Samweli Wakutoma
30 Dhavidhi na amuna akhali na iye pidafika iwo ku Zikilage,+ pa ntsiku yacitatu Aamaleki+ akhadatapata kunterero* na Zikilage, pontho iwo akunda nzinda wa Zikilage mbaupisa na moto. 2 Iwo akhadakwata akazi+ na anthu onsene akhali mu nzinda unoyu, akulu na ana ene. Iwo nee apha munthu, mbwenye aakwata mbaenda nawo. 3 Dhavidhi na amuna akhali na iye pidafika iwo mu nzinda, agumana kuti wapiswa, pontho akazawo na anawo amuna na akazi akhadakwatwa. 4 Natenepa Dhavidhi na amuna akhali na iye atoma kulira kakamwe mpaka kusowa mphambvu yakulira pontho. 5 Akazi awiri a Dhavidhi akhadakwatwambo, Ainowamu wa ku Yezrieli na Abhigaili wa ku Karmelo+ wakuti akhali nkazi wa Nabhale. 6 Dhavidhi akhadatsukwala kakamwe thangwi amuna akhali na iye akhafuna kumponyera miyala. Amuna onsene akhadaipirwa kakamwe thangwi akhadakwatirwa anawo amuna na akazi. Mbwenye Dhavidhi agumana cibalangazo kuna Yahova Mulungu wace.+
7 Buluka penepo Dhavidhi apanga nyantsembe Abhiyatari,+ mwana wa Aimeleki: “Ndaphata miyendo, bweresa efodhi kuno.”+ Natenepa Abhiyatari aendesa efodhi kuna Dhavidhi. 8 Dhavidhi abvundza Yahova:+ “Ndisafunika kuthamangira nsoka unoyu wa anyakutapata? Kodi ine ndinaaphata?” Iye atawira: “Athamangire, thangwi iwe unaaphata mbuakwatira pinthu pyonsene pidakwata iwo.”+
9 Penepo pene Dhavidhi na amuna 600+ akhali na iye aenda, pidafika iwo pa Gowa* ya Bhesori, amuna anango asala penepo. 10 Dhavidhi apitiriza kuatowerera na amuna 400, mbwenye amuna 200 asala nduli thangwi akhadaneta kakamwe, pontho nee mbadakwanisa kuwambuka Gowa* ya Bhesori.+
11 Iwo agumana mamuna mʼbodzi wa ku Ejitu, ankwata mbaenda naye kuna Dhavidhi. Iwo ampasa cakudya na madzi akumwa, 12 ampasambo phindi ya masambvu akuuma mbaumbwa pabodzi na mapindi mawiri a mauva akuuma mbaumbwa pabodzi. Pidamala iye kudya akhala pontho na mphambvu, thangwi iye nee akhadadya cinthu nee kumwa madzi mu ntsiku zitatu, masiku na masikati. 13 Dhavidhi ambvundza: “Ndiwe ntumiki wa ani, pontho wabuluka kupi?” Natenepa iye atawira: “Ndine Muejitu, nyabasa wa mamuna mʼbodzi wa Aamaleki, mbwenye mbuyanga andisiya thangwi ndikhabva kupha mu ntsiku zitatu nduli. 14 Ife tatapata kunterero* kwa Akereti,+ tatapata dziko ya Yuda kunterero* kwa Kalebe,+ pontho tapisa na moto nzinda wa Zikilage.” 15 Natenepa Dhavidhi ambvundza: “Unandiperekera kuna nsoka unoyu wa anyakutapata?” Iye atawira: “Imwe mungadumbira kuna ine mu dzina ya Mulungu kuti nee munandipha, pontho nee munandipereka mʼmanja mwa mbuyanga, ine ndinakuperekerani mpaka kuna nsoka unoyu wa anyakutapata.”
16 Natenepa iye akwata Dhavidhi mbaenda naye kuna iwo. Aamaleki akhadamwazika mu dziko ineyi yonsene, iwo akhadya, akhamwa, pontho akhacita phwando thangwi ya kunjipa kwa pinthu pidatapata iwo ku dziko ya Afilisti na ku dziko ya Yuda. 17 Penepo Dhavidhi aapha kutomera mʼbambakuca mpaka kudoka kwa dzuwa; nkhabepo munthu adapulumuka+ kusiyapo amuna 400 adakwira makamelo mbathawa. 18 Dhavidhi akwatira Aamaleki pinthu pyonsene pikhadakwata iwo,+ pontho iye aombola akazace awiri. 19 Iwo agumana anthu onsene, akulu na ana ene. Iwo akwata anawo amuna na akazi, kuphatanizambo pinthu pikhadatapata iwo;+ Dhavidhi aakwatira pinthu pyonsene pikhadakwata iwo. 20 Dhavidhi akwatambo mabira onsene na ngʼombe zonsene, pontho amuna akhali na iye akwata mabira anewa na ngʼombe zenezi mbaziikha patsogolo pa pifuyo pyawo. Iwo alonga: “Ipi ndi pidatapata Dhavidhi.”
21 Buluka penepo, Dhavidhi afika kuna amuna 200 akuti akhadacimwana kuenda pabodzi na iye thangwi akhadaneta kakamwe mbasala pa Gowa* ya Bhesori.+ Iwo abuluka toera kuenda kaonana na Dhavidhi pabodzi na anthu akhali na iye. Dhavidhi pidafika iye dhuzi na amuna anewa, aabvundza kuti ali tani. 22 Mbwenye amuna onsene akuipa na akusowa basa mwa ale adaenda pabodzi na Dhavidhi alonga: “Nakuti iwo nee aenda pabodzi na ife, ife nkhabe kuapasa cinthu mwa pinthu pikhadakwatirwa ife, basi ene anakwata akazawo na anawo mbaenda pyawo.” 23 Mbwenye Dhavidhi aapanga: “Abale anga, lekani kucita pyenepi na pinthu pidatipasa Yahova. Iye atitsidzikiza mbapereka mʼmanja mwathu nsoka wa anyakutapata udabwera kudzamenyana na ife.+ 24 Mbani anafuna kuphedzera pinalonga imwe? Pinthu pinafuna kupaswa munthu adaenda kunkhondo pinakhala sawasawa na pinafuna kupaswa ule adasala mbaonera mitolo.+ Onsene anadzapaswa sawasawa.”+ 25 Kutomera ntsiku ineyi mpaka lero, iye akhazikisa pyenepi ninga ntemo, pontho ninga mwambo mu Izraeli.
26 Dhavidhi pidabwerera iye ku Zikilage, atumiza pinthu pinango pyakutapatwa kuna akulu a Yuda akuti akhali axamwali ace, mbalonga: “Tambirani muoni wa* pinthu pidakwatira ife anyamalwa a Yahova.” 27 Iye atumiza pinthu pyenepi kuna ale akhali ku Bheteli,+ ku Ramoti wa ku Najebhu,* ku Yatiri,+ 28 ku Aroeri, ku Sifimoti, ku Esitemowa,+ 29 ku Rakali, ku mizinda ya Ayerameli,+ ku mizinda ya Akeneu,+ 30 ku Orma,+ ku Bhorasani, ku Ataki, 31 ku Ebhroni+ na mʼmbuto zonsene zidapita Dhavidhi na amuna akhali na iye.