Samweli Wakutoma

31 Afilisti akhamenyana na Izraeli.+ Amuna a Izraeli athawa Afilisti, pontho anthu azinji aphiwa Paphiri ya Jilbhowa.+ 2 Afilisti akhatowera Sauli na anace, mpaka kufika dhuzi na iwo, natenepa Afilisti apha Yonatani,+ Abhinadhabhi na Malki-Suwa ana a Sauli.+ 3 Nkhondo ikhadakula kakamwe kuna Sauli; anyamauta anʼgumana, mbamʼphekesa kakamwe.+ 4 Buluka penepo Sauli apanga ntumiki wace akhanʼthukulira pida pya nkhondo: “Bulusa supada yako toera undiphe nayo, toera amuna ale akukhonda kusidzwa+ akhonde kundionesa nyatwa* mbandipha.” Mbwenye ntumiki wace akhanʼthukulira pida pya nkhondo akhonda, thangwi iye akhagopa kakamwe. Natenepa Sauli akwata supada mbaigwera.+ 5 Ntumiki wace akhanʼthukulira pida pya nkhondo pidaona iye kuti Sauli afa,+ iye agwerambo supada yace mbafa. 6 Natenepa Sauli, anace atatu, nyakunʼthukulira pida pya nkhondo na atumiki ace onsene, afa pa ntsiku ineyi.+ 7 Aizraeli akakhala ku gowa na kucisa ca ku Yordani pidaona iwo kuti anyankhondo a Izraeli athawa, pontho kuti Sauli na anace aphiwa, iwo atoma kubuluka mʼmizinda yawo mbathawa.+ Buluka penepo Afilisti abwera, mbakhala mʼmizinda ineyi.

8 Mangwana mwace, Afilisti pidafika iwo toera kudula nguwo anthu adaphiwa na kukwata pida pyawo, iwo agumana Sauli na anace atatu afa Paphiri ya Jilbhowa.+ 9 Natenepa iwo agwanda nsolo wa Sauli, anʼdulisa pida pyace pya nkhondo, pontho atuma anthu toera aende mu dziko yonsene ya Afilisti kalonga mphangwa zenezi+ mʼmanyumba* a madzimunthu awo+ na kuna mbumba zawo. 10 Buluka penepo iwo akwata pida pyace pya nkhondo, apiikha nʼnyumba ya madzimunthu a Astoreti, mbamanika manungo ace pa mpanda wa Bheti-Sani.+ 11 Anthu a ku Yabhesi-Jiliyadhi+ pidabva iwo pinthu pidacita Afilisti kuna Sauli, 12 anyankhondo onsene aphuphudza mbakafamba toera kuenda kabulusa manungo a Sauli na a anace pa mpanda wa Bheti-Sani. Buluka penepo iwo abwerera ku Yabhesi mbaapisa kweneko. 13 Pidamala iwo akwata magogodo awo+ mbaaikha munthumbi pantsi pamuti wa tamarigera ku Yabhesi,+ pontho iwo acita jejuu mu ntsiku zinomwe.