NSOLO WA PFUNDZIRO 31
NYIMBO 111 Tiri na Mathangwi Toera Kutsandzaya
Kodi Imwe ‘Mwapfundza’ Kukomerwa na Pinthu Piri na Imwe?
“Ine ndapfundza kukhala munthu wakukomerwa na piri na ine m’makhaliro onsene.”—AFIL. 4:11.
PINAFUNA IFE KUPFUNDZA
Tinapfundza kuti kukhala akupereka takhuta, akucepeseka na kunyerezera cidikhiro ca ntsogolo kunatiphedza tani toera kukomerwa na pinthu piri na ife.
1. Pisabvekanji kukomerwa na pinthu piri na ife?
KODI imwe musakomerwa na pinthu piri na imwe? Munthu anakomerwa na pinthu piri na iye asakhala wakutsandzaya, pontho asanyerezera nkhombo ziri na iye cincino. Iye nee asaipirwa thangwi ya pinthu pidasowa iye. Mbwenye kukomerwa na pinthu piri na ife nee kusabveka kuti nee tisafunika kutsalakana umaso wathu. Mwacitsandzo, Nkristu asawangisira toera kucita pizinji m’basa ya Yahova. (Aroma 12:1; 1 Tim. 3:1) Ngakhale tenepo, iye nee analuza kutsandzaya kwace angakhonda kwanisa kucita pinafuna iye m’basa ya Yahova.
2. Thangwi yanji kukhonda kukomerwa na pinthu piri na ife ndi kwakugopswa?
2 Kukhonda komerwa na pinthu piri na ife kunatibweresera nyatwa zizinji. Ale anakhonda komerwa na pinthu piri na iwo panango anaphata basa mu ndzidzi uzinji kakamwe toera akwanise kukhala na pinthu pyakuti mwandimomwene nee ndi pyakufunika. Mwakutsukwalisa, Akristu anango aba kobiri na pinthu pinango pikhafuna iwo. Panango iwo anyerezera tenepa: ‘Ine ndathema kukhala na pinthu pyenepi. Ndadikhira ndzidzi uzinji kakamwe’ peno ‘ndinadzabwezera kobiri ineyi.’ Ngakhale tenepo, njira zonsene za kuba zisatsukwalisa Yahova. (Mis. 30:9) Anango atsukwala kakamwe thangwi yakukhonda kukhala na mwai wakutumikira ukhafuna iwo mbasiya kutumikira Yahova. (Agal. 6:9) Pinakwanisika tani kuti ntumiki wa Yahova acite pyenepi? Pyenepi pinakwanisa kucitika tingasiya kukomerwa na pinthu piri na ife.
3. Tisapfundzanji na lemba ya Afilipi 4:11, 12?
3 Ife tonsene tinakwanisa kukomerwa na pinthu piri na ife. Mpostolo Paulu alemba kuti ‘apfundza kukhala munthu wakukomerwa na pinthu pikhali na iye.’ (Lerini Afilipi 4:11, 12.) Iye alemba mafala anewa mu ndzidzi ukhali iye nkaidi. Ngakhale tenepo, iye nee akhadasiya kukhala wakutsandzaya. Paulu ‘apfundzambo cinthu cakuti anthu azinji nee asacidziwa’ toera kukomerwa na pinthu pikhali na iye. Tinganentseka toera kukomerwa na pinthu piri na ife, mafala a mpostolo Paulu na pinthu pidancitikira pinakwanisa kutiphedza. Tisafunika kukumbuka kuti ndi pyakunentsa kukomerwa na pinthu piri na ife. Mbwenye tisafunika kupfundza kucita pyenepi. Tinacita tani pyenepi? Tendeni tione makhaliro akuti anatiphedza toera kupfundza kukomerwa na pinthu piri na ife.
KHALANI WAKUPEREKA TAKHUTA
4. Kukhala wakupereka takhuta kusatiphedza tani toera kukomerwa na pinthu piri na ife? (1 Atesalonika 5:18)
4 Munthu wakupereka takhuta asakomerwa na pinthu piri na iye. (Lerini 1 Atesalonika 5:18.) Mwacitsandzo, ife tingapereka takhuta thangwi ya pinthu piri na ife toera tipitirize kukhala m’maso, nee tinadzudzumika kakamwe na pinthu pyakuti tisapifuna, mbwenye nee tiri napyo. Tingapereka takhuta thangwi ya miyai yakutumikira iri na ife cincino, tinacita pyonsene pinakwanisa ife m’mabasa anewa, m’mbuto mwakunyerezera kakamwe kutambira mabasa anango. Na thangwi ineyi, Bhibhlya isalonga kuti pakucita phembero tisafunikambo kupereka takhuta kuna Yahova. Kukhala wakupereka takhuta kunatiphedza toera tikhale na “ntendere wa Mulungu wakuti usapiringana kubvesesa konsene.”—Afil. 4:6, 7.
5. Thangwi yanji Aizraeli akhafunika kupereka takhuta? (Onanimbo foto.)
5 Onani pidacitikira Aizraeli. Mwakubwereza-bwereza, iwo adungunyira Yahova thangwi ya kutsuwa cakudya cikhali na iwo ku Ejitu. (Num. 11:4-6) Ndimomwene kuti umaso n’thando ukhali wakunentsa. Mphapo ninji pikhafuna kuphedza Aizraeli toera akomerwe na pinthu pikhali na iwo? Iwo akhafunika kupereka takhuta thangwi ya pinthu pidaacitira Yahova. Ku Ejitu, kwakuti iwo akhatsalakanwa mwakuipa ninga mabitcu, Yahova abweresa miliri khumi toera kubulusa Aizraeli mu ubitcu. Pikhabuluka iwo ku Ejitu, Aizraeli ‘apaswa na Aejitu pinthu pya parata, pya ouro na nguwo.’ (Eks. 12:35, 36) Pidaatowera Aejitu ku Bara Yakufira, Yahova agawa bara toera Aizraeli apite. Pontho mu ndzidzi ukhafamba iwo n’thando, iye aapasa cakudya cikhacemerwa mana. Mphapo thangwi yanji Aizraeli akhadungunya? Iwo nee akhadungunya thangwi yakusowa cakudya, mbwenye thangwi yakukhonda kupereka takhuta na pinthu pikhali na iwo.
Thangwi yanji Aizraeli nee akhakomerwa na pinthu pikhali na iwo? (Onani ndima 5)
6. Ninji pinafuna kutiphedza toera tikhale akupereka takhuta?
6 Ninji pinafuna kukuphedzani toera mukhale akupereka takhuta? Cakutoma, ntsiku zonsene nyerezerani pinthu pyadidi pinakutsandzayisani. Panango munakwanisa kulemba pinthu piwiri peno pitatu pyakuti musapereka takhuta thangwi yakukhala napyo. (Ciliro 3:22, 23) Caciwiri, pangizani kupereka kwanu takhuta. Perekani takhuta kuna anango thangwi ya pinthu pinakucitirani iwo. Mbwenye kupiringana pyonsene, perekani takhuta kuna Yahova ndzidzi onsene. (Mas. 75:1) Cacitatu, khalani na axamwali akuti asapereka takhuta. Mungakhala na axamwali akuti asapereka takhuta, imwe munaperekambo takhuta. Mbwenye mungakhala na axamwali akuti nee asapereka takhuta, nee munaperekambo takhuta. (Dheu. 1:26-28; 2 Tim. 3:1, 2, 5) Tinganyerezera njira zakupangiza kupereka kwathu takhuta, ife nee tinatsukwala thangwi ya pinthu pyakuti nee tiri napyo.
7. Aci akwanisa tani kukhala wakupereka takhuta, pontho pyenepi pyamphedza tani?
7 Onani pidacitikira Aci anakhala ku Indonezya. Iye alonga: “Mu ndzidzi wa COVID-19 ine ndatoma kulandanisika na abale anango. Pyenepi pyandicitisa kukhonda kukomerwa na pinthu pikhali na ine.” (Agal. 6:4) Ninji pidamphedza toera kucinja manyerezero ace? Aci alonga: “Ine ndatoma kunyerezera nkhombo zikhandipasa Yahova ntsiku zonsene, pontho ndanyerezera pinthu pizinji pyadidi pikhali na ine thangwi yakukhala mu gulu ya Yahova. Buluka penepo, ndapereka takhuta kuna Yahova. Natenepa ine ndatoma kukomerwa na pinthu pikhali na ine.” Mungakhonda kukomerwa na pinthu piri na imwe, kucita pinthu pidacita Aci kunakuphedzani toera kukhala wakupereka takhuta.
KHALANI WAKUCEPESEKA
8. Ndi pinthu pipi pidacitikira Bharuki?
8 Pa ulendo unango, mulembi wa mprofeta Yeremiya anacemerwa Bharuki, asiya kukomerwa na pinthu pikhali na iye. Bharuki akhali na basa yakunentsa. Iye akhaphedzera Yeremiya toera kupereka mphangwa kuna Aizraeli. Mbwenye m’mbuto mwakunyerezera pinthu pikhafuna Yahova kuti iye acite, Bharuki atoma kunyerezera kakamwe thangwi ya pinthu pikhafuna iye kucita. Yahova aphatisira mprofeta Yeremiya toera kumpanga: “Uli kusaka pinthu pikulu kakamwe. Leka kupitiriza kusaka pinthu pyenepi.” (Yer. 45:3-5) M’mafala anango, Yahova akhampanga: “Komerwa na pinthu piri na iwe cincino.” Bharuki atawira kusandikwa, pontho apitiriza kukhala wakutawirika kuna Yahova.
9. Mwakubverana na 1 Akorinto 4:6, 7, tisafunika kudzindikiranji? (Onanimbo mafoto.)
9 Midzidzi inango Nkristu panango ananyerezera kuti athema kutambira miyai inango yakutumikira, thangwi ali na maluso mazinji, asaphata basa mwaphinga, peno ali kutumikira Yahova mu pyaka pizinji. Mbwenye panango anango anatambira miyai ineyi yakuti iye akhaifuna kakamwe. Mphapo ninji pinafuna kuphedza Nkristu angatsukwala thangwi ya pyenepi? Iye anakwanisa kunyerezera mafala a mpostolo Paulu anagumanika pa 1 Akorinto 4:6, 7. (Lerini.) Miyai yonsene inatambira ife na maluso ali na ife tapaswa na Yahova. Iye nee asatipasa pinthu pyenepi thangwi ndife akufunika kakamwe kupiringana anango. Mbwenye asatipasa thangwi iye asatifuna kakamwe, pontho ndi wakukoma ntima.—Aroma 12:3, 6; Aef. 2:8, 9.
Pinthu pyonsene piri na ife tapaswa na Yahova thangwi iye asatifuna, pontho ndi wakukoma ntima (Onani ndima 9)b
10. Tinakwanisa tani kukhala akucepeseka?
10 Tinganyerezera pinthu pidacita Yezu mbatintowezera, ife tinakwanisa kukhala akucepeseka. Yezu atsuka miyendo ya apostolo ace maseze akhadziwa kuti ndi Mwana wa Mulungu, pontho akhali na mphambvu zizinji. Mpostolo Juwau alemba: ‘Yezu akhadziwa kuti Baba apereka pinthu pyonsene m’manja mwace. Iye akhadziwambo kuti abuluka kuna Mulungu, pontho akhabwerera kuna Mulungu. Ngakhale tenepo, atoma kutsuka miyendo ya anyakupfundzace.’ (Juw. 13:3-5) Yezu panango mbadanyerezera kuti ndiye adathema kutsukwa miyendo. Mbwenye mu ndzidzi ukhali iye pa dziko yapantsi, iye cipo anyerezera kuti athema kukhala na pinthu pizinji kakamwe mu umaso. (Luka 9:58) Yezu akhali wakucepeseka, pontho akhakomerwa na pinthu pikhali na iye. Iye acita pinthu pyadidi kakamwe pyakuti tisafunika kupitowezera.—Juw. 13:15.
11. Kucepeseka kwaphedza tani m’bale Dennis toera kukomerwa na pinthu piri na iye?
11 M’bale Dennis wa ku Países Baixos, awangisira toera kutowezera kucepeseka kwa Yezu, mbwenye pikhali pyakunentsa kuna iye. Iye alonga: “Midzidzi inango ndisaona kuti ndine wakudzikuza, pontho nee ndisakomerwa na pinthu piri na ine. Mwacitsandzo, nee ndisakomerwa anango angatambira mwai wakutumikira. Pyenepi pingacitika, ine ndisapfundza thangwi yakucepeseka. Mu aplikativo JW Library® ine ndaikha cidzindikiro malemba analonga pya kucepeseka toera ndiagumane mwakucimbiza mbandialeri pontho. Kusiyapo pyenepi, ine ndabhaxari n’telefoni mwanga nkhani zinalonga pya kucepeseka, pontho ndisazibvesera kazinji kene.a Ine ndapfundza kuti mabasa onsene anacita ife ndi toera kupasa mbiri Yahova, tayu ife ene. M’bodzi na m’bodzi wa ife asacita khundu yace toera kuphedzera basa ya Yahova.” Mungaona kuti nee muli kukomerwa na pinthu piri na imwe, wangisirani toera kukhala wakucepeseka. Pyenepi pinawangisa uxamwali wanu na Yahova, pontho pinakuphedzani toera kukomerwa na pinthu piri na imwe.—Tiya. 4:6, 8.
NYEREZERANI CIDIKHIRO CA NTSOGOLO
12. Ndi pikiro ipi ya Yahova inatiphedza toera kukomerwa na pinthu piri na ife? (Izaiya 65:21-25)
12 Ife tinakomerwa kakamwe na pinthu piri na ife tinganyerezera cidikhiro cathu ca ntsogolo. M’bukhu ya Izaiya, Yahova alonga kuti iye asadziwa kuti tisatamba nyatwa zizinji. Mbwenye iye apikira kuti anadzamalisa nyatwa zenezi. (Lerini Izaiya 65:21-25.) Ife tinadzakhala na nyumba zadidi na zakutsidzikizika, tinakhala na mabasa akutsandzayisa, pontho tinadya pyakudya pyakupasa ungumi na pyakukoma, nee tinadzagopa kucitikirwa na pinthu pyakuipa peno kuti anathu anacitikirwa na pinthu pyenepi. (Iza. 32:17, 18; Ezek. 34:25) Ife tinakwanisa kukhala na cinyindiro cakuti mapikiro a Yahova thangwi ya ntsogolo anakwanirisika.
13. Ndi mu ndzidzi upi wakuti cidikhiro cathu cinatiphedza kakamwe?
13 Thangwi yanji cidikhiro cathu ndi cakufunika kakamwe cincino? Thangwi ife tiri kukhala mu “ntsiku zakumalisa,” pontho tonsene tisatamba nyatwa zakuti ndi ‘zakunentsa kupirira.’ (2 Tim. 3:1) Ntsiku zonsene, Yahova asatipasa citsogolero, asatipasa mphambvu, pontho asatiphedza toera kupirira. (Mas. 145:14) Kusiyapo pyenepi, cidikhiro cathu cisatiphedza toera kupirira mu ndzidzi unatamba ife nyatwa. Panango imwe muli kunentseka toera kugula cakudya, kugula nguwo, peno kugumana mbuto toera banja yanu ikhale. Kodi imwe munapitiriza kutamba nyatwa zenezi kwenda na kwenda? Nkhabe. Yahova apikira kuti mparaizu, iye anakupasani pinthu pizinji kupiringana pire pinafuna imwe. (Mas. 9:18; 72:12-14) Panango imwe muli na utenda wakugopswa, musatsukwala kakamwe, peno muli kutamba nyatwa zinango. Kodi imwe munapitiriza tenepo kwenda na kwenda? Nkhabe. Mautenda na kufa, pinadzamala n’dziko ipswa. (Apok. 21:3, 4) Cidikhiro ceneci cisatiphedza toera kukomerwa na pinthu piri na ife mbatikhonda kuipirwa kakamwe na pinthu pyakuipa pinacitika cincino. Ife tinakwanisa kukomerwa na pinthu piri na ife maseze titsalakanwe mwakusowa ulungami, tiferwe, tibve kupha peno kutamba nyatwa zinango. Thangwi yanji? Thangwi mwakukhonda tsalakana pinentso pinathimbana na ife cincino, tisadziwa kuti “nyatwa zinaona ife ndi za ndzidzi wakucepa,” pontho kuti mu dziko ipswa, ife nee tinadzathabukabve.—2 Akor. 4:17, 18.
14. Tinawangisa tani cidikhiro cathu?
14 Nakuti cidikhiro ndi cakufunika kakamwe toera kukomerwa na pinthu piri na ife, mphapo tinaciwangisa tani? Ninga munthu wakuti asafunika kubvala malenti toera akwanise kuona mwadidi pinthu piri kutali, ife tisafunikambo kucita pinthu toera cidikhiro cathu cikhale cakuwanga kuti tikwanise kunyerezera pinthu pinafuna kucitika mparaizu. Tingadzudzumika kakamwe thangwi yakusowa kobiri, ife tinakwanisa kunyerezera kuti umaso unakhala tani mu ndzidzi wakuti kobiri, mangawa na kusiyana kwa umaso nee kunadzaonekabve Mparaizu. Tingadzudzumika thangwi ya miyai yakutumikira yakuti tidzati kukhala nayo, ife tinakwanisa kunyerezera kuti pyenepi nee pinakhala pyakufunika kakamwe mu ndzidzi wakuti tinadzakhala aungwiro, pontho tinatumikira Yahova mu pyaka pizinji kakamwe. (1 Tim. 6:19) Cincino tisadzuzumika na pinthu pizinji kakamwe pyakuti pinacitisa kukhala pyakunentsa kunyerezera thangwi ya mapikiro anewa a ntsogolo. Mbwenye mukupita kwa ndzidzi, kunyerezera mapikiro a Yahova a ntsogolo kunakhala kwakukhonda nentsa kuna ife.
15. Mwapfundzanji na mafala adalonga mulongo Christa?
15 Onani kuti cidikhiro cisaphedza tani mulongo Christa, nkazi wa m’bale Dennis adalongwa pa ndima 11. Iye alonga: “Ine ndiri na utenda wakuti usandicitisa kukhala wakusowa mphambvu, nee ndisakwanisa kufamba, ndisaphatisira njinga ya anyakulamala toera kufamba, pontho ndzidzi uzinji basi ene ndisagona. Ine ndisabva kubva ntsiku zonsene. Dotoro wanga andipanga kuti ine nee ndinawangabve. Mbwenye mu ndzidzi udalonga iye pyenepi, ndanyerezera: ‘Iye asaona pinthu pya ntsogolo munjira yakusiyana na ine.’ Ine ndisanyerezera cidikhiro canga cakuti cisandiphedza toera kukhala wakukhurudzika. Mu dziko ino ndisapirira nyatwa zizinji, mbwenye mu dziko ipswa ndinadzakhala na umaso wadidi kakamwe.”
“ALE ANAN’GOPA NKHABE CINTHU CINASOWA IWO”
16. Thangwi yanji mambo Dhavidhi alemba kuti ale anagopa Yahova “nkhabe cinthu cinasowa iwo”?
16 Maseze ndife atumiki a Yahova, ife tinapitiriza kutamba nyatwa. Nyerezerani pidacitikira mambo Dhavidhi. Iye aferwa na anace atatu. Anthu anango ampambizira kuti acita pinthu pyakuipa, axamwali ace asiya kumphedzera, pontho mu pyaka pizinji, mambo m’bodzi akhansaka toera kumupha. Ngakhale tenepo, mu ndzidzi ukhapirira iye nyatwa zenezi, iye alonga tenepa thangwi ya Yahova: “Ale anan’gopa nkhabe cinthu cinasowa iwo.” (Mas. 34:9, 10) Thangwi yanji iye alonga mafala anewa? Thangwi atumiki a Yahova nee asadikhira kuti Yahova anaatsidzikiza toera akhonde kutamba nyatwa. Ngakhale tenepo, ife tiri na cinyindiro cakuti nee tinasowa pinthu pyakufunika kuna ife. (Mas. 145:16) Pontho tinakwanisa kukhala na cinyindiro cakuti Yahova anatiphedza mu nyatwa zonsene zinatamba ife. Mwakukhonda penula, ife tinakwanisa kukomerwa na pinthu piri na ife.
17. Thangwi yanji musafuna kuwangisira toera kukomerwa na pinthu piri na imwe?
17 Yahova asafuna kuti imwe mukomerwe na pinthu piri na imwe. (Mas. 131:1, 2) Natenepa wangisirani toera mukomerwe na pinthu piri na imwe. Mungawangisira toera kukhala wakupereka takhuta, wakucepeseka na kuwangisa cidikhiro canu, imwe munakwanisa kulonga tenepa: “Inde, ine ndiri wakukomerwa—Mas. 16:5, 6.
NYIMBO 118 ‘Thimizirani Cikhulupiro Cathu’
a Mwacitsandzo, onani mu jw.org mavidhyu a nsolo wakuti Jeová Cuida dos Humildes na O Orgulho Vem Antes da Queda.
b MAFALA ANAFOKOTOZA FOTO: M’bale ali kucita basa yakusasanyira nyumba ibodzi inaphatisirwa na gulu ya Yahova, mulongo adapfundza cilongero ca manja ali kucitwa mibvundzo pa nsonkhano wa cisa, pontho m’bale ali kucita nkhani yapakweca.