Atongi
2 Natenepa anju+ wa Yahova abuluka ku Jiligale+ aenda ku Bhokimu mbalonga: “Ine ndakubulusani ku Ejitu mbandikupitisani mu dziko idadumbira ine kuna ambuyanu.+ Kusiyapo pyenepi, ndakupangani kuti: ‘Ine cipo ndinadzafudza cibverano cidacita ine na imwe.+ 2 Imwe nee musafunika kucita cibverano na anthu a mu dziko+ ino, pontho musafunika kugomola maguwa+ awo.’ Mbwenye imwe nee mwabvera pidalonga+ ine. Thangwi yanji imwe mwacita pyenepi? 3 Na thangwi ineyi ine ndalongambo kuti: ‘Ine nee ndinadzaathamangisa pamaso panu,+ iwo anadzakhala nsampha kuna imwe,+ pontho alungu awo anadzakupeusani.’”+
4 Anju wa Yahova pidalonga iye mafala anewa kuna Aizraeli onsene, mbumba yatoma kulira mwakugaluza. 5 Natenepa mbuto ineyi iwo aipasa dzina ya Bhokimu,* pontho kweneko iwo apereka ntsembe kuna Yahova.
6 Yoswa pidapanga iye mbumba ya Izraeli toera iende, mʼbodzi na mʼbodzi aenda ku mbuto idapaswa iye ninga unthaka, mbakwata dziko+ mbikhala yawo. 7 Mbumba yapitiriza kutumikira Yahova mu ntsiku zonsene za umaso wa Yoswa na mu ntsiku zonsene za umaso wa akulu adapitiriza kukhala mʼmaso pidafa Yoswa, pontho akuti aona pinthu pyonsene pikulu pidacita Yahova kuna Aizraeli.+ 8 Buluka penepo, Yoswa mwana wa Nuni, ntumiki wa Yahova, afa na pyaka 110+ pyakubalwa. 9 Natenepa, iwo amuikha ku mbuto idapaswa iye ninga unthaka, ku Timati-Eresi+ cisa ca mapiri ca Efraimu, kunkwiriro kwa Phiri ya Gasi.+ 10 Anthu onsene adakhala mʼmaso mu ntsiku za Yoswa afambo, buluka penepo, aoneka anthu anango akuti nee akhadziwa Yahova, pontho nee akhadziwa pinthu pidacitira iye Aizraeli.
11 Natenepa, Aizraeli acita pinthu pyakuipa pamaso pa Yahova mbatumikira* Abhaale.+ 12 Iwo asiya Yahova Mulungu wa ababawo, ule adaabulusa mu dziko ya Ejitu,+ mbatumikira alungu anango, alungu a mbumba zikakhala dhuzi na iwo;+ pontho iwo aagodamira mbatsukwalisa Yahova.+ 13 Iwo asiya Yahova mbatumikira Bhaale na madzimunthu+ a Astoreti. 14 Penepo Yahova aipirwa kakamwe na Aizraeli, natenepa iye atawirisa kuti anyamalwa awo aakunde+ mbakwata pinthu pyawo,+ pontho iwo nee akhakwanisabve kuthimbana na anyamalwa awo.+ 15 Konsene kukhaenda iwo Yahova* akhaathabusa, mbaabweresera nyatwa+ mwakubverana na pidalonga Yahova, pontho mwakubverana na pidadumbira Yahova kuna iwo.+ Aizraeli akhali pa nyatwa ikulu kakamwe.+ 16 Natenepa, Yahova akhaapasa anyakutonga miseru toera kuapulumusa mʼmanja mwa anyamalwa awo.+
17 Mbwenye Aizraeli akhonda kubvera ngakhale anyakutonga miseru, pontho iwo akhalambira* alungu anango mbaagodamira. Iwo asiya mwakucimbiza njira ikhafamba ambuyawo akuti akhabvera matongero a Yahova.+ Iwo nee acita ninga pikhacita ambuyawo. 18 Ndzidzi onsene ukhaapasa Yahova nyakutonga miseru,+ Yahova akhali na nyakutonga miseru unoyu, mbaapulumusa mʼmanja mwa anyamalwa awo mu ntsiku zonsene za nyakutonga miseru unoyu; Yahova akhaabvera ntsisi+ pikhabulira iwo thangwi ya ale akhaaponderera+ na ale akhaatsalakana mwakuipa.
19 Mbwenye nyakutonga miseru angafa, iwo akhacita pontho pinthu pyakuipa kakamwe kupiringana ababawo. Pinthu pyenepi pikhali kutumikira na kulambira alungu+ anango. Iwo nee asiya macitiro awo na makhaliro awo akukhonda bvera. 20 Pakumalisa, Yahova aipirwa kakamwe na Aizraeli,+ mbalonga: “Nakuti mbumba iyi nee yatoweza cibverano+ canga cidacita ine na ambuyawo, pontho nee yandibvera,+ 21 ine nkhabebve kuthamangisa pamaso pawo, nee dzindza ibodzi mwa madzindza adasiya Yoswa pidafa+ iye. 22 Pyenepi ndi toera kuona khala Aizraeli anafamba munjira+ idaapangiza ine Yahova, ninga pidacita ababawo.” 23 Natenepa Yahova atawirisa madzindza anewa kuti apitirize kukhalapo. Iye nee aathamangisa mwakucimbiza, pontho nee aapereka mʼmanja mwa Yoswa.