NSOLO WA PFUNDZIRO 33
NYIMBO 4 ‘Yahova Ndi Nkumbizi Wanga’
Khalani na Cinyindiro Cakuti Yahova Asakufunani
“Ndakukwewera kuna ine, mbandikhala wakukhulupirika kuna iwe.”—YER. 31:3.
PINAFUNA IFE KUPFUNDZA
Tinapfundza kuti thangwi yanji ndi pyakufunika kukhala na cinyindiro cakuti Yahova asatifuna, pontho tinapfundzambo kuti tinathimizira tani cinyindiro ceneci.
1. Thangwi yanji imwe mwaperekeka kuna Yahova? (Onanimbo foto.)
MUSAKUMBUKA ntsiku idaperekeka imwe kuna Yahova? Imwe mwacita cisankhulo ceneci thangwi mwandziwa mwadidi mbamutoma kunfuna. Imwe mwapikira kuna Yahova kuti munaikha cifuno cace pa mbuto yakutoma mu umaso wanu na kunfuna na ntima wanu onsene, na umaso wanu onsene, na ndzeru zanu zonsene, pontho na mphambvu zanu zonsene. (Marko 12:30) Buluka penepo, ufuni wanu wapitiriza kukhala wakuwanga. Natenepa, munatawira tani munthu angakubvundzani tenepa: “Kodi mwandimomwene musafuna Yahova?” Mwakukhonda penula, imwe munatawira: “Ine ndisafuna Yahova kupiringana pinthu pyonsene peno anthu onsene.”
Kodi imwe musakumbuka ufuni ukhali na imwe kuna Yahova mu ndzidzi udaperekeka imwe mbamubatizwa? (Onani ndima 1)
2-3. (a) Yahova asafuna kuti tikhale na cinyindiro cipi? (Yeremiya 31:3) b) Tinapfundzanji mu nsolo uno?
2 Munatawira tani munthu angakubvundzani kuti: “Kodi muli na cinyindiro cakuti Yahova asakufunani?” Kodi imwe mbamudadembuka kutawira mbvundzo unoyu, mbamunyerezera kuti Yahova nee asakufunani? Mulongo unango wakuti akhapibva kuti nee akhafuniwa pikhali iye mwana, alonga: “Ine ndisadziwa kuti ndisafuna Yahova. Pontho ndiri na cinyindiro thangwi ya pyenepi. Mbwenye midzidzi inango ndisabvundzika: ‘Kodi Yahova asandifunadi?’” Munakhala tani na cinyindiro cakuti mwandimomwene Yahova asakufunani?
3 Yahova asafuna kuti imwe mukhale na cinyindiro cakuti iye asakufunani. (Lerini Yeremiya 31:3.) Undimomwene ndi wakuti ndi Yahova adakukwewerani kuna iye. Pidaperekeka imwe kuna Yahova mbamubatizwa, mwatambira muoni wadidi kakamwe wakuti ndi ufuni wa Yahova. Pyenepi pisabveka kuti iye asakufunani kakamwe, pontho nee anakusiyani. Ndi ufuni unoyu unacitisa Yahova kuona atumiki ace, kuphatanizambo imwe ninga ‘mbumba yakupambulika peno unthaka wakupambulika.’ (Mal. 3:17) Yahova asafuna kuti imwe mukhale na mabvero ninga akhali na mpostolo Paulu. Iye akhali na cinyindiro cakuti Yahova asanfuna, mbalemba: “Ndiri na cinyindiro consene cakuti nee kufa, nee umaso, nee aanju, nee mautongi, nee pinthu pya cincino, nee pinthu pyantsogolo, nee mphambvu, nee pinthu pyakudzulu, nee pinthu pya pantsi, nee pinthu pinango pidacitwa na Mulungu, pinakwanisa kuticimwanisa kutambira ufuni wa Mulungu.” (Aroma 8:38, 39) Mu nsolo uno, tinapfundza kuti thangwi yanji tisafunika kuwangisa cinyindiro cathu cakuti Yahova asatifuna, pontho tinapfundzambo pinthu pinafuna kutiphedza toera kucita pyenepi.
THANGWI YANJI TISAFUNIKA KUKHALA NA CINYINDIRO CAKUTI YAHOVA ASATIFUNA?
4. Tinakwanisa tani kuthimbana na ubodzi mwa misampha mikulu inaphatisira Sathani?
4 Tingakhala na cinyindiro cakuti Yahova asatifuna, tinakwanisa kupirira pakuthimbana na “manyengerero” a Sathani. (Aef. 6:11) Sathani asacita pyonsene pinakwanisa iye toera aticimwanise kutumikira Yahova. Ubodzi mwa misampha mikulu inaphatisira Sathani ndi uthambi wakuti Yahova nee asatifuna. Lekani duwala kuti Sathani asabandza miyai yonsene toera kuticimwanisa kutumikira Yahova. Kazinji kene, iye asabandza mwai mu ndzidzi wakuti tiri wakutsukwala thangwi ya pinthu pidaticitikira nduli, khala tiri kutamba nyatwa, peno khala tiri akudzudzumika thangwi ya ntsogolo. (Mis. 24:10) Sathani ndi ninga nkhalamu yakuti isabandza mwai ndzidzi wakuti cinyama cinafuna iye kudya nee ciri na citsidzikizo. Tingakhala akutsukwala, Sathani asabandza mwai unoyu toera kuticitisa kusiya kutumikira Yahova. Mbwenye tingapitiriza kuwangisa cinyindiro cathu cakuti Yahova asatifuna, tinakwanisa ‘kuthimbana’ na Sathani, pontho na manyengerero ace.—1 Ped. 5:8, 9; Tiya. 4:7.
5. Thangwi yanji tisafunika kukhala na cinyindiro cakuti Yahova asatifuna?
5 Tingakhala na cinyindiro cakuti Yahova asatifuna, tinakwanisa kuwangisa uxamwali wathu na iye. Thangwi yanji tisalonga tenepo? Thangwi Yahova aticita na cifuno cakufuna anango na cakufuniwambo. Tingafuniwa, ife tisafunambo anango. Natenepa, tingaona kuti Yahova asatifuna kakamwe, ife tinacitambo pibodzi pyene kuna iye. (1 Juw. 4:19) Pontho ife tinganfuna kakamwe, iye anacitambo pibodzi pyene kuna ife. Bhibhlya isalonga tenepa: “Fendedzerani Mulungu, iye anakufendedzeranimbo.” (Tiya. 4:8) Mphapo tinathimizira tani cinyindiro cathu cakuti Yahova asatifuna?
NINJI CINAFUNA KUTIPHEDZA TOERA KUKHALA NA CINYINDIRO CAKUTI YAHOVA ASATIFUNA?
6. Pakucita phembero, tisafunika kuphembanji toera tikwanise kukhala na cinyindiro cakuti Yahova asatifuna?
6 Citani phembero kuna Yahova ndzidzi onsene, pontho longani pinafuna imwe. (Luka 18:1; Aroma 12:12) Phembani Yahova toera mukwanise kukhala na maonero adidi thangwi ya imwe ninga munakuonani Yahova. Pingakwanisika, citani pyenepi kazinji kene pa ntsiku. Ndimomwene kuti pisakhala pyakunentsa kucita pyenepi khala tisapasika mulando kazinji kene. Mbwenye kumbukani kuti Yahova ndi wankulu kakamwe kupiringana ntima wanu. (1 Juw. 3:19, 20) Iye asakudziwani mwadidi kupiringana imwe ene; iye asaona makhaliro adidi ali na imwe akuti imwe nee musakwanisa kuaona. (1 Sam. 16:7; 2 Kro. 6:30) Lekani kusiya kucita phembero kuna Yahova toera akuphedzeni kubvesesa kuti iye asakufunani. (Mas. 62:8) Mungamala kucita phembero, musafunika kucita pinthu mwakubverana na phembero idacita imwe. Tendeni tione pinthu pyenepi.
7-8. Bukhu ya Masalmo isapangiza tani kuti Yahova asatifuna?
7 Nyindirani pinalonga Yahova. Yahova atsogolera anyakulemba Bhibhlya toera kulemba makhaliro ace. Onani pidalemba Dhavidhi pinapangiza kuti Yahova asatitsalakana: “Yahova ali dhuzi na ale anatamba nyatwa; iye asapulumusa ale akuti atsukwala.” (Mas. 34:18) Mungakhala wakutsukwala kakamwe, panango munanyerezera kuti nkhabepo anabvesesa nyatwa zanu. Mbwenye Yahova apikira kuti anakuphedzani, thangwi iye asadziwa kuti m’midzidzi ineyi, imwe musafuna ciphedzo cace. Dhavidhi alembambo kuti: “Ikhani misozi yanga mʼbudu yanu ya nthembe.” (Mas. 56:8) Yahova asaona mungatsukwala na mungatamba nyatwa. Iye asadzudzumika kakamwe thangwi iye asabvambo kupha ninga imwe. Natenepa, ninga thotho ya madzi ndi yakufunika kakamwe kuna munthu ali n’thando, misozi yathu ndi yakufunikambo kakamwe kuna Yahova. Lemba ya Masalmo 139:3, isalonga: “Imwe [Yahova] musadziwa mwadidi njira zanga zonsene.” Yahova asaona pyonsene pinacita imwe, mbwenye pinthu pyakufunika kakamwe kuna iye ndi pinthu pyadidi pinacita imwe. (Aheb. 6:10) Thangwi yanji? Thangwi iye asaona kuwangisira kunacita imwe toera kunkomeresa.a
8 Mavesi anewa acibalangazo a m’Bhibhlya, asakhala ninga Yahova ali kulonga: “Ine ndisafuna kakamwe kuti imwe mudziwe kuti ndisakufunani, pontho ndisadzudzumika thangwi ya imwe.” Ife tapfundza kuti Sathani asafuna tinyerezere kuti Yahova nee asatifuna. Natenepa, khala imwe musapenula khala Yahova asakufunani, bvundzikani: ‘Kodi ine ndisanyindira ani? Ndisanyindira “baba wa uthambi” peno “Mulungu analonga undimomwene”?’—Juw. 8:44; Mas. 31:5.
9. Ndi cinyindiro cipi cinapasa Yahova ale ananfuna? (Eksodho 20:5, 6)
9 Nyerezerani ufuni unapangiza Yahova kuna ale ananfuna. Nyerezerani pidalonga Yahova kuna Mose na kuna Aizraeli. (Lerini Eksodho 20:5, 6.) Yahova apikira kuti anapitiriza kukhala wakukoma ntima kuna ale ananfuna. Mafala anewa, asatipasa cinyindiro cakuti Yahova anapitiriza kufuna ale ananfuna. (Neh. 1:5) Natenepa mungatoma kupenula khala Yahova asakufunani, bvundzikani: ‘Ine ndisafuna Yahova?’ Khala imwe musafuna Yahova, pontho musawangisira toera kunkomeresa, Yahova asakupasani cinyindiro cakuti iye asakufunanimbo kakamwe. (Dhan. 9:4; 1 Akor. 8:3) Khala imwe nee musapenula kuti musafuna Yahova, thangwi yanji musapenula khala Yahova asakufunani? Ufuni na kukhulupirika kwa Yahova ndi pikulu kupiringana pyonsene.
10-11. Yahova asafuna kuti muone tani ciomboli? (Agalata 2:20)
10 Nyerezerani ciomboli. Ntsembe ya ciomboli ya Yezu Kristu ndi muoni ukulu kakamwe udapereka Yahova kuna anthu. (Juw. 3:16) Kodi Yezu aferambo imwe? Inde! Nyerezerani thangwi ya mpostolo Paulu. Iye akhadacita pinthu pizinji pyakuipa, mbwenye pidakhala iye Nkristu, iye akhafunika kuwangisira toera akhonde kucitabve pinthu pyenepi. (Aroma 7:24, 25; 1 Tim. 1:12-14) Mbwenye iye akhaona ciomboli ninga muoni wakupambulika udampasa Yahova. (Lerini Agalata 2:20.) Kumbukani kuti ndi Yahova adatsogolera mpostolo Paulu toera kulemba mafala anewa, pontho pinthu pyonsene piri m’Bhibhlya pyalembwa toera kutipfundzisa. (Aroma 15:4) Natenepa, mafala anewa asapangiza kuti Yahova asafuna kuti imwe muone ciomboli ninga muoni wakupambulika udakupasani iye. Mungaona ciomboli munjira ineyi, munakwanisa kukhala na cinyindiro consene cakuti Yahova asakufunani.
11 Ife tisapereka takhuta kakamwe kuna Yahova thangwi atuma mwanace pa dziko yapantsi kudzatifera. Mbwenye cinthu cinango cidacitisa Yezu kubwera pa dziko yapantsi ndi toera kupanga anango thangwi ya Mulungu. (Juw. 18:37) Yezu alongambo kuti Yahova asafuna kakamwe anace.
YEZU ASATIPHEDZA TANI TOERA TIKHALE NA CINYINDIRO CAKUTI YAHOVA ASATIFUNA?
12. Thangwi yanji tisafunika kunyindira pidalonga Yezu thangwi ya Yahova?
12 Pikhali Yezu pa dziko yapantsi, iye akhakomerwa kakamwe kupanga anthu thangwi ya makhaliro a Yahova. (Luka 10:22) Ife tiri na mathangwi adidi akunyindira pidalonga Yezu thangwi ya Yahova. Thangwi nkhabepo adakhala ndzidzi uzinji kakamwe na Yahova kupiringana Yezu. (Akol. 1:15) Yezu akhapibva kuti akhafuniwa kakamwe na Yahova. Yezu aonambo Yahova mbakapangiza ufuni kuna anthu akukhulupirika. Mphapo Yezu asatiphedza tani toera tikhale na cinyindiro cakuti Yahova asatifuna?
13. Yezu asafuna kuti tione tani Yahova?
13 Yezu asatiphedza kuona Yahova ninga munamuonera iye. M’bukhu ya Mateu, Marko, Luka na Juwau, Yezu acemera Yahova “Baba” maulendo akupiringana 100. Mu ndzidzi ukhalonga iye na anyakupfundzace, Yezu acemera Yahova “Babanu” peno “Babanu wakudzulu.” (Mat. 5:16; 6:26) Nota de estudo inagumanika pa Mateu 5:16 isalonga: “Atumiki akale adakhala pa dziko yapantsi Yezu mbadzati kubwera, akhaphatisira pidzo pyakusiyana-siyana toera kulonga Yahova. Pinango mwa pidzo pyenepi ndi ‘Wamphambvu zonsene,’ ‘Wankulu kakamwe,’ na ‘Nciti wankulu.’ Mbwenye Yezu akhaphatisira kazinji kene fala yakuti ‘Baba,’ yakuti ikhali yakukhonda nentsa na yakudziwika na anthu azinji. Natenepa, iye apangiza kuti Mulungu asafuna kuti ale anamulambira akhale na uxamwali wakuwanga kakamwe na iye.” Pyenepi pisapangiza kuti Yezu asafuna kuti ninga iye, anthu aonembo Yahova ninga Baba wakukoma ntima, pontho wakuti asafuna kakamwe anace. Cincino tendeni tione pinthu piwiri pinapangiza kuti Yezu aphatisira fala yakuti “Baba” toera kulonga Yahova.
14. Yezu apangiza tani kuti m’bodzi na m’bodzi wa ife ndi wakufunika kuna Yahova? (Mateu 10:29-31) (Onanimbo foto.)
14 Pakutoma tendeni tione pidalonga Yezu pa Mateu 10:29-31. (Lerini.) Mbalame ziwiri zing’ono zidalonga Yezu, cipo zinafuna Yahova peno kumulambira. Ngakhale tenepo, Babathu Yahova asazitsalakana, pontho asaona ibodzi na ibodzi ya izo ingagwa. Pyenepi pisapangiza kuti Yahova asatsalakana mwaufuni m’bodzi na m’bodzi wa atumiki ace. Mafala akuti “iye alengesa tsisi yonsene ya munsolo mwanu” asafokotozwa tenepa pa nota de estudo ya vesi 30: “Nakuti Yahova asadziwa kakamwe atowereri a Yezu, ngakhale mu pinthu ping’ono, pyenepi pisapangiza kuti iye asaafuna kakamwe.” Mwakukhonda penula, Yezu asafuna kuti ife tonsene tikhale na cinyindiro cakuti Yahova asatifuna kakamwe.
Yahova asatsalakana mbalame ibodzi ing’ono, pontho asadziwa ingagwa. Pyenepi pisapangiza kuti imwe ndimwe wakufunika kakamwe kuna iye, thangwi musanfuna, pontho musamulambira! (Onani ndima 14)
15. Mafala adalonga Yezu asatipfundzisanji pontho thangwi ya Yahova? (Juwau 6:44)
15 Onani ulendo unango udaphatisira Yezu fala yakuti “Baba” pa Juwau 6:44 (Lerini.) Ndi Yahova adakukwewerani kuna iye toera mudziwe undimomwene. Thangwi yanji iye acita pyenepi? Thangwi Babanu wakudzulu aona kuti imwe muli na ntima wadidi, pontho muli na makhaliro adidi. (Mabasa 13:48) Nota de estudo ya Juwau 6:44 isalonga kuti panango Yezu alandanisa mafala anewa na mafala adalonga Yeremiya anagumanika pa lemba idabuluswa nsolo uno akuti: ‘Ine ndakukwewera kuna ine mbandikhala wakukhulupirika kuna iwe.’ (Yer. 31:3; Onanimbo Ozeya 11:4.) Mafala anewa asapangiza kuti Babathu waufuni Yahova asapitiriza kuona makhaliro anu adidi, ngakhale mukhonde kwanisa kuaona.
16. (a) Ninji pinatipfundzisa Yezu thangwi ya Yahova, pontho thangwi yanji tisafunika kun’nyindira? (b) Kodi munakwanisa tani kuwangisa cinyindiro canu cakuti Yahova ndi Baba wadidi kakamwe kupiringana anthu onsene? (Onani bokosi ya nsolo wakuti ‘Baba Wadidi.’)
16 Pidacemera iye Yahova Baba, Yezu akhala ninga ali kulonga: “Yahova nee ndi Babanga basi; iye ndi Babanumbo. Ine ndiri na cinyindiro cakuti iye asakufunani kakamwe, pontho asakutsalakanani.” Khala midzidzi inango musapenula khala Yahova asakufunani, bvundzikani: ‘Nee ndi pyadidi kunyindira mafala a Yezu, wakuti asadziwa kakamwe Babathu kupiringana anthu onsene, pontho ndzidzi onsene asalonga undimomwene?’—1 Ped. 2:22.
PITIRIZANI KUWANGISA CINYINDIRO CANU
17. Thangwi yanji tisafunika kupitiriza kuwangisa cinyindiro cathu cakuti Yahova asatifuna?
17 Ife tisafunika kucita pyonsene pinakwanisa ife toera kuwangisa cinyindiro cathu cakuti Yahova asatifuna. Mu nsolo uno tapfundza kuti Sathani ndi nyamalwa wathu wakuti asafuna kuti ife tisiye kutumikira Yahova. Iye asapitiriza kucita pyonsene pinakwanisa iye toera kuticitisa kunyerezera kuti Yahova nee asatifuna. Mbwenye ife nee tisafunika kunyerezera kuti Yahova nee asatifuna.—Yobe 27:5.
18. Munacitanji toera kuwangisa cinyindiro canu cakuti Yahova asakufunani?
18 Toera kuwangisa cinyindiro canu cakuti Yahova asakufunani, pitirizani kucita phembero toera akuphedzeni kuona makhaliro anu adidi. Nyerezerani mavesi a m’Bhibhlya anapangiza kuti Yahova asakufunani, pontho kuti asatsalakana ale ananfuna. Kumbukani kuti Yahova asafuna ale ananfuna. Lekani kuduwala kuti ciomboli ndi muoni ukulu kakamwe udapereka Yahova kuna imwe. Nyindirani mafala adalonga Yezu kuti Yahova ndi Babanumbo. Natenepa, munthu angakubvundzani: “Kodi imwe muli na cinyindiro cakuti Yahova asakufunani?” Imwe munakwanisa kutawira na cinyindiro consene kuti: “Inde asandifuna! Pontho ndisacita pyonsene pinakwanisa ine ntsiku zonsene toera kupangiza kuti ndinsanfunambo.”
NYIMBO 154 Ufuni Wakukhonda Mala