Samweli Wakutoma
26 Mukupita kwa ndzidzi, amuna a ku Zifi+ aenda kuna Sauli ku Jibheya+ mbampanga: “Dhavidhi abisala paphiri ya Akila dhuzi na Yesimoni.”*+ 2 Natenepa Sauli pabodzi na anyankhondo amphambvu 3.000 aenda kuthando ya Zifi+ kasaka Dhavidhi. 3 Sauli amanga misasa paphiri ya Akila dhuzi na Yesimoni nʼkhundu mwa nseu. Dhavidhi akhali nʼthando, pontho iye abva kuti Sauli abwera nʼthando toera kunsaka. 4 Natenepa Dhavidhi atuma anthu toera akaone khala Sauli abweradi. 5 Mukupita kwa ndzidzi Dhavidhi aenda ku mbuto ikhadamanga Sauli misasa, pontho iye aona pakhadagona Sauli na Abhineri+ mwana wa Neri, nkulu wa anyankhondo ace; Sauli akhadagona mu nsasa, pontho anyankhondo akhadagonambo nʼkhundu mwace. 6 Buluka penepo Dhavidhi abvundza Aimeleki, wakuti ndi Mueti,+ na Abhisai+ mwana wa Zeruya+ mʼbale wace Yoabhe: “Mbani anafuna kuenda na ine ku misasa ya Sauli?” Abhisai atawira: “Ine ndinaenda na imwe.” 7 Natenepa Dhavidhi na Abhisai aenda namasiku ku misasa ya Sauli, iwo agumana Sauli mbakagona mu nsasa, pontho dipa yace akhadaipfeka pantsi dhuzi na nsolo wace; Abhineri na anyankhondo anango akhagona nʼkhundu mwace.
8 Penepo Abhisai apanga Dhavidhi: “Lero Mulungu apereka nyamalwa wanu mʼmanja mwanu.+ Ndaphata miyendo, nditawiriseni toera ndinʼkhomere pantsi na dipa kabodzi basi, pontho nee ndinacita pyenepi kawiri.” 9 Mbwenye Dhavidhi apanga Abhisai: “Leka kuncita pyakuipa, thangwi mbani anafuna kucita pinthu pyakuipa kuna nyakudzodzwa wa Yahova,+ mbapitiriza kukhala wakusowa mulando?”+ 10 Dhavidhi athimiza kulonga: “Ndiri kudumbira mu dzina ya Yahova Mulungu wa mʼmaso kuti inadzafika ntsiku+ yakuti iye anadzafa, peno anadzafa kunkhondo,+ peno Yahova ene anadzamupha.+ 11 Thangwi yakulemedza kwanga Yahova, ine cipo ndinathukula nkono wanga toera kucita pyakuipa nyakudzodzwa wa Yahova!+ Natenepa, ndaphata miyendo, kwata dipa iri dhuzi na nsolo wace na mulinga wa madzi toera tiende pyathu.” 12 Dhavidhi akwata dipa na mulinga wa madzi ukhali dhuzi na nsolo wa Sauli mbaenda. Nkhabe munthu adaaona,+ kuabva peno kulamuka ncitulo, iwo onsene akhagona, thangwi Yahova aacitisa kuti agone kakamwe. 13 Buluka penepo, Dhavidhi aenda kukhundu inango kutali pangʼono na iwo mbalimira paphiri.
14 Dhavidhi acemera anyankhondo na Abhineri+ mwana wa Neri, mbalonga: “Abhineri uli kubva pinalonga ine?” Abhineri atawira: “Ndiwe ani iwe unacemera mambo?” 15 Dhavidhi apanga Abhineri: “Kodi nee ndiwe mamuna wamphambvu? Kodi mu Izraeli muli na munthu unango wakuti ndi sawasawa na iwe? Mphapo thangwi yanji nee waonera mbuyako mambo? Thangwi nyankhondo mʼbodzi akhadapita mʼmisasa toera kupha mbuyako mambo.+ 16 Pidacita iwe si pyadidi tayu. Ndiri kudumbira mu dzina ya Yahova Mulungu wa mʼmaso kuti imwe mwathema kuphiwa, thangwi nee mwaonera mbuyanu, nyakudzodzwa wa Yahova.+ Cincino yangʼanani nʼkhundu mwanu! Iri kupi dipa ya mambo na mulinga wa madzi+ ukhali dhuzi na nsolo wace?”
17 Penepo Sauli adzindikira fala ya Dhavidhi mbabvundza: “Mwananga Dhavidhi,+ fala ineyi ndi yako?” Dhavidhi atawira: “Inde mbuyanga mambo, ndi fala yanga.” 18 Iye athimiza kulonga: “Thangwi yanji mbuyanga musatcinga ntumiki wanu?+ Ndacitanji ine, pontho ndadawisanji?+ 19 Ndaphata miyendo mbuyanga mambo, bveserani pinafuna kulonga ntumiki wanu: Khala ndi Yahova anakucitisani kuti munditcinge, iye mbatambire* ntsembe yanga ya pyakudya. Mbwenye khala anakucitisani pyenepi ndi anthu,+ mbapaswe dzedze na Yahova, thangwi lero iwo andithamangisa mbandicitisa kukhala kutali na anthu a Yahova*+ mbalonga: ‘Ndoko ukatumikire alungu anango!’ 20 Cincino lekani kutawirisa kuti ciropa canga cicuciswe pantsi kutali na Yahova, thangwi mambo wa Izraeli akusaka nkhulukupa*+ ninga akuthamangisa nkhwale mʼmapiri.”
21 Sauli atawira: “Ndadawa.+ Bwerera mwananga Dhavidhi, ine nee ndinakucitabve pyakuipa, thangwi lero waona umaso wanga kukhala wakufunika kakamwe.+ Ine ndacita pinthu mwakusowa ndzeru, pontho ndacita madawo makulu kakamwe.” 22 Dhavidhi alonga: “Mambo, dipa yanu iri pano. Pangani mʼbodzi mwa aphale anu abwere kudzaikwata. 23 Yahova ndiye anafuna kubwezera munthu thangwi ya ulungami+ wace na kukhulupirika kwace. Lero Yahova akhadakuperekani mʼmanja mwanga, mbwenye nee ndafuna kuthukula nkono wanga toera kucita pyakuipa nyakudzodzwa wa Yahova.+ 24 Nakuti lero ndaona umaso wanu kukhala wakufunika kakamwe, Yahova mbaonembo umaso wanga kukhala wakufunika kakamwe, pontho mbandipulumuse mu nyatwa zanga zonsene.”+ 25 Sauli atawira Dhavidhi: “Mbupaswe nkhombo mwananga Dhavidhi. Mwandimomwene iwe unadzacita pinthu pikulu, pontho unadzapembera.”+ Buluka penepo Dhavidhi aenda pyace, mbwenye Sauli abwerera kunyumba kwace.+