Ife Tisafuna Kakamwe Babathu Yahova

1-2. Thangwi yanji Yahova acita masasanyiro toera ticite khundu ya alambiri ace, pontho acita tani pyenepi?

YAHOVA asaticemera toera ticite khundu ya alambiri ace. Pyenepi ndi pyakufunika kakamwe! Alambiri anewa a Mulungu ndi ale adaperekeka kuna iye mbapangiza cikhulupiro mu ntsembe yaciomboli ya Mwanace. Ndife akutsandzaya kakamwe thangwi tiri na umaso wakuphindulisa lero, pontho tiri na cidikhiro cakukhala na umaso wakukhonda mala m’Paraizu pa dziko yapantsi peno kudzulu.

² Mukukulumizwa na ufuni, Yahova acita masasanyiro toera tikwanise kucita khundu ya alambiri ace. (Juwau 3:16) Ife “tagulwa na ntengo ukulu.” (1 Akor. 6:20) Kubulukira mu ciomboli, Yahova afungula njira toera tikwanise kukhala na uxamwali wakuwanga na iye. Ife tiri na mwai wakucemera Yahova ninga Babathu. Pontho, ninga pidapfundza ife mu nsolo udamala, Yahova ndi Baba wadidi kakamwe.

3. Ndi mibvundzo ipi yakuti panango tinaicita? (Onani bokosi “Kodi Yahova Asandiona?”)

³ Panango tinabvundzika ninga pidacita nyakulemba unango wa Bhibhlya kuti: ‘Ndinabwezera tani Yahova pyonsene pidandicitira iye?’ (Masal. 116:12) Ntawiro ndi wakuti ife cipo tinakwanisa kubwezera pinaticitira Babathu wakudzulu. Ngakhale tenepo, pinaticitira iye pisatikulumiza toera kunfuna. Mpostolo Juwau alemba: “Ife tisafuna thangwi ndiye adatoma kutifuna.” (1 Juwau 4:19) Tinapangiza tani kuti tisafuna Babathu wakudzulu?

KHALANI XAMWALI WA YAHOVA

4. Mwakubverana na Tiyago 4:8, thangwi yanji tisafunika kuwangisira toera kukhala na uxamwali wakuwanga na Yahova?

⁴ Yahova asafuna kuti tikhale axamwali ace, pontho ticedze na iye. (Lerini Tiyago 4:8.) Iye asatikulumiza toera “tipitirize kucita phembero,” pontho iye asatibvesera ndzidzi onsene. (Aroma 12:12) Yahova cipo asakhala wakuphatika peno wakuneta kakamwe mbacimwana kutibvesera. Toera kupereka takhuta thangwi ya udidi unoyu, tisafunika kubvera Yahova mukuleri Bhibhlya, mabukhu anabuluswa m’Bhibhlya na kubvesera mwadidi pa misonkhano Yacikristu. Nakuti kucedza ndzidzi onsene kusaphedza ana toera kukhala na uxamwali wakuwanga na anyakubalawo, munjira ibodzi ene, kucedza ndzidzi onsene na Yahova kunatiphedza toera kukhala na uxamwali wakuwanga na iye.

5. Tisafunika kucitanji toera maphembero athu akhale akutawirika kuna Yahova?

⁵ Nyerezerani ntundu wa maphembero anacita imwe kuna Yahova. Yahova asafuna kuti timpange pinanyerezera ife na mabvero athu mukucita phembero. (Masal. 62:8) Natenepa tisafunika kubvundzika: ‘Kodi maphembero anga ndisaacita na ntima onsene peno asakhala akubwereza-bwereza?’ Mwandimomwene imwe musafuna kakamwe Yahova, pontho musafuna kuti uxamwali wanu na iye ukhale wakuwanga. Toera pyenepi pikwanisike, musafunika kucedza naye kazinji kene. Pangani Yahova pyonsene piri muntima mwanu. Pontho mpangeni pinthu pinakomerwa na imwe na pinakudzudzumisani. Khalani na cinyindiro cakuti munakwanisa kuphemba ciphedzo cace.

6. Tisafunika kucitanji toera kukhala na uxamwali wakuwanga na Babathu wakudzulu?

⁶ Toera kukhala na uxamwali wakuwanga na Babathu wakudzulu, tisafunika kupereka takhuta kuna iye ndzidzi onsene. Pyenepi pisabverana na pinalonga Bhibhlya kuti: “Yahova Mulungu wanga, mwacita pinthu pizinji pyakudzumatirisa; nkhabe munthu wakulandana na imwe. Mbidafuna kupidziwisa na kupibvekesa pyonsene, mbidacimwana, thangwi nkhabe lengeseka.” (Masal. 40:5) Ife nee tisapereka takhuta basi ene; mbwenye tisalonga na kucita pinthu pinapangiza kuti tisapereka takhuta kuna Yahova. Pyenepi pisaticitisa kukhala akusiyana na anthu azinji lero. Ife tikukhala mu dziko yakuti anthu nee asapereka takhuta kuna Mulungu thangwi ya pinthu pinacita iye kuna iwo. Mwandimomwene, cinthu cibodzi cinapangiza kuti tikukhala “mu ntsiku zakumalisa” ndi cakuti anthu nkhabe kupereka takhuta. (2 Tim. 3:1, 2) Ife nee tisafunika kutowezera anthu anewa.

7. Yahova asafuna kuti ticitenji, pontho thangwi yanji?

⁷ Anyakubala nee asafuna kuti anawo akhonde bverana, mbwenye asafuna kuti akhale axamwali. Munjira ibodzi ene, Yahova asafuna kuti alambiri ace onsene akhale akubverana unango na ndzace. Mwandimomwene, kufunana kwathu unango na ndzace kusapangiza kuti ndife Akristu andimomwene. (Juwau 13:35) Pyenepi pisabverana na pinalonga Bhibhlya kuti: “Mphyadidi na pyakutsandzayisa kukhala pabodzi mwakuphatana ninga abale.” (Masal. 133:1) Tingafuna abale na alongo athu, tisapangiza pakweca kuti tisafuna Yahova. (1 Juwau 4:20) Ndi pyakutsandzayisa kakamwe kucita khundu ya abale na alongo akuti ndi “akukoma ntima kuna unango na ndzace, akubverana ntsisi kakamwe.”​—Aef. 4:32.

PANGIZANI UFUNI MUKUKHALA AKUBVERA

8. Mwakubverana na 1 Juwau 5:3, ndi thangwi ipi yakutoma inaticitisa kubvera Yahova?

⁸ Yahova asadikhira kuti ana abvere anyakubala awo, pontho iye asadikhira kuti ife timbvere. (Aef. 6:1) Iye athema kuti timbvere thangwi ndi Nciti wathu, umaso wathu usanyindira iye, pontho ndi wandzeru kakamwe kupiringana anyakubala onsene. Mbwenye thangwi yakutoma inaticitisa kubvera Yahova ndi yakuti tisanfuna. (Lerini 1 Juwau 5:3.) Maseze pana mathangwi mazinji anaticitisa kubvera Yahova, iye nee asatikakamiza toera kucita pyenepi. Yahova atipasa ufulu wakusankhula, natenepa iye asakomerwa angaona kuti tisambvera mukukulumizwa na ufuni.

9-10. Thangwi yanji ndi pyakufunika kudziwa midida ya Mulungu na kuibvera?

⁹ Anyakubala asafuna kuti anawo akhale akutsidzikizika. Ndi thangwi yace iwo asakhazikisa mitemo toera kutsidzikiza anawo. Ana angabvera mitemo ineyi, iwo asapangiza kuti asanyindira anyakubalawo, pontho asaabvera. Natenepa ndi pyakufunika kakamwe kwa ife kudziwa na kubvera mitemo ya Babathu wakudzulu. Tingacita pyenepi, tinapangiza kuti tisafuna Yahova, tisamulemedza, pontho tisaphedzeka na mitemo ineyi. (Iza. 48:17, 18) Mbwenye ale anakhonda kubvera midida ya Yahova asaona nyatwa.​—Agal. 6:7, 8.

¹⁰ Tingakhala maso mwakubverana na midida ya Yahova, tisakhala akutsidzikizika mwakumanungo, m’manyerezero na mwauzimu. Yahova asadziwa pinthu pyakufunika kwa ife. Aurora, anakhala ku Estados Unidos alonga: “Ine ndisadziwa kuti kubvera Yahova ndzidzi onsene pisacitisa kukhala na umaso wadidi kakamwe.” Mafala anewa ndi andimomwene kwa ife tonsene. Kodi musakumbuka nkhombo ziri na imwe thangwi yakubvera pitsogolero pya Yahova?

11. Kodi phembero isatiphedza toera kucitanji?

¹¹ Phembero isatiphedza toera kukhala akubvera, maseze ndi pyakunentsa kucita pyenepi. Midzidzi inango pisanentsa kubvera Yahova thangwi ndife akusowa ungwiro, natenepa tisafunika kuwangisira kakamwe toera kumbvera. Nyamasalmo adembetera Mulungu: “Ndipaseni cifuno ca kukubverani.” (Masal. 51:12) Denise wakuti ndi mpainiya wa ndzidzi onsene alonga: “Ndingaona kuti ndi pyakunentsa kubvera ubodzi mwa mitemo ya Yahova, ndisacita phembero kuna iye toera andipase cifuno ca kubvera ntemo unoyu.” Tisafunika kukhala na cinyindiro cakuti ndzidzi onsene Yahova anatawira phembero ninga ineyi.​—Luka 11:9-13.

PHEDZANI ANANGO TOERA AFUNE BABATHU

12. Tisafunika kucitanji mwakubverana na Aefesi 5:1?

¹² Lerini Aefesi 5:1. Nakuti ndife “ana akufunika” a Yahova, tisacita pyonsene pinakwanisa ife toera kuntowezera. Ife tisatowezera makhaliro ace mukupangiza ufuni, kukoma ntima na kulekerera anango. Anthu akuti nee asadziwa Mulungu angaona makhaliro athu adidi, panango anakulumizika toera kupfundza pya iye. (1 Ped. 2:12) Anyakubala Acikristu asafunika kutsalakana anawo ninga musatitsalakana Yahova. Angacita pyenepi, anawo anakwanisa kukhala axamwali a Babathu wakudzulu.

13. Tisafunika kucitanji toera tikhale acipapo?

¹³ Kazinji kene ana asanyindira anyakubalawo, pontho asakomerwa kulonga pya iwo. Munjira ibodzi ene, ife tisanyindira Babathu wakudzulu Yahova, pontho tisafuna kuti anango andziwembo. Ife tisakhala na mabvero mabodzi ene ninga a Mambo Dhavidhi. Iye alemba: “Ndinadzanyindira Yahova.” (Masal. 34:2) Mphapo ndiye tani khala tiri na manyadzo toera kulonga pya Yahova? Tinakwanisa tani kukhala acipapo? Ife tinakhala acipapo tinganyerezera kutsandzaya kunakhala na Yahova angaona kuti tikupanga anango pya iye, pontho tingaona kuti anango akuphindula kakamwe thangwi yakupfundza pya iye. Yahova anatipasa cipapo. Iye aphedza Akristu a mu ndzidzi wa apostolo toera kukhala acipapo, natenepa iye anatiphedzambo.​—1 Ates. 2:2.

14. Thangwi yanji basa yakumwaza mphangwa ndi yakufunika?

¹⁴ Yahova nkhabe tsankhulo, pontho iye asakomerwa angaona kuti tisafuna anango mwakukhonda tsalakana makhaliro awo. (Mabasa 10:34, 35) Njira ibodzi yakufunika kakamwe toera kupangiza ufuni kuna anango ndi kuamwazira mphangwa zadidi. (Mat. 28:19, 20) Thangwi yanji basa ineyi ndi yakufunika? Thangwi anthu anatawira mphangwa zenezi anakwanisa kukhala na umaso wadidi lero na umaso wakukhonda mala ntsogolo.​—1 Tim. 4:16.

KUFUNA BABATHU KUSATICITISA KUKHALA AKUTSANDZAYA

15-16. Ndi mathangwi api ali na ife toera kukhala akutsandzaya?

¹⁵ Yahova ndi baba waufuni, natenepa iye asafuna kuti atumiki ace akhale akutsandzaya. (Iza. 65:14) Pana mathangwi mazinji anaticitisa kukhala akutsandzaya, maseze tisathimbana na nyatwa. Mwacitsandzo, ife tiri na cinyindiro cakuti Babathu wakudzulu asatifuna kakamwe. Ife tiri na udziwisi wandimomwene wa Mafala a Mulungu, Bhibhlya. (Yer. 15:16) Pontho tisacita khundu ya anthu akuti asafuna Yahova na mitemo yace, pontho asafunana unango na ndzace.​—Masal. 106:4, 5.

¹⁶ Ife tinakwanisa kupitiriza kukhala akutsandzaya thangwi tisadziwa kuti tinakhala na umaso wadidi kakamwe ntsogolo. Tisadziwambo kuti mwakukhonda dembuka Yahova anadzamalisa uipi onsene, pontho anadzaphatisira Umambo wace toera kucinja dziko yapantsi kudza Paraizu. Kusiyapo pyenepi, tiri na cidikhiro cakutsandzayisa cakuti ale adafa anadzalamuswa toera kukhala pontho maso pabodzi na anyakufunika awo. (Juwau 5:28, 29) Pinadzakhala pyakutsandzayisa kakamwe! Kusiyapo pyonsene, tiri na cinyindiro cakuti mwakukhonda dembuka ife tonsene kudzulu na pa dziko yapantsi tinadzasimba na kupasa mbiri Babathu waufuni, mbatimulambira munjira yakuthema.