Atongi

19 Mu ntsiku zenezi, mu Izraeli+ nee mukhali na mambo, Mulevi mʼbodzi wakuti akakhala khundu yakutali ya cisa ca mapiri ca ku Efraimu+ akwata nkazi ku Bhetelehemu+ wa ku Yuda toera akhale nkazace.* 2 Mbwenye nkazace nee akhali wakukhulupirika kuna iye, asiya mamunace mbaenda kuna babace ku Bhetelehemu wa ku Yuda. Iye akhala kweneko miyezi minai. 3 Buluka penepo, mamunace aenda kansembedzera toera abwerere; iye akwata nyabasa wace na maburu mawiri mbaenda nawo. Pidafika iwo, nkazi ampitisa nʼnyumba mwa babace. Penepo babace nkazi akomerwa kakamwe pidaona iye nkamwene wace. 4 Natenepa tebzwalace, babace ntsikana, amʼphemba toera akhale pabodzi na iye ntsiku zitatu; iwo akhadya, akhamwa, pontho iye akhagona penepo.

5 Pa ntsiku yacinai, pidalamuka iwo namacibese kakamwe toera kuenda, babace ntsikana unoyu apanga nkamwene wace: “Tomani kudya pangʼono toera mukhale na mphambvu, mungamala munaenda.” 6 Natenepa iwo akhala pantsi, adya mbamwa pabodzi; buluka penepo babace ntsikana ampanga: “Ndaphata miyendo, khalani pano masiku ano mbamutsandzaya.” 7 Pidalamuka nkamwene toera kuenda, tebzwalace apitiriza kunʼdembetera, natenepa iye agona pontho ntsiku ibodzi.

8 Pidalamuka iye namacibese kakamwe pa ntsiku yacixanu toera kuenda, babace ntsikana ampanga: “Tomani kudya pangʼono toera mukhale na mphambvu.” Iwo akhala penepo mpaka maulo, pontho uwiri wawo apitiriza kudya. 9 Pidalamuka mamuna toera kuenda na nkazace pabodzi na nyabasa wace, tebzwalace wakuti ndi babace ntsikana, ampanga: “Onani! Kunja kwadoka. Taphata miyendo, gonani pano masiku ano. Dzuwa inabira cincino. Khalani pano masiku ano mbamutsandzaya. Mangwana namacibese ene munalamuka mbamuenda kunyumba* kwanu.” 10 Mbwenye mamuna unoyu nee atawirabve kugona, natenepa alamuka mbaenda mpaka ku Yebusi, kwakuti ndi ku Yerusalemu.+ Iye akhali na maburu mawiri, nkazace na nyabasa wace.

11 Pikhali iwo dhuzi na ku Yebusi, dzuwa ikhadasala pangʼono toera kudoka. Natenepa nyabasa abvundza mbuyace: “Tilimire mu nzinda wa Ayebusi toera tigone mwenemu?” 12 Mbwenye mbuyace antawira: “Ife nee tisafunika kulimira mu nzinda wa anthu akuti nee ndi Aizraeli. Tendeni tipitirize na ulendo wathu mpaka ku Jibheya.”+ 13 Buluka penepo iye apanga nyabasa wace: “Tendeni tiwangisire tifike ku Jibheya peno ku Rama+ toera tikagone mu nzinda ubodzi mwa mizinda ineyi.” 14 Natenepa iwo apitiriza na ulendo wawo, pontho mu ndzidzi ukhadoka dzuwa iwo akhali dhuzi na nzinda wa Jibheya, wakuti ndi wa Bhenjamini.

15 Natenepa iwo afika ku Jibheya mbapita mu nzinda toera kugona mwenemo. Pidapita iwo mu nzinda, akhala pa mbuto yapakweca, mbwenye nkhabepo munthu adaakwata toera akagone kunyumba kwace.+ 16 Pyacitika kuti pikhadoka dzuwa, mamuna mʼbodzi wakugwesera akhabuluka kumunda kwace. Iye akhali wa kucisa ca mapiri ca ku Efraimu,+ pontho iye akakhala mu Jibheya, mbwenye anthu akakhala mu nzinda unoyu akhali a dzindza ya Bhenjamini.+ 17 Pidaona iye mamuna unoyu pa mbuto yapakweca ya mu nzinda, ambvundza: “Mwabuluka kupi, pontho muli kuenda kupi?” 18 Iye atawira: “Tikubuluka ku Bhetelehemu wa ku Yuda, tenepa tiri kuenda khundu yakutali ya cisa ca mapiri ca ku Efraimu, kwathu ndi kweneku. Ndikhadaenda ku Bhetelehemu wa ku Yuda,+ tenepa ndiri kuenda kunyumba ya Yahova,* mbwenye nkhabepo munthu adandikwata toera kuenda kunyumba kwace. 19 Ife tiri na cakudya cakukwana toera kupasa maburu athu,+ pontho tiri na nkate+ na vinyu yanga, ya nkazanga na ya nyabasa wathu. Tiri na pyonsene pinafuna ife.” 20 Mbwenye mamuna unoyu wakugwesera alonga: “Ntendere mbukhale na imwe! Ndinakupasani pyonsene pinafuna imwe. Basi ene lekani kugona pa mbuto yapakweca ya mu nzinda.” 21 Natenepa iye aakwata mbaenda nawo kunyumba kwace, pontho apasa pyakudya* maburu ace. Buluka penepo iye atsuka miyendo yawo, adya, mbamwa.

22 Mu ndzidzi ukhatsandzaya iwo, amuna akuipa a mu nzinda azungulira nyumba mbatoma kumenya nsuwo, pontho akhapanga mamuna wakugwesera wakuti ndi mwanaciro nyumba: “Bulusa mamuna adapita nʼnyumba mwako, toera ife tipite naye mʼmabonde.”+ 23 Penepo mwanaciro nyumba abuluka kunja mbaapanga: “Abale anga, lekani kucita pinthu pyenepi pyakuipa. Ndaphata miyendo, mamuna unoyu ndi mulendo wanga. Lekani kucita pinthu pyenepi pyakupasa manyadzo. 24 Ndiri na mwananga wa mwali na nkazi wa mamuna ali nʼnyumba mwanga. Ndinaabulusa kunja toera mucite nawo pinafuna imwe.*+ Mbwenye lekani kucita pinthu pyakuipa kuna mamuna uyu.”

25 Mbwenye amuna anewa nee ambvera, natenepa Mulevi aphata nkazace+ mbampereka kuna iwo. Iwo apita naye mʼmabonde mwakukakamiza mbanʼthabusa masiku onsene mpaka mʼbambakuca. Mukhaca kunja iwo ansiya toera aende. 26 Namacibese kakamwe, nkazi afika mbagwa pansuwo wa nyumba ikhali mamunace* yakuti ndi ya mamuna wakugwesera, iye apitiriza penepo mpaka dzuwa kubuluka. 27 Pidalamuka mamunace* namacibese mbafungula nsuwo toera acite ulendo wace, aona nkazace ali thasa pansuwo wa nyumba, manja ace mbatsamira pantsi pansuwo. 28 Natenepa iye ampanga: “Lamuka toera tiende.” Mbwenye nkazace nee atawira. Penepo mamunace ankwiza pa buru mbaenda naye kunyumba kwace.

29 Pidafika iye kunyumba kwace, akwata mpeni, mbagwanda-gwanda nkazace mapindi 12, buluka penepo atumiza mapindi anewa kuna madzindza onsene a Izraeli. 30 Anthu onsene adaona pyenepi alonga: “Pinthu pyenepi cipo pyacitika kale peno kuoneka kutomera ntsiku idabuluka Aizraeli mu dziko ya Ejitu mpaka lero. Nyerezerani pyenepi, cedzani,+ buluka penepo tipangeni pidanyerezera imwe.”