Ndzidzi Onsene Citani Phembero Thangwi ya Anango

1. Tisadziwa tani kuti maphembero athu ndi akufunika kuna Yahova?

PHEMBERO ndi muoni wadidi kakamwe. Nyerezerani basi: Yahova apasa aanju mabasa anango. (Mas. 91:11) Iye apasambo Mwanace mabasa akufunika kakamwe. (Mat. 28:18) Kodi alipo adapasa iye basa yakubvesera maphembero? Nkhabe. Thangwi Yahova ndi “Nyakubva phembero.” Tingacita phembero, iye asatibvesera ekhene.—Mas. 65:2.

2. Ndi pinthu pipi pidacita mpostolo Paulu pyakuti tisafunika kupitowezera?

² Maseze tisakhala akusudzuka toera kupanga Yahova pinatinentsa, ife tisafunikambo kucita phembero thangwi ya anango. Ndi pyenepi pidacita mpostolo Paulu. Iye alembera mpingo wa ku Efeso kuti: “Ndisapitiriza kulonga pya imwe m’maphembero anga.” (Aef. 1:16) Paulu akhacitambo phembero thangwi ya munthu m’bodzi na m’bodzi. Mwacitsandzo, iye apanga Timoti: “Ndisapereka takhuta kuna Mulungu . . . ine ndisakukumbuka ndzidzi onsene unacita ine maphembero anga akudembetera, masiku na masikati.” (2 Tim. 1:3) Umaso wa Paulu ukhali wakunentsa. Iye akhatamba nyatwa, pontho akhacita phembero thangwi ya pyenepi. (2 Akor. 11:23; 12:7, 8) Ngakhale tenepo, iye akhacita phembero thangwi ya anango.

3. Thangwi yanji midzidzi inango tisaduwala kucita phembero thangwi ya anango?

³ Midzidzi inango, tisaduwala kucita phembero thangwi ya anango. Thangwi yanji? Mulongo Sabrinaa alonga thangwi ibodzi. Iye alonga: “Mu dziko ino tiri na pinthu pizinji toera kucita. Panango tinadzudzumika kakamwe na nyatwa zathu mbaticita phembero basi ene thangwi ya ife na pinthu pinatidzudzumisa.” Kodi pyenepi pisakucitikiranimbo? Khala pisakucitikirani, nsolo uno unakuphedzani toera kuona kuti (1) thangwi yanji ndi pyakufunika kucita phembero thangwi ya anango na (2) tinacita tani pyenepi.

THANGWI YANJI TISAFUNIKA KUCITA PHEMBERO THANGWI YA ANANGO?

4-5. Maphembero anacita ife thangwi ya anango, ‘anaaphedza tani’? (Tiyago 5:16)

⁴ Kucita phembero thangwi ya anango ‘kusaphedza kakamwe.’ (Lerini Tiyago 5:16.) Maphembero anacita ife thangwi ya anango, anakwanisa kuaphedza kakamwe. Yezu akhadziwa pyenepi. Nakuti iye akhadziwa kuti mpostolo Pedhru mbadankhonda, Yezu alonga: “Ndisacita maphembero akudembetera toera cikhulupiro cako cikhonde kufewa.” (Luka 22:32) Paulu akhadziwambo kuti phembero iri na mphambvu yakuphedza anango. Pikhali iye nkaidi ku Roma, iye alembera Filimoni: “Ndisadikhira kuti kubulukira m’maphembero anu, ine ndinasudzulwa toera ndibwere kuna imwe.” (Filim. 22) Pontho ndi pyenepi pidacitika. Pakupita ndzidzi ungasi, Paulu abuluswa nkaidi mbapitiriza kumwaza mphangwa.

⁵ Pyenepi nee pisabveka kuti maphembero athu asakakamiza Yahova toera kucita pinthu pyakuti nee asapifuna. Yahova asaona pinthu pinadzudzumisa atumiki ace, pontho midzidzi inango asacita pinaphemba iwo. Kudziwa pyenepi kunatiphedza toera kucita phembero na ntima onsene kuna Yahova thangwi ya pinthu pinatidzudzumisa mbatin’nyindira na kusiya pinthu m’manja mwace.—Mas. 37:5; onani 2 Akorinto 1:11 na notas de estudo.

6. Mwakubverana na mafala a abale adalongwa mu ndima, ninji pinacitika tingacita phembero thangwi ya anango? (1 Pedhru 3:8)

⁶ Kucita phembero thangwi ya anango kusatiphedza ‘toera kukhala akubvera ntsisi.’ (Lerini 1 Pedhru 3:8.) Ule anabvera ntsisi anango asadziwa nyatwa zinatamba iwo, pontho asakhala na cifuno cakupungula nyatwa zenezi. (Marko 1:40, 41) Kucita phembero thangwi ya anango kusaphedza kakamwe. Mwacitsandzo, nkulu wa mpingo anacemerwa Michael, alonga: “Ndingacita phembero thangwi ya pinthu pinafuna anango, ndisabvesesa mwadidi nyatwa zinatamba iwo, pontho pyenepi pisathimizira ufuni wanga kuna iwo. Ndisakhala na uxamwali wakuwanga na iwo maseze iwo akhonde kupidziwa.” Nkulu wa mpingo unango anacemerwa Richard alonga: “Tingacita phembero thangwi ya munthu, tisakhala na cifuno cakucita pinthu toera kumphedza. Pontho tingacita cinthu toera kumphedza, tisaphedzera kutawirwa kwa phembero yace.”

7. Kucita phembero thangwi ya anango kunatiphedza tani kukhala na maonero adidi thangwi ya nyatwa zathu? (Afilipi 2:3, 4) (Onanimbo mafoto.)

⁷ Kucita phembero thangwi ya anango kusatiphedza kukhala na maonero adidi thangwi ya nyatwa zathu. (Lerini Afilipi 2:3, 4.) Tiri kukhala mu dziko yakuti iri kutongwa na Sathani. Na thangwi ineyi, tonsene tisatamba nyatwa. (1 Juw. 5:19; Apok. 12:12) Kukhala na nsambo wakucita phembero thangwi ya anango kusatikumbusa kuti “abale [athu] onsene pa dziko yapantsi asathimbanambo na nyatwa zibodzi zene.” (1 Ped. 5:9) Mpainiya anacemerwa Katherine alonga: “Kucita phembero thangwi ya anango kusandikumbusa kuti nee ndine basi anatamba nyatwa, pontho pyenepi pisandiphedza toera ndikhonde kunyerezera kakamwe nyatwa zanga.”

MAPHEMBERO ATHU NDI AKUFUNIKA KUNA ANANGO

8. Tisafunika kucita phembero thangwi ya ani?

⁸ Kodi tisafunika kucita phembero thangwi ya ani? Tinakwanisa kucita phembero thangwi ya misoka ya abale na alongo athu. Mwacitsandzo, ale anabva kupha, aphale na atsikana anakakamizwa toera kucita pyakuipa kuxikola, peno ale anathabuka thangwi yakukalamba. Abale na alongo athu azinji asatcingwa na acibale peno mautongi. (Mat. 10:18, 36; Mabasa 12:5) Thangwi ya uviyaviya wa ndale, anango abuluka m’manyumba mwawo. Anangombo ali kuthabuka thangwi ya pidengwa pyacibaliro. Panango nee tisadziwa m’bodzi na m’bodzi wa abale anewa, mbwenye tingacita phembero thangwi ya iwo, tisapangiza kuti tiri kubvera ntemo wa Yezu wa ‘kufunana unango na ndzace.’—Juw. 13:34.

9. Thangwi yanji tisafunika kucita phembero thangwi ya ale anatsogolera na akazi awo?

⁹ Tinakwanisambo kucita phembero thangwi ya ale anatsogolera mu gulu ya Yahova. Pyenepi pisaphataniza Mathubo Akutonga, anyakuphedza awo, abale a Komiti ya Filiali, ayang’aniri m’mabheteli, ayang’aniri a cisa, akulu a mpingo na atumiki akutumikira. Abale anewa asaphata basa mwakuwanga toera kutitsalakana, pontho ninga ife, iwo ali na pinthu pinaadzudzumisa. (2 Akor. 12:15) Mwacitsandzo, muyang’aniri wa cisa anacemerwa Mark alonga: “Cinthu cinandinentsa kakamwe ndi kukhala kutali na anyakubalanga. Iwo ndi akukalamba, pontho asabva kupha. Ine ndisadziwa kuti m’bale wanga wankazi na mamunace asaatsalakana mwadidi. Mbwenye ndisatsukwala thangwi yakucimwana kucita pizinji toera kuphedza anyakubalanga.” Midzidzi inango nee tisadziwa nyatwa zinatamba abale anewa. Mbwenye ndi pyakufunika kucita phembero thangwi ya iwo. (1 Ates. 5:12, 13) Kusiyapo pyenepi, tinakwanisa kucita phembero thangwi ya akazi awo, thangwi asaaphedza toera akwanise kupitiriza kucita mabasa awo.

10-11. Tisadziwa tani kuti maphembero anacita ife toera Yahova aphedze misoka ya abale azinji asantsandzayisa?

¹⁰ Ife taona kuti kazinji kene tisacita phembero thangwi ya misoka ya abale na alongo azinji mu ndzidzi ubodzi ene. Mwacitsandzo, maseze tikhonde kunyerezera dzina ya munthu, midzidzi inango tisaphemba Yahova toera aphedze ale ali nkaidi peno adaferwa. Nkulu wa mpingo anacemerwa Donald alonga: “Abale na alongo azinji kakamwe ali kutamba nyatwa, pontho midzidzi inango tisacita phembero toera Yahova aphedze onsene.”

¹¹ Kodi maphembero anewa asatsandzayisa Yahova? Inde! Thangwi ife nee tisadziwa pinthu pyonsene pinafuna abale na alongo athu. Natenepa, nee ndi pyakuipa kucita maphembero toera Yahova aphedze abale na alongo athu onsene anatamba nyatwa. (Juw. 17:20; Aef. 6:18) Maphembero anewa asapangiza kuti ‘tisafuna nsoka onsene wa abale athu.’—1 Ped. 2:17.

CITANI PHEMBERO THANGWI YA MUNTHU M’BODZI NA M’BODZI

12. Thangwi yanji ndi pyakufunika kuonesesa mwadidi toera kucita phembero thangwi ya abale na alongo athu?

¹² Khalani wakuonesesa. Kusiyapo kucita phembero thangwi ya misoka ya abale na alongo azinji ndzidzi ubodzi ene, tisafunikambo kucita phembero thangwi ya m’bodzi na m’bodzi wa iwo. Kodi mu mpingo mwanu muli na m’bale peno mulongo wakuti ali kuthabuka na utenda? Muli na m’phale peno ntsikana wakuti ali wakutsukwala panango thangwi ya mikakamizo yakucita pinthu pyakuipa kuxikola? Musadziwa m’bale peno mulongo anawangisira toera kukuza mwanace ekhene “mwakubverana na pinalonga Yahova”? (Aef. 6:4) Mungaonesesa mwadidi, munakwanisa kubvera ntsisi anango, pontho pyenepi pinakucitisani kulonga madzina awo m’maphembero anu.b—Aroma 12:15.

13. Ninji pinafuna kutiphedza toera kulonga madzina a abale na alongo akuti nee tisaadziwa pakucita phembero?

¹³ Citani phembero thangwi ya m’bale mbamulonga dzina yace. Ife tinakwanisa kucita pyenepi, ngakhale na abale akuti nee tisaadziwa. Mwacitsandzo, abale na alongo azinji ku Cingapura, Crimea, Eritreya na Rusya afungirwa nkaidi. Mu saiti yathu jw.org, tinakwanisa kugumana ndandanda ya madzina a abale anewa.c Muyang’aniri wa cisa anacemerwa Brian alonga: “Ine ndaona kuti kulemba dzina ya m’bale adafungirwa nkaidi, buluka penepo mbandiilonga mwakugaluza, pisandiphedza toera kukumbuka m’bale unoyu mbandimulonga m’maphembero anga.”

14-15. Ninji pinafuna kutiphedza toera tilonge pinthu pinafuna ife kuti Yahova apicite kuna abale na alongo anacitira ife phembero?

¹⁴ Longani cinthu cinafuna imwe kuti Yahova acicite kuna iwo. Michael, adalongwa mu ndima 6 alonga tenepa: “Ndingaleri mu jw.org pinacitikira abale na alongo adafungirwa nkaidi, ndisayesera kunyerezera kuti mbandidapibva tani mbidakhala ndine. Mwakukhonda penula, ine mbandidadzudzumika na nkazanga, pontho mbidafuna kucita masasanyiro toera munthu antsalakane. Pyenepi pisandiphedza toera kulonga cinthu cinafuna ine kuti Yahova acicite kuna abale akumanga banja akuti afungirwa nkaidi.”—Aheb. 13:3, cidzindikiro capantsi.

¹⁵ Kuyesera kunyerezera pinthu pinacitikira abale na alongo athu adafungirwa nkaidi, kunatiphedza toera kulonga pinthu pinafuna ife kuti Yahova aaphedze. Mwacitsandzo, tinakwanisa kuphemba Yahova toera aaphedze kuti anyakuonera kaidi atsalakane mwadidi abale na alongo athu, pontho toera mautongi aatawirise kulambira Yahova. (1 Tim. 2:1, 2) Tinakwanisambo kuphemba toera pinthu pinacita iwo piwangise abale na alongo a mu mpingo wawo, pontho toera anthu akuti nee asatumikira Yahova aone makhaliro awo adidi mbafuna kubvesera mphangwa zathu. (1 Ped. 2:12) Ndimomwene kuti pyenepi nee pinaphedza tingacita phembero thangwi ya abale akuti ali kutamba nyatwa zakusiyana. Mbwenye tingaonesesa mwadidi, kulonga dzina ya m’bale peno mulongo pakucita phembero na kuphemba cinthu cinafuna ife kuti Yahova amphedze, tisapangiza ‘ufuni kuna unango na ndzace.’—1 Ates. 3:12.

KHALANI NA MAONERO ADIDI THANGWI YA MAPHEMBERO ANU

16. Ndi maonero api adidi anafunika ife kukhala nawo thangwi ya maphembero athu? (Mateu 6:8)

¹⁶ Ife taona kuti maphembero athu anakwanisa kuphedza munthu. Mbwenye tisafunika kukhala na maonero adidi thangwi ya maphembero anewa. Tingacita phembero nee tiri kupanga Yahova pinthu pyakuti iye nee asapidziwa. Pontho iye nee asafuna uphungu wathu toera kudziwa pinafunika iye kucita toera kumalisa nyatwa ya munthu. Yahova asadziwa pinthu pinafuna atumiki ace, ngakhale iwo mbadzati kupidziwa peno ife mbatidzati kupidziwa. (Lerini Mateu 6:8.) Mphapo thangwi yanji tisafunika kucita phembero thangwi ya anango? Kusiyapo mathangwi adaona ife, tingacita phembero thangwi ya anango, tisapangiza kuti tisaafuna. Pontho Yahova asatsandzaya angaona atumiki ace mbakapangiza ufuni ninga iye.

17-18. Ndi citsandzo cipi cakuti cinatiphedza toera kukhala na maonero adidi thangwi ya maphembero athu?

¹⁷ Midzidzi inango, panango pinaoneka ninga maphembero athu nee ali kuphedza. Ngakhale tenepo, iwo asapangiza kuti tisafuna abale na alongo athu, pontho Yahova asaona pyenepi. Nyerezerani banja yakuti iri na ana awiri: M’phale m’bodzi na ntsikana m’bodzi. M’phale ali kuduwala kakamwe. Ntsikana asaphemba pai wace: “Ndaphata miyendo, citani pinthu toera kuphedza m’bale wanga; iye ali kuduwala kakamwe!” Pai akhacita kale pyenepi thangwi iye asafuna mwanace. Mbwenye asatsandzaya kakamwe angaona kuti mwanace ali wakudzudzumika thangwi ya m’bale wace mbaphemba ciphedzo.

¹⁸ Ndi pyenepi pinafuna Yahova kuti ife ticite. Iye asafuna kuti titsalakanane mbaticita phembero thangwi ya unango na ndzace. Tingacita pyenepi tisapangiza kuti nee tisanyerezera basi ene pya ife, mbwenye tisafuna kakamwe abale na alongo athu. Pontho Yahova asaona pyenepi. (2 Ates. 1:3; Aheb. 6:10) Ife tapfundza kuti midzidzi inango maphembero athu anaphedza munthu. Natenepa nee tisafunika kuduwala kucita phembero thangwi ya unango na ndzace.