Khazikisani Pifuno mu Ndzidzi wa Cikumbuso

Pyaka pyonsene, atumiki a Yahova asadikhira kugumanika pa Cikumbuso ca kufa kwa Yezu. Masumana mangasi Cikumbuso mbacidzati kucitika na pakumala Cikumbuso, ife tisaphatisira ndzidzi wathu toera kusimba na kupereka takhuta kuna Yahova thangwi ya muoni wa ciomboli. (Aef. 1:3, 7) Mwacitsandzo, ife tisacita pyonsene pinakwanisa ife toera kucemera anango kuti agumanikembo pa Cikumbuso. Anango asacita masasanyiro toera kutumikira ninga apainiya akuphedza na cifuno cakupereka maora 30 peno 50 m’miyezi ya Março peno Abril. Kodi imwe musafunambo kuthimizira ndzidzi unaphatisira imwe m’basa ya kumwaza mphangwa mu ndzidzi wa Cikumbuso? Ninji pinafuna kukuphedzani toera mukwanise kucita pyenepi?

Kazinji kene, ife tisakwanisa kucita pinthu pizinji tingakhunganyika mwanyapantsi. (Mis. 21:5) Nakuti ndzidzi wa Cikumbuso uli dhuzi, uno ndi ndzidzi toera titome kukhunganyika. Nyerezerani pinthu pinafuna imwe kucita m’basa yakumwaza mphangwa mu ndzidzi wa Cikumbuso, pontho nyerezerani pinafunika imwe kucita toera mukwanirise pifuno pyanu. Buluka penepo phembani Yahova toera apase nkhombo kuwangisira kwanu.—1 Juwau 5:14, 15.

Kodi munakwanisa kunyerezera pinthu pingasi pyakuti munapicita toera kuthimizira utumiki wanu mu ndzidzi wa Cikumbuso?