Rute
1 Mu ndzidzi ukhatonga anyakutonga miseru,+ mu Izraeli mwaoneka njala; mamuna mʼbodzi na nkazace pabodzi na anace awiri afuluka ku Bhetelehemu+ wa ku Yuda, mbaenda kakhala ku Moabhe.+ 2 Mamuna unoyu dzina yace ikhali Elimeleki,* nkazace akhali Noemi,* anace awiri akhali Maloni* na Kiliyoni.* Iwo akhali a ku Efrata, ku Bhetelehemu wa ku Yuda. Afika ku dziko ya Moabhe mbakhala kweneko.
3 Pidapita ndzidzi ungasi Elimeleki mamunace Noemi afa, mbasiya nkazace na anace awiri. 4 Mukupita kwa ndzidzi anace asemba akazi a ku Moabhe; mʼbodzi akhacemerwa Orpa, unango akhacemerwa Rute.+ Iwo akhala kweneko cifupi na pyaka khumi. 5 Buluka penepo, Maloni na Kiliyoni afambo, Noemi mbasala ekha, nee ana, nee mamuna. 6 Natenepa iye pabodzi na akwenyace abuluka ku dziko ya Moabhe, thangwi abva kuti Yahova atoma pontho kutsalakana mbumba yace, mbaipasa cakudya.*
7 Noemi abuluka kukakhala iye pabodzi na akwenyace. Pikhabwerera iwo ku Yuda, 8 Noemi apanga akwenyace: “Bwererani, mʼbodzi na mʼbodzi mbaende kuna mai wace. Yahova mbapangize ufuni kuna imwe+ ninga udapangiza imwe kuna amunanu adamala kufa na kuna ine. 9 Yahova akupaseni amuna toera mukhale na umaso wakutsidzikizika mʼmabanja mwanu.”+ Buluka penepo iye aampswompswona, iwo mbatoma kulira mwakugaluza. 10 Pontho iwo akhapanga Noemi: “Nkhabe! Ife tinaenda pabodzi na imwe kuna mbumba yanu.” 11 Mbwenye Noemi aapanga: “Bwererani ananga. Thangwi yanji musafuna kuenda pabodzi na ine? Kodi ine ndinakwanisa kubala pontho ana toera akhale amunanu?+ 12 Bwererani ananga. Bwererani, thangwi ine ndakalamba kakamwe, nee ndinakwanisabve kumanga banja. Ngakhale ndisembwe masiku ano mbandibala ana, 13 mbamudakwanisa kuadikhira mpaka kukula kwawo? Mbamudakhala nee kumanga banja thangwi ya iwo? Nkhabe ananga, ine ndiri wakutsukwala kakamwe na imwe, thangwi djanja ya Yahova yandithabusa.”+
14 Iwo alira pontho mwakugaluza, buluka penepo Orpa ampswompswona mebzwalace mbabwerera. Mbwenye Rute apitiriza na mebzwalace. 15 Natenepa Noemi alonga: “Ona! Orpa abwerera kuna mbumba yace na kuna alungu ace. Bwerera pabodzi na iye.”
16 Mbwenye Rute atawira: “Lekani kundikakamiza toera ndisiyane na imwe mbandibwerera; thangwi kunaenda imwe ine ndinaendambo, kunafuna kugona imwe, ndinagonambo kweneko. Mbumba yanu inadzakhala mbumba yanga, pontho Mulungu wanu anadzakhala Mulungu wanga.+ 17 Kunafa imwe, ine ndinaferambo kweneko mbandiikhwa kweneko. Yahova andionese nyatwa ndingasiyana na imwe thangwi ya pinthu pinango, kusiyapo kufa.”
18 Pidaona Noemi kuti Rute akhakakamira kuenda na iye, nee ankakamizabve toera abwerere. 19 Iwo apitiriza na ulendo wawo mbafika ku Bhetelehemu.+ Pidafika iwo kwene ku Bhetelehemu, anthu onsene a mu nzinda adzumatirwa thangwi ya iwo, pontho akazi akhalonga: “Kodi uyu ndi Noemi?” 20 Mbwenye iye akhaatawira: “Lekani kundicemera Noemi.* Ndicemereni Mara,* thangwi Mulungu* andicitisa kukhala wakutsukwala kakamwe.+ 21 Ndaenda na pinthu pizinji, mbwenye Yahova andibweza cimanja-manja. Thangwi yanji musandicemera Noemi? Yahova Mulungu Wamphambvu Zonsene andizungunukira mbandionesa nyatwa.”+
22 Ineyi ndi njira idabwerera Noemi buluka ku dziko ya Moabhe,+ pabodzi na Rute, nkwenyace wa ku Moabhe. Iwo afika ku Bhetelehemu mu ndzidzi wakutoma kubvuna sevadha.+