Towezerani Citsandzo Ca Aprofeta—Habakuki
1. Thangwi yanji tinakwanisa kulonga kuti tiri m’makhaliro mabodzi ene na a mprofeta Habakuki?
1 Munathimbana ife na kuthimizirika kwa uipi mu dziko ino, panango tinapibva ninga Habakuki, wakuti abvundza Yahova tenepa: ‘Musandioneseranji pyakugopswa pyenepi? Thangwi yanji mukutawirisa pyakuipa pyenepi?’ (Hab. 1:3; 2 Tim. 3:1, 13) Kunyerezera mwacidikhodikho mphangwa za Habakuki na cikhulupiro cace kunatiphedza toera kukhala dzololo munadikhira ife ntsiku yakutonga ya Yahova.—2 Ped. 3:7.
2. Tinapangiza tani kuti tisakhala maso thangwi ya cikhulupiro lero?
2 Khalani Maso Mwakubverana Na Cikhulupiro: M’mbuto mwakudzumatirwa basi na makhaliro akuipa a ntsiku zace, Habakuki apitiriza kukhala maso mwauzimu na waphinga. (Hab. 2:1) Yahova apasa mprofeta cinyindiro cakuti mafala Ace mbadakwanirisika mwakukhonda dembuka, pontho kuti ‘anyakulungama anadzapulumuka thangwi ya cikhulupiriro cawo.’ (Hab. 2:2-4) Kodi pyenepi pisabvekanji kuna Akristu anakhala ku nkhomo kwa ndzidzi wakumalisa? Kusiyapo kudziwa basi kuti kumala kunafika lini, cakufunika kakamwe ndi kukhala na cinyindiro cakuti kunadzacitika. Cikhulupiro cinatikulumiza toera kupitiriza kukhala maso na kuikha pa mbuto yakutoma utumiki wathu.—Aheb. 10:38, 39.
3. Thangwi yanji tisafunika kupitiriza kutsandzaya mu kutumikira Yahova?
3 Kukomerwa Mu Kutumikira Yahova: Goge wa dziko ya Magoge angadzapomokera mbumba ya Yahova, cikhulupiro cathu cinadzayeserwa. (Ezek. 38:2, 10-12) Nkhondo isabweresa pinentso, ngakhale kwa ale adawina. Panango cakudya cisasoweka, pinthu pisatayika, panango midida ya makhaliro isafudzika. Tinadzacitanji pinentso pingatoma? Habakuki akhadikhira kuthimbana na pinentso, natenepa iye atonga kupitiriza kutsandzaya mu kutumikira Yahova. (Hab. 3:16-19) ‘Kutsandzaya kunabuluka kwa Yahova’ kunakwanisambo kutiphedza toera kupirira pinentso ntsogolo.—Neh. 8:10; Aheb. 12:2.
4. Tinatsandzaya nanji cincino na ntsogolo?
4 Ale anadzapulumuswa na Yahova mu ntsiku yace yakutonga, anadzapitiriza kupfundziswa kukhala maso mwakubverana na njira za Mulungu. (Hab. 2:14) Anyakulamuswa muli akufa anadzapfundzambo pya Yahova. Ngakhale cincino, tinakwanisa kuphatisira mwai onsene uli na ife toera kulonga pya Yahova na mabasa ace akudzumisa!—Sal. 34:1; 71:17.