Kuthimizira Maluso Athu Mu Utumiki—Kupfundzisa Anyakupfundza Bhibhlya Toera Kukulisa Nsambo Wadidi Wakupfundza — BHIBHLIYOTEKA MU INTERNETI ya Torre de Vigia

Kuthimizira Maluso Athu Mu Utumiki—Kupfundzisa Anyakupfundza Bhibhlya Toera Kukulisa Nsambo Wadidi Wakupfundza

Thangwi Yanji Mphyakufunika: Toera kukola mwauzimu, anyakupfundza Bhibhlya asafunika kudzalisa manyerezero na mitima yawo tayu basi na pipfundziso pyakutoma pya Mafala a Mulungu. (Aheb. 5:12–6:1) Pfundziro isaphemba kuwangisira. Isaphataniza kulandanisa mphangwa zipswa na zinadziwa ife, pontho kudziwa kufunika kwazo. (Mis. 2:1-6) Kudziwa kufufudza kunaphedza nyakupfundza Bhibhlya toera kutawira mibvundzo ya Bhibhlya mukuphatisira mabukhu athu Acikristu. Kuwangisira kunafuna cita iwo toera kuphatisira pinapfundza iwo kunaakhunganya toera kupirira pinentso pinafuna kuthimbana na iwo ninga Akristu.—Luka 6:47, 48.

Tinacita Tani Pyenepi:

• Gomezerani kufunika kwa kusaka ciphedzo ca Yahova mukucita phembero mbadzati kutoma kupfundza.—Jwau 14:26; 1 Akor. 2:10.

• Bulukira pakutoma, wangisani nyakupfundza wanu toera kukhunganyika mwanyapantsi pfundziro yace ya Bhibhlya. Mpangizeni bukhu yanu ya pfundziro, pontho mpfundziseni kuikha n’themba peno cidzindikiro basi ene m’mafala peno mafraze akufunika.

• Phedzani nyakupfundza wanu toera kutawira mukuphatisira mafala ace ene. Calirani kucita pfundziro kukhala ya mibvundzo na matawiro akuti nyakupfundza wanu asacita kualeri bulukira m’bukhu.

• Wangisani nyakupfundza wanu toera kuleri Mafala a Mulungu ntsiku zonsene. Mpangizeni ndandanda ya kuleri Bhibhlya inagumanika mu jw.org, peno onani mu A Sentinela 1.° de Agosto de 2009 tsa. 15-18, yakuti isagomezera njira yadidi yakuleri Bhibhlya. Kukulisa nsambo wa kuleri Bhibhlya ntsiku zonsene kunadzaphemba kuwangisira, mbwenye kuwangisira kweneku kunadzakhala na maphindu ace.—Sal. 1:2, 3.

• Pangizani nyakupfundza wanu kuti anagumana tani matawiro a mibvundzo ya Bhibhlya mukuphatisira Biblioteca da Torre de Vigia, BIBLIOTECA ON-LINE da Torre de Vigia peno Guia de Pesquisa. Mpangizeni kuti anagumana tani pidzindikiro pya mabukhu anaphatisirwa kakamwe m’misonkhano ya mpingo.

Yeserani Kucita Ipi Nkati Mwa Nthanda:

• Pakumala kwa nsolo ung’ono peno nsolo, phembani nyakupfundza wanu toera kubwerezera mwacigwagwa pidapfundza iye. Khala imwe nkhabe nyakupfundza, pfundzani kulonga mwacigwagwa mafala adaleri imwe m’Bhibhlya peno mu ndima ya Ncenjezi toera kuthimizira kubvesesa kwanu.