Atongi

1 Pidafa Yoswa,+ Aizraeli* abvundza Yahova:+ “Mwa ife, mbani anafuna toma kuenda kamenyana na Akanani?” 2 Yahova atawira: “Ndi dzindza ya Yuda inafuna kuenda.+ Onani! Ine ndinapereka* dziko ineyi mʼmanja mwawo.” 3 Natenepa, dzindza ya Yuda yapanga abale awo a dzindza ya Simeoni: “Tendeni pabodzi ku dziko+ idapaswa ife toera kamenyana na Akanani. Buluka penepo, ife tinadzaendambo pabodzi na imwe ku dziko idapaswa imwe.” Natenepa, dzindza ya Simeoni yaenda pabodzi na iwo.

4 Pidaenda dzindza ya Yuda, Yahova apereka Akanani na Aperesi mʼmanja mwawo,+ pontho iwo akunda amuna akukwana 10.000 ku Bhezeki. 5 Iwo agumana Adhoni-Bhezeki ku Bhezeki, pontho kweneko iwo amenyana naye, mbakunda Akanani+ na Aperesi.+ 6 Pidathawa Adhoni-Bhezeki, iwo antowera mbamʼphata, penepo iwo anʼgwanda pyala pikulu pya mʼmanja na pyala pikulu pya mʼmiyendo. 7 Penepo, Adhoni-Bhezeki alonga: “Pana amambo 70 adagwandwa pyala pikulu pya mʼmanja na pyala pikulu pya mʼmiyendo akuti asalokotera cakudya cinagwa pantsi pameza yanga. Mulungu andibwezera mwakubverana na pidacita ine.” Buluka penepo, iwo ankwata mbaenda naye ku Yerusalemu,+ iye afera kweneko.

8 Kusiyapo pyenepi, amuna a Yuda amenyana na nzinda wa Yerusalemu+ mbaukwata, iwo apha anthu a mwenemo na supada, mbapisa na moto nzinda unoyu. 9 Buluka penepo, amuna a Yuda aenda kamenyana na Akanani akuti akakhala kucisa ca mapiri, ku Nejebhu na ku Sefela.+ 10 Natenepa, dzindza ya Yuda yaenda kamenyana na Akanani akuti akakhala ku Ebhroni (dzina yakuti Ebhroni kale ikhacemerwa Kiriyati-Arbha), iwo apha Sesai, Akimani na Talimai.+

11 Iwo abuluka kweneko, mbaenda kamenyana na anthu a ku Dhebhiri. (Dzina yakuti Dhebhiri+ kale ikhacemerwa Kiriyati-Seferi.)+ 12 Natenepa Kalebe+ alonga: “Munthu anakwanisa kukunda nzinda wa Kiriyati-Seferi mbaukwata, ndinampasa mwananga Akisa toera akhale nkazace.”+ 13 Otiniyeli+ mwana wa Kenazi,+ ngʼono wace Kalebe aukunda. Natenepa, Kalebe ampasa Akisa toera akhale nkazace. 14 Akisa pikhaenda iye kunyumba kwa mamunace, akakamiza mamunace toera aphembe munda Kalebe wakuti ndi babace. Natenepa, Akisa atcita pa buru. Penepo Kalebe ambvundza: “Ninji pinafuna iwe?” 15 Iye antawira: “Ndaphata miyendo, ndipaseni muoni, nakuti mwandipasa mbuto kunterero,* ndipasenimbo Guloti-Maimu.”* Natenepa, Kalebe ampasa Guloti wa Kunthunda na Guloti wa ku Materero.

16 Pontho anthu a dzindza ya Keneu,+ tebzwalace+ Mose, abuluka ku nzinda wa miti+ ya micindu pabodzi na mbumba ya Yuda mbaenda mpaka kuthando ya Yuda, kunterero kwa Aradhi.+ Iwo aenda kweneko mbakhala pakati pa mbumba.+ 17 Mbwenye dzindza ya Yuda na abale awo a dzindza ya Simeoni aenda, iwo apha Akanani akuti akakhala ku Zefati, mbafudza+ nzinda. Natenepa, iwo apasa nzinda unoyu dzina yakuti Orma.*+ 18 Buluka penepo, dzindza ya Yuda yakwata Gaza+ na pisa pyace, Asikaloni+ na pisa pyace, pontho akwata Ekroni+ na pisa pyace. 19 Yahova akhali na dzindza ya Yuda, natenepa iwo akwata cisa ca mapiri, mbwenye iwo nee athamangisa anthu a kunterero, thangwi akhali na ngolo za nkhondo zakuti zikhali na masikeya a utale.*+ 20 Iwo apereka Ebhroni kuna Kalebe, mwakubverana na pikhadapikira+ Mose, pontho Kalebe athamangisa ana atatu a Anaki+ akakhala mwenemo.

21 Mbwenye dzindza ya Bhenjamini nee yathamangisa Ayebusi akakhala mu Yerusalemu, natenepa Ayebusi asapitiriza kukhala na dzindza ya Bhenjamini mu Yerusalemu mpaka lero.+

22 Pa ndzidzi unoyu, anthu a mʼbanja ya Zuze+ aenda kamenyana na nzinda wa Bheteli, pontho Yahova akhali na iwo.+ 23 Anthu a mʼbanja ya Zuze atuma amuna toera kuenda kaona nzinda wa Bheteli (kale nzinda unoyu ukhacemerwa Luzi),+ 24 ale adaenda kaona nzinda, aona mamuna mbakabuluka mu nzinda. Natenepa iwo ampanga: “Taphata miyendo, tipangize kuti tinapita tani mu nzinda, ife tinadzakukomera ntima.” 25 Natenepa, mamuna unoyu aapangiza kuti anapita tani mu nzinda, penepo iwo apha anthu a mu nzinda unoyu na supada, mbwenye iwo nee apha+ mamuna unoyu pabodzi na banja yace yonsene. 26 Mamuna unoyu aenda ku dziko ya Aeti, amanga nzinda mbaupasa dzina ya Luzi, nzinda unoyu usapitiriza kucemerwa na dzina ineyi mpaka lero.

27 Manase nee akwata nzinda wa Bheti-Seyani na pisa pya cifupi na kweneku, Tanaki+ na pisa pya cifupi na kweneku, anthu a ku Dhori na pisa pya cifupi na kweneku, anthu a ku Ibheleamu na pisa pya cifupi na kweneku kuphatanizambo Mejidho na pisa+ pya cifupi na kweneku. Akanani akhakakamira kukhala mu dziko ineyi. 28 Aizraeli pidakhala iwo amphambvu, atoma kuphatisa basa Akanani ninga mabitcu,+ mbwenye nee athamangisa onsene mu dziko ineyi.+

29 Dzindza ya Efraimu nee yathamangisambo Akanani akakhala ku Jezeri. Akanani apitiriza kukhala na iwo ku Jezeri.+

30 Dzindza ya Zebhuloni nee yathamangisa anthu akakhala ku Kitroni na ku Naaloli.+ Akanani apitiriza kukhala na iwo mbaphatiswa basa ninga mabitcu.+

31 Dzindza ya Azeri nee yathamangisa anthu akakhala ku Ako na anthu a ku Sidhoni,+ ku Alabhi, ku Akizibhi,+ ku Elbha, ku Afiki+ na ku Reobhi.+ 32 Natenepa dzindza ya Azeri yapitiriza kukhala na Akanani akuti akakhala mu dziko ineyi, thangwi iwo nee akhadaathamangisa.

33 Dzindza ya Nafitali nee yathamangisa anthu akakhala ku Bheti-Semesi na ku Bheti-Anati,+ mbwenye iwo apitiriza kukhala na Akanani mu dziko+ ineyi. Anthu a ku Bheti-Semesi na a ku Bheti-Anati adzaphatiswa basa na iwo ninga mabitcu.

34 Aamori nee atawirisa dzindza ya Dhani kutcitira kunterero,+ natenepa iwo akakamizwa toera akhale kucisa ca mapiri. 35 Na thangwi ineyi, Aamori akakamira kukhala Kuphiri ya Eresi, mu nzinda wa Aijaloni+ na mu nzinda wa Salbhimu.+ Mbwenye anthu a mʼbanja ya Zuze pidakhala iwo amphambvu, Aamori atoma kuphatiswa basa ninga mabitcu. 36 Cisa ca Aamori cikhatomera kunthunda ya Akirabhimu+ na ku Sela, mbacienda kunkwiriro.