Ife Nee Tiri Tekhene

1-2. (a) Thangwi yanji tinakwanisa kukhala na cinyindiro cakuti nee tiri tekhene tingathimbana na nyatwa? (b) Tinapfundzanji mu nsolo uno?

TINGATHIMBANA na nyatwa panango tinapibva ninga tiri mu nsitu tekhene, pontho nee tiri kuona njira toera kubuluka mwenemo. Mbwenye ife nee tiri tekhene. Babathu waufuni asaona nyatwa zonsene zinatamba ife, pontho apikira kuti anatiphedza. Mwaufuni, Yahova apikira atumiki ace kuti: “Ndinadzakuphedza.”—Iza. 41:10.

² Mu nsolo uno, tinapfundza pinthu pinai pinacita Yahova toera kutitsalakana: (1) Iye asatitsogolera, (2) asatipasa pinthu pinafuna ife, (3) asatitsidzikiza na (4) asatibalangaza. Yahova asatipasa cinyindiro cakuti mwakukhonda tsalakana nyatwa zinathimbana na ife, iye cipo anatiduwala. Iye cipo anatisiya. Natenepa ife nee tiri tekhene.

YAHOVA ASATITSOGOLERA

3-4. Yahova asatitsogolera tani? (Masalmo 48:14)

³ Lerini Masalmo 48:14. Yahova asadziwa kuti ife nee tinakwanisa kutsogolereka tekhene. Mphapo iye asatsogolera tani atumiki ace akukhulupirika lero? Njira ibodzi inaphatisira iye toera kutitsogolera ndi Bhibhlya. (Mas. 119:105) Kubulukira m’Mafalace, Yahova asatiphedza toera ticite pisankhulo pyadidi na kukulisa makhaliro akuti asatiphedza toera kukhala akutsandzaya cincino na kutipasa cidikhiro ca umaso wakukhonda mala ntsogolo.a Mwacitsandzo, iye asatipfundzisa toera kulekerera anango na kukhonda kukoya pinthu pyakuipa muntima, kukhala akukhulupirika mu pinthu pyonsene pinacita ife na kufuna anango na ntima onsene. (Mas. 37:8; Aheb. 13:18; 1 Ped. 1:22) Tingapangiza makhaliro anewa, tinakhala anyakubala adidi anyakumanga banja adidi na axamwali adidi.

⁴ M’Bhibhlya, Yahova asatipanga pinthu pidacitikira anthu adathimbana na nyatwa, pontho akuti akakhala na mabvero ninga ali na ife. (1 Akor. 10:13; Tiya. 5:17) Tingapfundza pinthu pidacita anthu anewa mbatipiphatisira, ife tinaphedzeka mu njira ziwiri. Yakutoma, ife tinabvesesa kuti nee ndife basi anathimbana na nyatwa. Anango athimbanambo na nyatwa ninga zenezi, pontho akwanisa kupirira na ciphedzo ca Yahova. (1 Ped. 5:9) Yaciwiri, ife tinapfundza pinthu pinafuna kutiphedza kupirira pinentso mbatikhala akutsandzaya.—Aroma 15:4.

5. Yahova asaphatisira ani toera kutitsogolera?

⁵ Yahova asaphatisirambo abale na alongo toera kutitsogolera.b Mwacitsandzo, ayang’aniri a cisa asacedzera mipingo mwakubwereza-bwereza toera kutiwangisa. Nkhani zinacita iwo zisawangisa cikhulupiro cathu, pontho zisatiphedza toera kukhala akuphatana. (Mabasa 15:40–16:5) Akulu a mpingo asaphatambo basa mwakuwanga kakamwe toera kuphedza m’bodzi na m’bodzi wa ife kuti tikhale na uxamwali wakuwanga na Yahova. (1 Ped. 5:2, 3) Anyakubala asapfundzisa anawo toera afune Yahova, pontho kuti anacita tani pisankhulo pyandzeru mbakhala na misambo yadidi. (Mis. 22:6) Pontho alongo akukola mwauzimu asaphedza alongo akuti ndi atsikana mukupangiza citsandzo cadidi, kuapasa uphungu na kuawangisa.—Tito 2:3-5.

6. Tisaphedzeka tani na pitsogolero pinatipasa Yahova?

⁶ Yahova asatipasa pitsogolero pyakufunika toera tikwanise kucita pisankhulo pyadidi mbatikhala akutsandzaya. Tinapangiza tani kuti tisapereka takhuta thangwi ya pitsogolero pinatipasa Yahova? Lemba ya Misangani 3:5, 6 isalonga: “Nyindira Yahova na ntima wako onsene, leka kunyindira ndzeru zako.” Tingacita pyenepi, ‘iye anadzalungamisa njira zathu,’ pontho anatiphedza toera kucalira nyatwa zizinji mbatikhala na umaso wakutsandzaya. Ife tisapereka takhuta kakamwe kuna Yahova thangwi yakutipasa uphungu wace mwaufuni!—Mas. 32:8.

YAHOVA ASATIPASA PINTHU PINAFUNA IFE

7. Ndi pinthu pipi pinango pinatipasa Yahova? (Afilipi 4:19)

⁷ Lerini Afilipi 4:19. Kusiyapo kutitsogolera mwauzimu, Yahova asatipasambo cakudya, pyakubvala na mbuto yakukhala. (Mat. 6:33; 2 Ates. 3:12) Ndimomwene kuti midzidzi inango tisadzudzumika na pinthu pyenepi, mbwenye Yahova nee asafuna kuti tidzudzumike kakamwe na pyenepi. (Mat. 6:25.) Thangwi yanji? Thangwi Babathu wakudzulu cipo anasiya atumiki ace akukhulupirika. (Mat. 6:8; Aheb. 13:5) Ife tinakwanisa kunyindira na ntima onsene mafala adalonga iye kuti anatipasa pinthu pinafuna ife.

8. Yahova acitanji kuna Dhavidhi?

⁸ Onani kuti Yahova aphedza tani Dhavidhi. Mu ndzidzi ukhathawa Dhavidhi mambo Sauli, Yahova aphedza Dhavidhi na amuna akhali na iye toera akwanise kupulumuka. Mu ndzidzi ukhanyerezera Dhavidhi njira idamphedza Yahova, iye alonga: “Kutomera uphale wanga mpaka kukalamba kwanga, cipo ndaona munthu wakulungama mbathawiwa, nee anace mbakaphemba cakudya.” (Mas. 37:25) Ninga Dhavidhi, panango imwe mwaonambo njira zidakuphedzani Yahova mwaufuni peno zidaphedza iye abale na alongo anu midzidzi ya nyatwa.

9. Yahova asaphedza tani atumiki ace lero angagwerwa na pidengwa? (Onanimbo mafoto.)

⁹ Yahova asaphedzambo atumiki ace angagwerwa na pidengwa. Mwacitsandzo, pidaoneka njala ku Yerusalemu mu ndzidzi wa apostolo, abale a m’mbuto zakusiyana-siyana atumiza ciphedzo kweneko. (Mabasa 11:27-30; Aroma 15:25, 26) Lero, abale na alongo asaphedzanambo m’midzidzi ya nyatwa. Pangacitika cidengwa, Yahova asakulumiza atumiki ace mwaufuni toera kupereka cakudya, madzi, pyakubvala na mitombwe kuna ale adagwerwa na cidengwa. Abale na alongo anango asamanga nyumba za abale zidafudzika na Nyumba za Umambo. Kusiyapo pyenepi, abale asaphatisira Bhibhlya toera kubalangaza na kuwangisa mwauzimu abale na alongo adagwerwa na cidengwa.c

10-11. Mwapfundzanji na pidacitikira Borys?

¹⁰ Yahova asatsalakanambo anthu akuti nee asantumikira. Mukutowezera citsandzo cace, ife tisasakambo miyai yakupangiza ufuni kuna ale akuti nee ndi abale athu. (Agal. 6:10) Tingacita pyenepi, panango tinaaphedza toera adziwe pizinji thangwi ya ife na Yahova. Onani pidacitikira Borys, diretor wa xikola ibodzi ku Ukraniya. Maseze nee akhali Mboni wa Yahova, ndzidzi onsene iye akhatsalakana mwaufuni anyakupfundza akuti akhali Mboni za Yahova, pontho akhalemedza pikhakhulupira iwo. Thangwi ya nkhondo, iye athawa cisa cikakhala iye mbaenda ku mbuto inango n’dziko ineyi, pontho kweneko abale na alongo amphedza. Buluka penepo, iye agumanika pa Cikumbuso ca kufa kwa Yezu. Pidanyerezera iye pinthu pyonsene pidancitira abale, Borys alonga: “Mboni za Yahova zanditsalakana mwadidi kakamwe. Ine ndisapereka takhuta kakamwe kuna iwo.”

¹¹ Ife tinatowezerambo kukoma ntima kwa Yahova tingapangiza ufuni kuna anthu onsene, kuphatanizambo ale akuti nee asatumikira Yahova. (Luka 6:31, 36) Tisafuna kuti makhaliro athu adidi akulumize anthu anango toera afune kupfundza thangwi ya Mulungu wathu. (1 Ped. 2:12) Maseze akhonde kutumikira Yahova, tinatsandzaya na kuphedza anthu anango thangwi “kupasa kusatsandzayisa kakamwe kupiringana kutambira.”—Mabasa 20:35.

YAHOVA ASATITSIDZIKIZA

12. Yahova apikira kuti anatitsidzikiza tani? (Masalmo 91:1, 2, 14)

¹² Lerini Masalmo 91:1, 2, 14. Lero, Yahova asapikira kutsidzikiza atumiki ace ku pinthu pyakuti pinaphekesa uxamwali wawo na iye. Yahova nee anatawirisa kuti Sathani afudze uphemberi wandimomwene. (Juw. 17:15) Natenepa, tinakwanisa kukhala na cinyindiro consene cakuti mu ndzidzi wa “nyatwa ikulu,” Yahova anakwanirisa pikiro yace yakuti anatiphedza toera tipitirize na cikhulupiro cakuwanga na kutipulumusa.—Apok. 7:9, 14.

13. Yahova asatsidzikiza tani m’bodzi na m’bodzi wa atumiki ace?

¹³ Yahova asaphedza tani m’bodzi na m’bodzi wa ife? Iye asaphatisira Bhibhlya toera kutiphedza kubvesesa kusiyana kwa pinthu pyadidi na pyakuipa. (Aheb. 5:14) Tingaphatisira pinapfundza ife m’Bhibhlya, pisatiphedza toera kukhala na uxamwali wakuwanga na Yahova, pontho na ungumi wadidi. (Mas. 91:4) Yahova asaphatisirambo mpingo toera kutitsidzikiza. (Iza. 32:1, 2) Abale na alongo athu asafuna Yahova, pontho asacita pinafuna iye. Tingakhala pabodzi na iwo, tisawangisana, pontho tisakhala na mphambvu yakucalira kucita pinthu pyakuipa.—Mis. 13:20.

14. (a) Thangwi yanji Yahova asatawirisa atumiki ace kuthabuka? (b) Lemba ya Masalmo 9:10 isatipasa cinyindiro cipi? (Onanimbo cidzindikiro capantsi.)

¹⁴ Kale, midzidzi inango Yahova akhatsidzikiza atumiki ace toera akhonde kuphiwa peno kuphekeswa. Mbwenye lero, ife panango tinathabuka thangwi ya “pinthu pyakukhonda kudikhirwa.” (Ekle. 9:11) Kusiyapo pyenepi, atumiki anango a Yahova akale atcingwa mpaka kuphiwa; pyenepi panango pinacitikambo na ife lero. Yahova asatawirisa pyenepi toera kupangiza kuti Sathani ndi nyauthambi. (Yobe 2:4-6; Mat. 23:34) Panango Yahova nee anamalisa nyatwa zathu zonsene. Mbwenye Bhibhlya isatipasa cinyindiro cakuti iye nee anasiya ale ananfuna.d—Mas. 9:10.

YAHOVA ASATIBALANGAZA

15. Yahova asatibalangaza tani tingacita phembero, tingaleri Bhibhlya na kugumanika pa misonkhano? (2 Akorinto 1:3, 4)

¹⁵ Lerini 2 Akorinto 1:3, 4. Midzidzi inango, tisathabuka thangwi yakuferwa peno kutsukwala thangwi ya pinthu pinango. Panango cincino imwe muli wakutsukwala thangwi yakupibva kuti muli mwekhene. Kodi alipo anabvesesa nyatwa zanu? Yahova asabvesesa. Kusiyapo pyenepi, iye “asatibalangaza mu nyatwa zathu zonsene.” Kodi iye asacita tani pyenepi? Tingacita phembero kuna Yahova mbatiphemba ciphedzo cace, iye asatipasa “ntendere wa Mulungu wakuti usapiringana kubvesesa konsene.” (Afil. 4:6, 7) Pontho tisabalangazwa tingaleri Bhibhlya. Iyo isapangiza kuti Yahova asatifuna kakamwe, isatipfundzisa toera kukhala na udziwisi kakamwe na kutipasa cidikhiro. Kusiyapo pyenepi, tisabalangazwa pa misonkhano yathu thangwi tisapfundza pinthu pyakuti pisatiwangisa, pontho tisakhala pabodzi na abale na alongo akuti asatifuna.

16. Pinthu pidacitikira Nathan na Priscilla pisatipfundzisanji?

¹⁶ Onani pidacitikira Nathan na Priscilla anakhala ku Estados Unidos. Pinthu pidaacitikira pisapangiza kuti Yahova asaphatisira Bhibhlya toera kutibalangaza na kutiwangisa. Mu pyaka pingasi nduli, iwo afuluka mbaenda katumikira ku mbuto iri na amwazi mphangwa akucepa. Nathan alonga: “Ife tikhali na cinyindiro cakuti Yahova mbadatipasa nkhombo thangwi ya kuwangisira kwathu.” Pidafika iwo ku mbuto ineyi, atoma kubva kupha, pontho nee akhali na kobiri. Mukupita kwa ndzidzi, iwo abwerera kunyumba, mbwenye akhapitiriza kusowa kobiri. Nathan alonga: “Yahova nee atiphedza munjira ikhadikhira ife, natenepa ine ndikhabvundzika: Thangwi yanji? Kodi ndacita cinthu cakuipa?” Mukupita kwa ndzidzi, Nathan na Priscilla abvesesa kuti Yahova nee akhadaasiya mu ndzidzi unoyu ukhafuna iwo ciphedzo. Nathan alonga: “Mu ndzidzi unoyu, Bhibhlya ikhali ninga xamwali wakuti akhandipasa uphungu na kundiwangisa. M’mbuto mwakunyerezera nyatwa zikhathimbana na ife, tikhanyerezera njira zikhatiphedza Yahova. Pyenepi pikhatipasa cinyindiro cakuti Yahova anapitiriza kutiphedza.”

17. Yahova abalangaza tani Helga? (Onanimbo foto.)

¹⁷ Abale na alongo athu asatibalangazambo kakamwe. Onani pidacitikira Helga anakhala ku Hungria. Mu pyaka pizinji, iye akhathimbana na nyatwa zakuti zikhantsukwalisa mbanyerezera kuti ndi wakusowa basa. Mbwenye angakumbuka pidancitikira, asaona kuti Yahova aphatisira abale na alongo toera kuntsalakana. Iye alonga: “Ine ndikhafunika kuphata basa, kutsalakana mwananga wakuti akhaduwala, pontho ndikhathimbana na nyatwa zinango zizinji. Yahova akhandiphedza midzidzi yonsene ikhasowa ine mphambvu. Mpaka pano papita pyaka 30, mbwenye Yahova ali kundibalangaza ntsiku zonsene. Kazinji kene, iye asacita pyenepi mukuphatisira abale na alongo aufuni akuti asalonga mafala akuwangisa. Mu ndzidzi ukhali ine wakutsukwala kakamwe, iwo akhanditumizira matsamba, mphangwa, pontho akhandisimba.”

18. Tinabalangaza tani anango?

¹⁸ Tingabalangaza anango tiri kutowezera Mulungu, pontho kucita pyenepi ndi mwai kuna ife. Mphapo tinabalangaza tani anango? Tinacita pyenepi tingaabvesera mwakupirira, kulonga mafala akubalangaza na kuphedza ale anafuna ciphedzo. (Mis. 3:27) Ife tisawangisira toera kubalangaza onsene anathabuka, kuphatanizambo ale akuti nee asatumikira Mulungu. Mavizinyu athu angaferwa, angabva kupha peno angakhala akudzudzumika, ife tisaenda kaaona, tisaabvesera mwadidi, pontho tisaapangiza malemba akuwangisa. Kutowezera Yahova, “Mulungu wacibalangazo consene,” kusaphedza kakamwe. Ife tinakwanisa kuphedza abale na alongo athu toera kupirira na kucitisa ale akuti nee asatumikira Yahova kufuna kupfundza undimomwene.—Mat. 5:16.

YAHOVA ANATIPHEDZA NDZIDZI ONSENE

19. Yahova asatitsalakana tani, pontho tinantowezera tani?

¹⁹ Yahova asatsalakana anthu onsene ananfuna. Iye nee asatisiya tingathimbana na nyatwa. Yahova asatitsalakana munjira ibodzi ene inatsalakana pai mwanace mwaufuni. Iye asatitsogolera, asatipasa pinafuna ife, asatitsidzikiza na kutibalangaza. Ife tinatowezera Babathu tingaphedza na kubalangaza ale anathimbana na nyatwa. Ndimomwene kuti ntsiku zino tisathimbana na nyatwa zizinji, mbwenye tinakwanisa kukhala na cinyindiro cakuti Yahova anatiphedza. Iye apikira: “Leka kugopa, thangwi ine ndiri na iwe.” (Iza. 41:10) Natenepa tinakwanisa kukhala na cinyindiro consene cakuti nee tiri tekhene.