Nyerezerani Ninga Yahova na Yezu

1-2. Kufuna Yahova kusaphatanizanji, pontho Yezu apangiza tani kuti akhafuna Yahova na manyerezero ace onsene?

YEZU alonga ntemo wakufunika kakamwe wa Mwambo wa Mose. Iye alonga: “Funa Yahova Mulungu wako na ntima wako onsene, na umaso wako onsene, na mphambvu zako zonsene, na ndzeru zako zonsene.” (Luka 10:27) Natenepa ife tisafunika kufuna Yahova na pinthu pyonsene piri na ife. Pyenepi pisaphataniza pifuno pyathu, mabvero athu, mphambvu zathu na manyerezero athu. Ndimomwene kuti nee tinakwanisa kubvesesa mwadidi kakamwe manyerezero onsene a Yahova. Mbwenye tinakwanisa kudziwa mwadidi njira inanyerezera iye tingapfundza “manyerezero a Kristu.” Thangwi Yezu atowezera mwadidi kakamwe njira inanyerezera Pai wace.

² Yezu akhafuna Yahova na manyerezero ace onsene. Iye akhadziwa pikhafuna Yahova kuti iye acite, pontho iye akhacita pyenepi ngakhale athabuke. Nakuti Yezu akhafuna kakamwe kucita pikhafuna Pai wace, iye nee atawirisa kuti cinthu cinango cimpingize kucita pyenepi.

3. Ninji pidapfundza Pedhru, pontho iye apanga Akristu toera acitenji? (1 Pedhru 4:1)

³ Pedhru na apostolo anango akhala pabodzi na Yezu, pontho akwanisa kuona njira ikhanyerezera iye. Mu ndzidzi udalemba Pedhru tsamba yace yakutoma, iye apanga Akristu toera afunane mbanyerezera ninga munanyerezera Kristu. (Lerini 1 Pedhru 4:1.) Fala idaphatisira Pedhru yakuti “khunganyikani,” kazinji kene ikhaphatisirwa toera kulonga nyankhondo anakhunganyika toera kuenda kamenya nkhondo. Natenepa, tinakwanisa kulonga kuti kunyerezera ninga munanyerezera Yezu ndi pyakufunika toera kukunda cifuno cakucita madawo, kuphatanizambo pinthu pinango pya dziko ino ya Sathani.—2 Akor. 10:3-5; Aef. 6:12.

4. Tinapfundzanji mu nsolo uno?

⁴ Mu nsolo uno tinapfundza kuti tinakwanisa tani (1) kunyerezera ninga Yahova, kwakuti kunatiphedza toera kukhala akubverana m’manyerezero (2) kukhala akucepeseka na (3) kukhala na ndzeru zadidi tinganyindira Yahova na kucita phembero. Toera kupfundza pyenepi, ife tinaona kuti Yezu akhanyerezera tani, pontho tinanyerezerambo tani ninga iye.

NYEREZERANI NINGA YAHOVA

5. Ndi pinthu pipi pidacita Pedhru pidapangiza kuti nee anyerezera ninga Yahova?

⁵ Ntsiku inango, Pedhru acita pinthu pidapangiza kuti nee anyerezera ninga munanyerezera Yahova. Yezu apanga apostolo kuti iye mbadaenda ku Yerusalemu, pontho kweneko mbadamangwa na atsogoleri a uphemberi, mbadathabuswa na kuphiwa. (Mat. 16:21) Pedhru akhadziwa kuti Yezu akhali Mesiya adapikirwa kuti mbadapulumusa mbumba ya Mulungu. Na thangwi ineyi, panango pyanentsa kuna iye kutawira kuti Yahova mbadatawirisa Mwanace toera kuthabuka munjira ineyi. (Mat. 16:16) Natenepa Pedhru acemera Yezu mbampanga: “Mbuya, bverekani ntsisi mwekhene! Pyenepi nee pisafunika kukucitikirani.” (Mat. 16:22) Mbwenye Yezu nee acita pyenepi, thangwi Pedhru nee akhanyerezera munjira inanyerezera Yahova.

6. Yezu apangiza tani kuti akhanyerezera munjira inanyerezera Yahova?

⁶ Yezu atowezera mwadidi kakamwe njira inanyerezera Pai wace. Na thangwi ineyi, iye apanga Pedhru: “Buluka patsogolo panga Sathani! Kwa ine, iwe ndiwe mwala wakugwegwedusa, thangwi manyerezero ako si a Mulungu tayu, mbwenye ndi a anthu.” (Mat. 16:23) Panango Pedhru akhali na cifuno cadidi. Mbwenye Yezu akhonda kubvera uphungu wace. Yezu akhadziwa kuti Yahova nee akhafuna kuti iye anyerezere pinafuna iye basi. Ndzidzi unoyu Pedhru apfundza kuti ndi pyakufunika kunyerezera ninga Yahova. Ife tisafunikambo kudziwa pyenepi.

7. Pedhru apangiza tani kuti iye acinja toera kunyerezera ninga munanyerezera Yahova? (Onani iri pa tsamba yakutoma.)

⁷ Mukupita kwa ndzidzi, Pedhru apangiza kuti akhafuna kunyerezera ninga munanyerezera Yahova. Iye apangiza pyenepi mu ndzidzi wakuti Ajentiyu peno ale akuti nee akhali Ayuda atawiriswa kukhala atumiki a Mulungu. Yahova apanga Pedhru toera amwazire mphangwa Kornelyo, wakuti ndi m’bodzi mwa Ajentiyu adatoma kukhala Akristu. Ayuda nee akhabverana na Ajentiyu. Na thangwi ineyi, Pedhru akhafunika kucinja njira yace yakunyerezera. Yahova aphedza Pedhru toera kubvesesa cifuno cace. Natenepa Pedhru acinja manyerezero ace thangwi ya Ajentiyu mbaenda kamwazira mphangwa Kornelyo. (Mabasa 10:28, 29) Iye amwazira mphangwa Kornelyo, kuphatanizambo anthu onsene a panyumba pace, pontho iwo abatizwa.—Mabasa 10:21-23, 34, 35, 44-48.

8. Tinapangiza tani kuti tisanyerezera ninga Yahova? (1 Pedhru 3:8 na cidzindikiro capantsi)

⁸ Pidapita pyaka pingasi, Pedhru apanga Akristu toera ‘kukhala akuphatana m’manyerezero’ peno kunyerezera munjira ibodzi ene. (Lerini 1 Pedhru 3:8 na cidzindikiro capantsi.) Ife tinakwanisa kupfundza Bhibhlya toera kudziwa njira inanyerezera Yahova mbatintowezera. Mwacitsandzo, Yezu apanga atowereri ace toera kuikha Umambo wa Mulungu pa mbuto yakutoma mu umaso wawo. (Mat. 6:33) Panango m’bale mu mpingo wathu anasankhula kutumikira ninga mpainiya peno kucita basa inango ya ndzidzi onsene. Nee tisafunika kulonga mafala akuti anatsukwalisa m’bale unoyu peno kuncitisa kunyerezera pinafuna iye basi. Mbwenye tisafunika kulonga pinthu pyadidi thangwi ya cifuno cace cakutumikira Yahova na kumphedza.

KHALANI WAKUCEPESEKA

9-10. Yezu apangiza tani kuti ndi wakucepeseka?

⁹ Namasiku Yezu mbadzati kufa, iye apfundzisa Pedhru na apostolo anango kuti ndi pyakufunika kukhala akucepeseka. Mbadzati kucita pyenepi, Yezu akhadaphemba Pedhru na Juwau toera akhunganye pinthu kuti adye pabodzi Yezu mbadzati kufa. Cibodzi mwa pinthu pyenepi panango cikhali kubweresa basiya na tuwalya toera kutsuka miyendo ya ale akhafuna kudya. Mphapo mbani akhafuna kukhala wakucepeseka mbatsuka miyendo ya anthu?

¹⁰ Mwakukhonda dembuka, Yezu apangiza kuti ndi wakucepeseka. Iye acita pinthu pyakuti kazinji kene pikhacitwa na bitcu, pontho pyenepi pyacitisa apostolo kudzumatirwa. Bhibhlya isalonga kuti Yezu aikha pakhundu nguwo yace, amanga tuwalya ncunu mwace, aikha madzi m’basiya mbatoma kutsuka miyendo yawo. (Juw. 13:4, 5) Yezu atsuka miyendo ya apostolo ace 12 kuphatanizambo Yuda wakuti mukupita kwa ndzidzi an’gulisa. Panango pyakwata ndzidzi pang’ono toera kucita basa ineyi, mbwenye Yezu acepeseka mbacita basa ineyi. Buluka penepo, iye afokotoza: “Musabvesesa pinthu pidakucitirani ine? Imwe musandicemera ‘Mpfundzisi,’ pontho musandicemera ‘Mbuya,’ ndimomwene, ine ndinedi. Mphapo, khala ine Mbuya na Mpfundzisi, ndatsuka miyendo yanu, imwe musafunikambo kutsuka miyendo ya unango na ndzace.”—Juw. 13:12-14.

11. Pedhru apangiza tani kuti akhadapfundza kukhala wakucepeseka? (1 Pedhru 5:5) (Onanimbo foto.)

¹¹ Pedhru apfundza kukhala wakucepeseka ninga Yezu. Pidabwerera Yezu kudzulu, Pedhru awangisa mamuna m’bodzi adabalwa wakulamala. (Mabasa 1:8, 9; 3:2, 6-8) Anthu azinji aona pidacita Pedhru mbaenda kuna iye. (Mabasa 3:11) Mucisa cace anthu akhali na nsambo wakufuna kuoneka ninga akufunika kakamwe kupiringana anango. Kodi Pedhru abandza mwai unoyu toera kucita pyenepi? Nkhabe. Iye acepeseka mbapasa mbiri Yahova. Pedhru alonga: “Munthu uyu anaona imwe na anadziwa imwe, awangiswa mu dzina ya Yezu, pontho thangwi yakukhulupira kwathu dzina yace.” (Mabasa 3:12-16) Mukupita kwa ndzidzi, Pedhru alembera Akristu kuti akhafunika kukhala akucepeseka. Fala idaphatisira iye toera kulonga pyenepi isapangiza kubvala kucepeseka ninga nguwo. Pyenepi pisatikumbusa ndzidzi udamanga Yezu tuwalya ncunu toera kutsuka miyendo ya apostolo ace.—Lerini 1 Pedhru 5:5.

12. Tinapitiriza tani kupfundza kukhala akucepeseka ninga Pedhru?

¹² Ife tinakwanisa kutowezera Pedhru tingapitiriza kupfundza kukhala akucepeseka. Mbwenye kumbukani kuti nee pyakwana basi ene kulonga munjira inapangiza kuti ndife akucepeseka. Pedhru aphatisira mafala akuti “khalani na manyerezero akucepeseka” toera kupangiza kuti kucepeseka kwandimomwene kusaphataniza pinthu pinanyerezera ife. Ife tisacitira anango pinthu pyadidi thangwi tisafuna Yahova na anthu, tayu toera kusimbwa. Tisapangiza kuti mwandimomwene ndife akucepeseka tingatumikira Yahova na abale na alongo athu mwakutsandzaya ngakhale anango akhonde kutiona.—Mat. 6:1-4.

“KHALANI NA NDZERU ZADIDI”

13. Pisabvekanji kukhala “na ndzeru zadidi”?

¹³ Pisabvekanji kukhala “na ndzeru zadidi”? (1 Ped. 4:7) Nkristu wandzeru zadidi asawangisira toera kucita pisankhulo mwakubverana na ndzeru za Yahova. Iye asadziwa kuti nkhabe cinthu cinango cakufunika kakamwe mu umaso kupiringana uxamwali wace na Yahova. Kusiyapo pyenepi, asakhala na maonero adidi thangwi ya iye ene, pontho asadzindikira kuti nee asadziwa pinthu pyonsene. Munthu wandzeru zadidi asapangiza kuti asanyindira Yahova ndzidzi onsene angaphemba Yahova toera antsogolere.a

14. Ninji pidacita Pedhru pidapangiza kuti nee anyindira Yahova?

¹⁴ Namasiku mbadzati kufa, Yezu apanga anyakupfundzace: “Imwe monsene munadzandithawa masiku ano.” Pedhru anyindirika ekhene mbalonga: “Ngakhale kuti onsene akuthaweni, ine cipo ndinadzakuthawani!” Masiku anewa Yezu apasa uphungu anyakupfundzace anango. Iye alonga: “Pitirizani kukhala akuyang’anira, pontho ndzidzi onsene citani phembero.” (Mat. 26:31, 33, 41) Khala Pedhru abvera uphungu unoyu panango mbadakhala wacipapo mbalonga kuti akhali nyakupfundza wa Yezu. Mbwenye akhonda Mbuyace, buluka penepo atsukwala kakamwe thangwi ya pinthu pidacita iye.—Mat. 26:69-75.

15. Ninji pidaphedza Yezu toera kupitiriza kukhala na ndzeru zadidi namasiku mbadzati kufa?

¹⁵ Yezu akhanyindira Yahova na ntima onsene. Maseze iye nee akhadawa, iye acita phembero mwakubwereza-bwereza namasiku mbadzati kufa. Pyenepi pyamphedza toera akhale na cipapo cakucita pinafuna Yahova. (Mat. 26:39, 42, 44; Juw. 18:4, 5) Pedhru aona njira idacita Yezu phembero mwakubwereza-bwereza mu ndzidzi unoyu wakunentsa, pontho iye nee aduwala pyenepi.

16. Ninji pinapangiza kuti Pedhru akhala na ndzeru zadidi? (1 Pedhru 4:7)

¹⁶ Mukupita kwa ndzidzi, Pedhru atoma kunyindira kakamwe Yahova, pontho akhamphemba toera antsogolere. Pidalamuswa Yezu muli akufa, apanga Pedhru na apostolo anango kuti iwo mbadatambira nzimu wakucena toera akwanise kumwaza mphangwa zadidi. Mbwenye Yezu aapanga toera adikhire mu Yerusalemu mpaka ndzidzi ukhafuna kucitika pinthu pyenepi. (Luka 24:49; Mabasa 1:4, 5) Pedhru acitanji mu ndzidzi ukhadikhira iye? Iye pabodzi na abale anango “akhapitiriza kucita phembero.” (Mabasa 1:13, 14) Mu tsamba yakutoma idalemba iye, Pedhru apanga Akristu toera akhale na ndzeru zadidi mbacita phembero ndzidzi onsene toera Yahova aatsogolere. (Lerini 1 Pedhru 4:7.) Pedhru apfundza kunyindira Yahova, adzakhala wandzeru zadidi, pontho aphedza kakamwe mpingo.—Agal. 2:9.

17. Tisafunika kupitiriza kucitanji mwakukhonda tsalakana maluso ali na ife? (Onanimbo foto.)

¹⁷ Toera tikhale andzeru zadidi tisafunika kupitiriza kucita phembero kuna Yahova mwakukhonda tsalakana maluso ali na ife. Tingafuna kucita pisankhulo, ife tisafunika kuphemba Yahova toera atitsogolere mbatinyindira kuti iye asadziwa mwadidi pinthu pyakuti pinatiphedza.

18. Tinakwanisa tani kunyerezera ninga Yahova?

¹⁸ Tisapereka takhuta kakamwe kuna Yahova thangwi iye aticita munjira yakuti tisakwanisa kutowezera makhaliro ace. (Gen. 1:26) Ndimomwene kuti nee tinakwanisa kutowezera Yahova mwadidi kakamwe. (Iza. 55:9) Mbwenye ninga Pedhru, ife tisafuna kupitiriza kupfundza kunyerezera ninga Yahova, kukhala akucepeseka na andzeru zadidi.