Calirani Madodo Awa Pakucitisa Pfundziro ya Bhibhlya

Kulonga Pinthu Pizinji: Lekani kunyerezera kuti musafunika kufokotoza pinthu pyonsene. Yezu aphatisira mibvundzo toera kuphedza anthu kunyerezera na kubvesesa mwadidi ntsonga. (Mat. 17:24-27) Mibvundzo isacitisa pfundziro kukhala yakuphindulisa, pontho inakuphedzani toera kudzindikira khala nyakupfundza abvesesa ntsonga na asakhulupira pinapfundza iye. (be-T 253 ¶3-4) Pakucita mbvundzo, khalani wakupirira mbamudikhira ntawiro. Nyakupfundza angatawira mwakuphonyeka, m’mbuto mwakumpanga ntawiro wadidi, citani mibvundzo inango toera akwanise kupereka ntawiro wakuthema. (be-T 238 ¶1-2) Longani munjira yakuti inaphedza nyakupfundza kubvesesa ntsonga zipswa.​—be-T 230 ¶4.

Kucitisa Pfundziro Kukhala Yakunentsa Kubvesesa: Calirani kufokotoza pyonsene pinadziwa imwe pya nsolo unadinga imwe. (Jwau 16:12) Ikhani manyerezero anu pa ntsonga yakufunika mu ndima. (be-T 226 ¶4-5) Kufokotoza ntsonga zizinji zakufunika kunacitisa nyakupfundza kukhonda kubvesesa. (be-T 235 ¶3) Nyakupfundza angabvesesa ntsonga yakufunika, ndokoni ndima inatowera.

Kucita Mibvundzo na Matawiro: Tisafunika kukhuya ntima wa nyakupfundza, tayu basi kucita mibvundzo na kudikhira matawiro. (Luka 24:32) Phatisirani mphambvu ya Mafala a Mulungu mukufokotoza malemba akufunika kakamwe pa ndima. (2 Akor. 10:4; Aheb. 4:12; be-T 144 ¶1-3) Phatisirani pitsandzo pyakukhonda nentsa. (be-T 245 ¶2-4) Dingani pinentso na pikhulupiro pya nyakupfundza, pontho piikheni m’manyerezero pakucitisa pfundziro ya Bhibhlya. Citani mibvundzo ninga iyi: “Kodi musaona tani pinapfundza imwe?” “Pyenepi pisatipfundzisanji thangwi ya Yahova?” “Ndi maphindu api anafuna kukhala na imwe mungaphatisira uphungu unoyu?”​—be-T 238 ¶3-5; 259 ¶2.