Kuthimizira Maluso Athu mu Utumiki​—Kusiya Kucitisa Pfundziro ya Bhibhlya Kuna Anyakupfundza Akukhonda Thambaruka

THANGWI YANJI MPHYAKUFUNIKA: Anthu asafunika kucemera dzina ya Yahova toera apulumuke. (Aroma 10:13, 14) Mwandimomwene, si onsene tayu anapfundza Bhibhlya akuti asakhala maso mwakubverana na pinafuna Yahova. Tisacita pyonsene toera kuphatisira mwadidi ndzidzi wathu mu utumiki mbatiphedza ale akuti mwandimomwene asafuna kucita macinjo toera kutsandzayisa Yahova. Khala nyakupfundza Bhibhlya nee akuthambaruka mukupita kwa ndzidzi uzinji, mphyandzeru kusiya kupfundza naye mbatiphatisira ndzidzi wathu toera kuphedza ale anafuna kukhala cifupi na Yahova pabodzi na gulu yace. (Juw. 6:44) Mukupita kwa ndzidzi khala munthu acita macinjo mbapangiza kuti ‘atawira undimomwene unapasa umaso wakukhonda mala,’ tisafunika kupitiriza kupfundza naye.—Mabasa 13:48.

TINACITA TANI PYENEPI:

• Simbani nyakupfundza wanu thangwi yakufuna kukhala na cidziwiso candimomwene.—1 Tim. 2:4

• Gomezerani kufunika kwa kuphatisira pinapfundza iye.—Luka 6:46-49

• Munjira yadidi longani pya nsangani wa Yezu unalonga pya nyakubzwala, pontho mbvundzeni kuti thangwi yanji nee akhaphatisira pikhapfundza iye.—Mat. 13:18-23

• Mpangeni munjira yadidi kuti thangwi yanji imwe mukhadasiya kupfundza naye Bhibhlya

• Mpangeni kuti midzidzi inango munamuligariri toera kumuwangisa, pontho kutsogolo angafuna anatoma pontho kupfundza

ONANI VIDHYU, BULUKA PENEPO TAWIRANI MIBVUNDZO IYI:

• Ninji pinapangiza pa makani anewa kuti nyakupfundza nee akhathambaruka?

• M’mwazi mphangwa aphedza tani nyakupfundza toera kudzindikira kuti akhafunika kucita macinjo?

• M’mwazi mphangwa anacitisa tani nyakupfundza kukhala wakusudzuka toera ntsogolo angafuna apfundze pontho Bhibhlya?