Samweli Wakutoma
28 Mu ntsiku zenezi, Afilisti agumanya anyankhondo awo toera amenyane na Izraeli.+ Natenepa Akisi apanga Dhavidhi: “Mwandimomwene usadziwa kuti iwe pabodzi na amuna ali na iwe munaenda na ine kunkhondo.”+ 2 Penepo Dhavidhi apanga Akisi: “Imwe musadziwa mwadidi pinafuna kucita ntumiki wanu.” Akisi apanga Dhavidhi: “Na thangwi ineyi, ndinakusankhula toera ndzidzi onsene ukhale nyankhondo wakundionera.”*+
3 Samweli akhadafa kale, pontho Aizraeli onsene akhadamulira mbamuikha ku Rama, mu nzinda ukakhala iye.+ Sauli akhadathamangisa mu dziko ya Izraeli anthu analonga na mizimu na anyakulotera.+
4 Afilisti agumanyikana mbaenda kamanga misasa yawo ku Sunemu.+ Natenepa Sauli agumanya anyankhondo onsene a Izraeli, mbaenda kamanga misasa yawo ku Jilbhowa.+ 5 Sauli pidaona iye misasa ya Afilisti, iye agopa, pontho ntima wace watoma kudhima kakamwe.+ 6 Maseze Sauli akhabvundzisa Yahova,+ Yahova nee akhantawira, nee na ndoto, nee na Urimi*+ nee na aprofeta. 7 Pakumalisa Sauli apanga atumiki ace: “Ndisakireni nkazi wakuti asalonga na mizimu+ toera ndikalonge naye.” Atumiki ace atawira: “Ku Eni-Dhori+ kuna nkazi wakuti asalonga na mizimu.”
8 Natenepa Sauli abvala nguwo zinango toera anthu akhonde kundzindikira, mbaenda kuna nkazi unoyu namasiku pabodzi na amuna awiri. Iye alonga: “Ndaphata miyendo, phatisira maluso ako akulonga na mizimu+ toera undipange pinafuna kundicitikira ntsogolo, pontho ndibweresere munthu anafuna ine kukupanga.” 9 Mbwenye nkazi ampanga: “Iwe usadziwa kuti Sauli athamangisa mu dziko ya Izraeli anthu analonga na mizimu na anyakulotera.+ Mphapo thangwi yanji usafuna kunditeyera nsampha toera ndiphiwe?”+ 10 Penepo Sauli adumbira kuna iye mu dzina ya Yahova, mbalonga: “Ndiri kudumbira mu dzina ya Yahova kuti iwe nee unadzakhala na mulando thangwi ya pinthu pyenepi!” 11 Natenepa nkazi ambvundza: “Usafuna ndikubweresere ani?” Iye atawira: “Ndibweresere Samweli.” 12 Nkazi pidaona iye “Samweli,”*+ akhuwa kakamwe mbapanga Sauli: “Thangwi yanji mwandinyengeza? Imwe ndimwe Sauli!” 13 Mambo ampanga: “Leka gopa, mphapo ninji pinaona iwe?” Nkazi atawira Sauli: “Ndiri kuona munthu ninga mulungu mbakabuluka pantsi pa mataka.” 14 Sauli ambvundza: “Munthu unoyu akhala tani?” Penepo nkazi atawira: “Iye ndi mamuna wakugwesera, pontho abvala tunika yakusowa mikono.”+ Natenepa Sauli adzindikira kuti akhali “Samweli,” iye agodama mbakotamisa nkhope yace mpaka pantsi, buluka penepo agona pantsi.
15 Penepo “Samweli” abvundza Sauli: “Thangwi yanji wandidzudzumisa mbundibweresa kunja?” Sauli atawira: “Ine ndiri pa nyatwa kakamwe. Afilisti ali kumenyana na ine, pontho Mulungu andisiya, iye nee asanditawirabve, nee na aprofeta nee na ndoto;+ na thangwi ineyi, ine ndakucemerani toera mundipange pinafunika ine kucita.”+
16 Natenepa “Samweli” abvundza: “Thangwi yanji ukundibvundza cincino pidakusiya Yahova,+ pontho ndiwe nyamalwa wace? 17 Yahova anadzacita pidalonga iye kubulukira mwa ine: Yahova anadzakupokosera umambo mbaupereka kuna ndzako Dhavidhi.+ 18 Iwe nee wabvera fala ya Yahova mbukhonda kupha Aamaleki,+ ndi thangwi yace, Yahova lero akucita pyenepi kuna iwe. 19 Kusiyapo pyenepi, Yahova anadzapereka iwe na Izraeli mʼmanja mwa Afilisti,+ pontho mangwana iwe+ na anako+ munadzakhala pabodzi na ine.* Yahova anadzaperekambo anyankhondo a Izraeli mʼmanja mwa Afilisti.”+
20 Sauli pidabva iye mafala adalonga “Samweli,” agopa kakamwe, penepo pene iye agwa pantsi. Iye nee akhali na mphambvu, thangwi nee akhadadya cinthu ntsiku yonsene masiku na masikati. 21 Nkazi pidafika iye dhuzi na Sauli mbaona kuti iye akhadzudzumika kakamwe, ampanga: “Ine ntumiki wanu ndabvera pidalonga imwe, pontho ndaikha umaso wanga pangozwi,+ mbandicita pidandipanga imwe. 22 Natenepa ndaphata miyendo, cincino bveserani pinafuna kulonga ntumiki wanu. Munganditawirisa ndinakupasani phindi ya nkate kuti mudye toera mukhale na mphambvu pangʼono yakucita ulendo wanu.” 23 Mbwenye iye akhonda, mbalonga: “Ine nkhabe funa kudya.” Atumiki ace pabodzi na nkazi unoyu apitiriza kunkakamiza. Pakumalisa iye aabvera, alamuka pantsi mbakhala patalimba. 24 Nkazi unoyu akhali na mwanangʼombe wakununa nʼnyumba mwace, natenepa iye amupha* mwakucimbiza, buluka penepo akwata ufa, aumunya mbaphika mikate yakusowa pyakutupisa. 25 Iye apereka cakudya ceneci kuna Sauli na atumiki ace, iwo mbadya. Pidamala iwo kudya, alamuka namasiku anewa mbaenda.+