Mibvundzo Inacitwa na Anyakuleri
Kodi mafala akuti “imwe munaakoya,” anagumanika pa Masalmo 12:7, asalonga pya “anthu anatamba nyatwa” pa vesi 5 peno pya “mafala a Yahova” pa vesi 6?
Mafala a n’khundu a vesi ineyi asapangiza kuti isalonga pya anthu.
Masalmo 12:1-4, asalonga kuti “anyakukhulupirika azambazika pakati pa anthu.” Cincino onani pinalonga Masalmo 12:5-7:
“Yahova alonga: ‘Thangwi yakupondererwa kwa anthu anatamba nyatwa,
Thangwi ya kulira kwa anthu akutcerenga,
Ndinalamuka toera kucita pinthu.
‘Ndinadzaapulumusa m’manja mwa ale anaatsalakana mwakuipa.’
Mafala a Yahova ndi akucena;
Ndi ninga parata idanyunguluswa mu forno ya dongo mbiceneswa kanomwe.
Yahova, imwe munaakoya;
Imwe munatsidzikiza m’bodzi na m’bodzi wa iwo kutomera ubalwi uyu mpaka kwenda na kwenda.”
Vesi 5 isalonga kuti Mulungu anadzapulumusa anthu anatamba nyatwa.
Vesi 6 isalonga kuti “mafala a Yahova ndi akucena” ‘ninga parata yakunyunguluswa.’ Pyenepi pisapangiza mabvero ali na ife thangwi ya mafala a Mulungu.—Mas. 18:30; 119:140.
Cincino, onani pinalonga vesi 7: “Yahova, imwe munaakoya; imwe munatsidzikiza m’bodzi na m’bodzi wa iwo kutomera ubalwi uyu mpaka kwenda na kwenda.” Kodi fala yakuti “iwo” isalonga pya ani?
Nakuti vesi 7 iri patsogolo pa vesi inalonga pya “mafala a Yahova,” anango panango ananyerezera kuti vesi 7 isalonga pya mafala a Mulungu. Pontho ife tisadziwa kuti Mulungu atsidzikiza Bhibhlya maseze anyamalwa ace akhacita pyonsene toera iyo ikhonde kuthumburuzwa na kugawizwa.—Iza. 40:8; 1 Ped. 1:25.
Mbwenye vesi 5 isalongambo undimomwene. Ndzidzi onsene Yahova asaphedza, pontho asapitiriza kuphedza “anthu anatamba nyatwa” na “anthu akutcerenga.”—Yobe 36:15; Mas. 6:4; 31:1, 2; 54:7; 145:20.
Mphapo fala yakuti “iwo” inagumanika pa vesi 7 isalonga pya ani?
Tingaleri mbatibvesesa mwadidi Masalmo 12, tinadzindikira kuti fala ineyi yakuti “iwo” isalonga pya anthu.
Pa Masalmo 12:1 Dhavidhi alonga pya ‘atumiki akukhulupirika’ akuti anyengezwa na anthu akuipa. Vesi inatowera, isalonga pinafuna kucita Yahova kuna anthu analonga uthambi. Ife tinakwanisa kukhala na cinyindiro cakuti Yahova anacitadi pyenepi, thangwi vesi 6 isalonga kuti mafala a Yahova ndi akucena.
Natenepa vesi 7 isalonga kuti Yahova anadzakoya, pontho anadzatsidzikiza m’bodzi na m’bodzi wa iwo. “Iwo” analongwa pa vesi ineyi ndi ale anathabuswa na anyakucita pyakuipa.
Fala yakuti “iwo” inagumanika pa vesi 7 yaphatisirwa kazinji kene m’makopya akunyindirika a Malemba Acihebheri. Malemba Acihebheri adathumburuzwa mu Cigerego aphatisira kawiri fala yakuti “ife” toera kupangiza kuti vesi ineyi isalonga pya atumiki akukhulupirika a Mulungu anatsalakanwa mwakuipa. Pakumalisa, vesi 7 isalonga kuti “m’bodzi na m’bodzi wa iwo,” peno, atumiki akukhulupirika, anadzatsidzikizwa mu “ubalwi” wa anthu anaphedzera pinthu pyakuipa. (Mas. 12:7, 8) Malemba Acihebheri adathumburuzwa mu Ciaramaki, pa vesi 7 athumburuzwa tenepa: “MBUYA, imwe munadzatsidzikiza anthu akulungama, imwe munadzaakoya mu ubalwi uyu wakuipa kwenda na kwenda.” Pyenepi pisapangiza pakweca kuti Masalmo 12:7 nee isalonga pya mafala a Mulungu.
Natenepa, bukhu ineyi ya Masalmo isatipasa cidikhiro cakuti Mulungu anadzacita pinthu toera kutsidzikiza ‘atumiki ace akukhulupirika.’