NSOLO WA PFUNDZIRO 43
NYIMBO 90 Tiwangisane
Lekani Kupenula
“Dingani pinthu pyonsene.”—1 ATES. 5:21.
PINAFUNA IFE KUPFUNDZA
Tinaona kuti tinacitanji toera kumalisa kupenula kwakuti panango kunatidzudzumisa mu ndzidzi unatumikira ife Yahova.
1-2. (a) Ndi mibvundzo ipi yakuti atumiki a Yahova panango anakhala nayo? (b) Tinapfundzanji mu nsolo uno?
MIDZIDZI inango, ife tonsene tisapenula.a Mwacitsandzo, m’phale panango anabvundzika khala Yahova asantsalakana peno nkhabe. Thangwi ya kupenula kweneku, panango iye anaona kuti nee asafunika kubatizwa. Nyerezeranimbo m’bale wakuti pikhali iye m’phale asankhula kutumikira Yahova m’mbuto mwakusaka kukhala na kobiri izinji. Cincino iye asakwanisa kobiri basi ene toera kutsalakana banja yace, natenepa iye asapenula khala acita cisankhulo cadidi peno nkhabe pikhali iye m’phale. Pontho nyerezerani mulongo wakukalamba wakuti cincino nee ali na mphambvu ninga kale. Panango iye asatsukwala thangwi nee asakwanisabve kucita pinthu ninga pikhacita iye kale. Panango imwe mwabvundzika kale tenepa: ‘Kodi mwandimomwene Yahova asanditsalakana? Kuwangisira kudacita ine toera kutumikira Yahova ndi cisankhulo cadidi? Kodi ndisapitiriza kukhala wakufunika kuna Yahova?’
2 Kupenula kunafewesa cikhulupiro cathu, ngakhale kuticitisa kusiya kutumikira Yahova. Mu nsolo uno tinapfundza kuti Bhibhlya inatiphedza tani tingakhala na mibvundzo iyi: (1) Kodi Yahova asanditsalakana? (2) Pisankhulo pidacita ine nduli pikhali pyadidi? (3) Ndisapitiriza kukhala wakufunika kuna Yahova?
NINJI PINAFUNA KUTIPHEDZA TINGAPENULA?
3. Tinamalisa tani kupenula?
3 Njira ibodzi toera kumalisa kupenula ndi kusaka mitawiro ya mibvundzo yathu m’Bhibhlya. Tingacita pyenepi, tinakhala amphambvu, tinakhala cifupi na Yahova, pontho ‘tinakhala akuwanga mu cikhulupiro.’—1 Akor. 16:13.
4. Tinakwanisa tani ‘kudinga pinthu pyonsene’? (1 Atesalonika 5:21)
4 Lerini 1 Atesalonika 5:21. Bhibhlya isatipanga ‘kuti tidinge pinthu pyonsene.’ Pyenepi pisabvekanji? Pisabveka kuti tisafunika kuona khala tiri na mathangwi adidi toera kupenula. Tinacita pyenepi tingalandanisa pinthu pinanyerezera ife na pinalonga Bhibhlya. Nyerezerani pya m’phale anapenula khala Yahova asantsalakana peno nkhabe. Kodi iye basi ene asafunika kupitiriza kupenula kuti Yahova nee asantsalakana? Nkhabe. Iye asafunika ‘kudinga pinthu pyonsene toera kudzindikira kuti mwandimomwene Yahova asamuona tani.’
5. “Tinabvesera” tani mitawiro ya Yahova thangwi ya pinthu pinapenula ife?
5 Tingaleri Bhibhlya, pisakhala ninga tiri kubvesera Yahova. Mbwenye toera kubvesesa kuti Yahova asanyerezeranji thangwi ya pinthu pinapenula ife, tisafunika kuwangisira. Pakutoma tisafunika kuleri mavesi a m’Bhibhlya anabverana na pinthu pinapenula ife. Ife tinakwanisambo kuphatisira maferamentu anatipasa gulu ya Yahova toera kufufudza pinthu pinapenula ife. (Mis. 2:3-6) Kusiyapo pyenepi, ife tinakwanisambo kuphemba Yahova toera atipase nkhombo mu ndzidzi unafufudza ife na kutiphedza toera kudziwa manyerezero ace. Buluka penepo tisafunika kusaka midida ya Bhibhlya na mphangwa zinango zakuti zinatiphedza toera kumalisa kupenula kwathu. Cinthu cinango cinafuna kutiphedza ndi kupfundza pitsandzo pya anthu analongwa m’Bhibhlya akuti akhali na manyerezero na mabvero ninga athu.
6. Misonkhano inatiphedza tani toera kumalisa kupenula kwathu?
6 Njira inango “yakubvesera” Yahova ndi kugumanika pa misonkhano. Tingagumanika pa misonkhano, tisakhala na mwai wakubvesera nkhani peno ntawiro wakuti unatiphedza toera kumalisa kupenula kwathu. (Mis. 27:17) Cincino tendeni tione kuti tinatawira tani mibvundzo idacita ife pa ndima yaciwiri.
‘KODI YAHOVA ASANDITSALAKANA?’
7. Ndi mbvundzo upi wakuti anthu anango asakhala nawo?
7 Mwabvundzika kale khala mwandimomwene Yahova asakutsalakanani? Munthu angapibva kuti nee ndi wakufunika, panango ananyerezera kuti nee anakwanisa kukhala xamwali wa Nciti wa pinthu pyonsene. Pisaoneka kuti Mambo Dhavidhi akhalambo na manyerezero anewa. Iye adzumatirwa thangwi yakuona kuti Yahova akhatsalakana anthu. Natenepa iye abvundza: “Yahova, kodi munthu mbani toera muntsalakane, mbani mwana wa munthu toera mumbvesere?” (Mas. 144:3) Munagumana kupi ntawiro wa mbvundzo wakuti: “Kodi Yahova asatsalakana anthu?”
8. Mwakubverana na 1 Samweli 16:6, 7, 10-12, Yahova asaonanji kuna anthu?
8 Bhibhlya isatipfundzisa kuti Yahova asatsalakana anthu akuti panango asaoneka ninga akusowa basa. Mwacitsandzo, Yahova atuma Samweli toera aende kunyumba kwa Yese kuti adzodze m’bodzi wa anace toera akhale mambo wa Izraeli. Pa ndzidzi unoyu, Yese akhali na ana asere, mbwenye iye acemera anomwe, mbasiya wang’ono akhacemerwa Dhavidhi.b Ngakhale tenepo, Yahova asankhula Dhavidhi. (Lerini 1 Samweli 16:6, 7, 10-12.) Yahova akhadziwa mwadidi Dhavidhi. Iye akhadziwa kuti m’phale unoyu akhanfuna kakamwe.
9. Thangwi yanji muli na cinyindiro cakuti Yahova asakutsalakanani? (Onanimbo foto.)
9 Nyerezerani citsalakano cidapangiza Yahova kuna imwe. Mwacitsandzo, iye asakupasani uphungu mu ndzidzi unaufuna imwe kakamwe. (Mas. 32:8) Pyenepi pisapangiza kuti Yahova asakudziwani mwadidi, pontho asadziwa pinthu pinafuna imwe. (Mas. 139:1) Mungaphatisira uphungu wa Yahova mbamuona kuti kucita pyenepi ndi kwadidi kakamwe, imwe musakhala na cinyindiro cakuti Yahova asakutsalakanani. (1 Kro. 28:9; Mabasa 17:26, 27) Yahova asaona pyonsene pinacita imwe toera kuntumikira. Iye asadziwa makhaliro anu, na thangwi ineyi asafuna kukhala xamwali wanu. (Yer. 17:10) Pontho Yahova asafuna kuti imwe mutawire kukhala Xamwali wace.—1 Juw. 4:19.
‘Ungasaka Yahova, iwe unan’gumana.’—1 Kro. 28:9 (Onani ndima 9)c
‘PISANKHULO PIDACITA INE NDULI NDI PYADIDI?’
10. Ndi mibvundzo ipi yakuti panango tinakhala nayo tinganyerezera pisankhulo pidacita ife?
10 Midzidzi inango munthu panango anapenula khala pisankhulo pidacita iye nduli ndi pyadidi peno nkhabe. Mwacitsandzo, panango munthu asiya basa yadidi ku dziko peno malonda toera kucita pizinji m’basa ya Yahova. Mbwenye pakupita pyaka pizinji panango iye ananyerezera anthu kuti acita pisankhulo pyakusiyana, pontho asaoneka ninga ali na kobiri izinji na umaso wadidi. Natenepa panango munthu unoyu anapenula mbabvundzika: ‘Ndacita mwadidi kuwangisira toera kutumikira Yahova? Kodi ine ndikhafunika kuphata basa kakamwe toera kukhala na umaso wadidi cincino?’
11. Thangwi yanji nyakulemba Masalmo 73 akhanentseka?
11 Khala imwe musacitikambo mibvundzo ineyi, nyerezerani nyakulemba Masalmo 73. Iye akhaona anthu akuti nee akhatumikira Yahova akhali na umaso wadidi, akhali akupfuma, akhali na ungumi wadidi, pontho nee akhadzudzumika. (Mas. 73:3-5, 12) Pikhali ninga pinthu pyonsene pikhafamba mwadidi kuna anthu anewa. Pikhaona iye pyenepi, nyamasalmo atsukwala mbanyerezera kuti kuwangisira kwace toera kutumikira Yahova kukhali kwakusowa basa. ‘Ntsiku zonsene iye akhanentseka.’ (Mas. 73:13, 14) Kodi iye acitanji toera amalise mabvero anewa akuphonyeka?
12. Mwakubverana na Masalmo 73:16-18, ninji pidaphedza nyamasalmo toera akhale akukhurudzika?
12 Lerini Masalmo 73:16-18. Nyamasalmo apita m’mbuto yakucena ya Yahova, pontho mwenemo iye akwanisa kunyerezera mwadidi. Iye abvesesa kuti maseze anthu akuti nee akhatumikira Yahova akhali na umaso wadidi, iwo nee akhali na cidikhiro ca ntsogolo. Nyamasalmo pidabvesesa iye pyenepi akhala wakukhurudzika, pontho aona kuti kuikha Yahova pa mbuto yakutoma ndi cisankhulo cadidi kakamwe. Natenepa, iye akhafuna kupitiriza kutumikira Yahova.—Mas. 73:23-28.
13. Ninji pinafuna kukuphedzani toera kukhala wakukhurudzika mungapenula pisankhulo pidacita imwe nduli? (Onanimbo foto.)
13 Bhibhlya inakuphedzanimbo tani toera mukhale wakukhurudzika? Nyerezerani pinthu pyadidi piri na imwe, kuphatanizambo uxamwali wanu na Yahova. Kumbukani kuti anthu anakhonda kufuna Yahova basi ene ali na pinthu pya dziko ino. Kuna anthu anango pinthu piri na iwo ndi pyakufunika kakamwe, thangwi nee ali na cidikhiro ca ntsogolo. Mbwenye kwa imwe ndi pyakusiyana. Kusiyapo kutambira miyoni mizinji ya Yahova cincino, imwe musadziwa kuti munakhala na umaso wakukhonda mala ntsogolo na nkhombo zizinji. (Mas. 145:16) Nyerezerani basi: Nee munakwanisa kudziwa kuti umaso wanu mbudakhala tani khala nee mwasankhula kutumikira Yahova. Mbwenye munakwanisa kukhala na cinyindiro cakuti ale anacita pisankhulo thangwi ya ufuni wawo kuna Mulungu na anthu anango nee ali kuluza cinthu, pontho ndzidzi onsene anakhala na pinthu pinafuna iwo toera atsandzaye.
Nyerezerani nkhombo zidapikira Yahova thangwi ya ntsogolo (Onani ndima 13)d
‘NDISAPITIRIZA KUKHALA WAKUFUNIKA KUNA YAHOVA?’
14. Ndi mbvundzo upi wakuti anango asaucita, pontho thangwi yanji?
14 Thangwi ya kukalamba, utenda peno kulamala, atumiki anango a Yahova panango nee anakwanisa kucita pizinji ninga pikhacita iwo nduli. Natenepa panango ananyerezera kuti nee ndi akufunika kuna Yahova. Panango iwo anabvundzika tenepa: ‘Ndisapitiriza kukhala wakufunika kuna Yahova?’
15. Ndi cinyindiro cipi cikhali na nyamasalmo adalemba kapitulu 71?
15 Nyamasalmo adalemba kapitulu 71 akhadzudzumikambo. Na thangwi ineyi, iye aphembera kuna Yahova: “Lekani kundisiya mphambvu zanga zingamala.” (Mas. 71:9, 18) Mbwenye nyamasalmo unoyu akhadapfundza kuti Yahova asatsandzaya atumiki ace angawangisira toera kuntumikira, maseze acimwane kucita pizinji ninga pikhafuna iwo. (Mas. 37:23-25) Natenepa, maseze akhali akusowa mphambvu, iye akhali na cinyindiro cakuti Yahova ndzidzi onsene mbadamphedza angapitiriza kukhala wakukhulupirika.
16. Ndi pinthu pipi pyakuti ankhalamba anakwanisa kupicita kuna Yahova na kuna anango? (Masalmo 92:12-15)
16 Khala ndimwe nkhalamba, nyerezerani kuti Yahova asapibva tani angakuonani. Maseze muthimbane na pinentso pizinji, iye anakupasani mphambvu toera mupitirize kuntumikira. (Lerini Masalmo 92:12-15.) Natenepa, lekani kunyerezera kakamwe pinthu pinacimwana imwe kucita, mbwenye ikhani manyerezero anu ku pinthu pinakwanisa imwe kucita. Mwacitsandzo, imwe munakwanisa kuphedza anango na citsandzo canu, pontho mungapangiza citsalakano kuna iwo. Imwe munakwanisa kuapanga kuti Yahova akuphedzani tani mu pyaka pizinji, pontho munakwanisa kuapanga cidikhiro ciri na imwe thangwi ya mapikiro a Yahova a ntsogolo. Kusiyapo pyenepi, lekani kuduwala kuti maphembero anu anakwanisa kuphedza anthu anango. (1 Ped. 3:12) Undimomwene ndi wakuti mwakukhonda tsalakana makhaliro athu, tonsene tinakwanisa kupasa cinthu Yahova na anthu anango.
17. Thangwi yanji nee tisafunika kulandanisika na anango?
17 Kodi imwe muli wakutsukwala thangwi yakucimwana kucita pizinji m’basa ya Yahova? Khalani na cinyindiro cakuti Yahova asakomerwa na pyonsene pinakwanisa imwe kucita. Panango munayesera kulandanisika na anango. Mbwenye lekani kucita pyenepi. Thangwi yanji? Thangwi Yahova nee asatilandanisa na anango. (Agal. 6:4) Mwacitsandzo, Mariya atsanulira miyendo ya Yezu mafuta akununkhira a ntengo ukulu kakamwe. (Juw. 12:3-5) Mbwenye nzice wakutcerenga apereka mu templo kobiri ziwiri zing’ono za ntengo wakucepa kakamwe. (Luka 21:1-4) Ngakhale tenepo, Yezu nee alandanisa akazi anewa awiri, m’mbuto mwace, iye aona kuti pidacita iwo pisapangiza kuti iwo ali na cikhulupiro. Munjira ibodzi ene, Yahova asakomerwa na pinthu pyonsene pinacita imwe toera kupangiza cikhulupiro na ufuni, maseze munyerezere kuti pinacita imwe ndi pyakucepa kakamwe.
18. Ninji pinafuna kutiphedza toera kumalisa kupenula? (Onanimbo bokosi ya nsolo wakuti “Mafala a Yahova Anakwanisa Kukuphedzani Toera Kumalisa Kupenula.”)
18 Ife tonsene tisapenula midzidzi inango. Mbwenye ninga pidapfundza ife mu nsolo uno, Bhibhlya inakwanisa kutiphedza toera kumalisa kupenula kwathu. Natenepa, wangisirani toera kugumana mitawiro ya mibvundzo yanu kuti mukhale na cinyindiro m’mbuto mwakudzudzumika. Mwakukhonda penula, Yahova asaona pinacita imwe, pontho asakutsalakanani. Iye asakomerwa na kuwangisira kunacita imwe toera kuikha Umambo wace pa mbuto yakutoma, pontho anadzakupasani nkhombo thangwi yakucita pyenepi. Pontho khalani na cinyindiro cakuti Yahova asafuna m’bodzi na m’bodzi wa atumiki ace na kuatsalakana.
NYIMBO 111 Tiri na Mathangwi Toera Kutsandzaya
a MABVEKERO A MAFALA ANANGO: Bhibhlya isalonga kupenula kunango kunapangiza kusowa cikhulupiro kuna Yahova na kuna mapikiro ace. Mbwenye mu nsolo uno, ife nee tiri kulonga kupenula kweneku. M’mbuto mwace, tiri kulonga kupenula kunaticitisa kubvundzika khala ndife akufunika kuna Yahova peno khala pisankhulo pidacita ife ndi pyadidi.
b Bhibhlya nee isalonga thunga ikhali na Dhavidhi mu ndzidzi udasankhulwa iye na Yahova, mbwenye pisaoneka kuti iye akhali m’phale.—Onani A Sentinela ya 1.° de Setembro de 2011, tsa. 29, ndima 2.
c MAFALA ANAFOKOTOZA FOTO: Ntsikana wakuti ndi Mboni wa Yahova ali kufufudza m’Malemba toera agumane uphungu wa Yahova.
d MAFALA ANAFOKOTOZA FOTO: M’bale ali kuphata basa toera kutsalakana banja yace, pontho ali kunyerezera Paraizu.