Atongi

17 Kucisa ca mapiri ca ku Efraimu+ kukhali mamuna mʼbodzi akhacemerwa Mika. 2 Iye apanga mai wace: “Kodi musakumbuka kobiri 1.100 za parata zidaberwa imwe mbamupasa dzedze munthu adakuberani pamaso panga? Kobiri zenezi za parata ziri na ine. Ndine adazikwata.” Penepo mai wace alonga: “Yahova akupase nkhombo mwananga.” 3 Natenepa iye abwezera mai wace kobiri 1.100 za parata, mbwenye mai wace alonga: “Mwakukhonda penula, ndinapereka* kobiri zenezi kuna Yahova toera mwananga aziphatisire pakucita dzimunthu yakusemwa na dzimunthu ya utale.*+ Natenepa kobiri zenezi ndiri kuzibweza pontho kuna iwe.”

4 Pidamala iye kubwezera kobiri kuna mai wace, mai wace akwata kobiri 200 za parata, mbazipereka kuna mesiri anacita pinthu pya parata. Mesiri unoyu acita dzimunthu yakusemwa na dzimunthu ya utale;* madzimunthu anewa aikhwa nʼnyumba mwa Mika. 5 Mika akhali na nyumba ya alungu. Iye acita efodhi*+ na madzimunthu a panyumba,*+ mbakhazikisa* mwanace mʼbodzi toera atumikire ninga nyantsembe wace.+ 6 Mu ntsiku zenezi, mu Izraeli+ nee mukhali na mambo. Mʼbodzi na mʼbodzi akhacita pinthu pikhafuna iye.*+

7 Ku Bhetelehemu+ wa ku Yuda kukhali mʼphale mʼbodzi wa banja ya Yuda. Iye akhali Mulevi+ wakuti akakhala kweneko mu ndzidzi ungasi. 8 Mʼphale unoyu abuluka mu nzinda wa Bhetelehemu wa ku Yuda toera kusaka mbuto yakukhala. Pikhafamba iye, afika panyumba ya Mika,+ kucisa ca mapiri ca ku Efraimu. 9 Natenepa Mika ambvundza: “Wabuluka kupi?” Iye atawira: “Ndine Mulevi. Ndabuluka ku Bhetelehemu wa ku Yuda, pontho ndikusaka mbuto toera kukhala.” 10 Penepo Mika ampanga: “Khala na ine toera ukhale phungu* na nyantsembe wanga. Ndinadzakupasa kobiri khumi za parata pa caka, ndinakupasambo nguwo na cakudya.” Natenepa Mulevi unoyu apita nʼnyumba. 11 Mulevi atawira kukhala na Mika, pontho iye adzakhala ninga mʼbodzi wa anace. 12 Kusiyapo pyenepi, Mika akhazikisa* Mulevi unoyu toera atumikire ninga nyantsembe wace,+ pontho iye akakhala panyumba ya Mika. 13 Penepo Mika alonga: “Cincino ndisadziwa kuti Yahova anandipasa nkhombo thangwi Mulevi adzakhala nyantsembe wanga.”