Pyenepi pinadzancitisa kucalira kutsukwala kunabwera thangwi yakulonga ekha.
• Khala boliboli apangiza cifuno mbwenye nee asakhala n’cisa canu lembani formularyo Queira Visitar (S-43) na iperekeni kuna mulembi wa mpingo.