Samweli Wakutoma
8 Samweli pidakalamba iye, akhazikisa anace amuna toera atonge Izraeli. 2 Dzina ya mwanace wakutoma ikhali Yoeli, ya mwanace waciwiri ikhali Abhiya;+ iwo akhatonga ku Bhersebha. 3 Mbwenye anace nee akhatowezera makhaliro ace; iwo akhasaka pikhafuna iwo basi,+ akhatawira kudyekerwa,+ pontho akhatonga mwakusowa ulungami.+
4 Mukupita kwa ndzidzi, akulu onsene a Izraeli agumanyikana, mbaenda kuna Samweli ku Rama. 5 Iwo ampanga: “Imwe mwakalamba, pontho ananu nee akutowezera makhaliro anu. Khazikisani mambo toera atitonge ninga pinacitika kuna madzindza anango onsene.”+ 6 Mbwenye Samweli aipirwa pidalonga iwo kuti: “Tipaseni mambo toera atitonge.” Penepo Samweli aphembera kuna Yahova. 7 Natenepa, Yahova apanga Samweli: “Cita pyonsene pinakupanga anthu; thangwi iwo nee akukhonda iwe, mbwenye akukhonda ine ninga mambo wawo.+ 8 Iwo akucita pibodzi pyene kutomera pidaabulusa ine ku Ejitu mpaka lero; iwo asandisiya+ mbatumikira alungu anango,+ pontho ndi pyenepi pinacita iwo kuna iwe. 9 Natenepa, cita pinalonga iwo. Mbwenye usafunika kuacenjeza, pontho apange pinthu pinafuna kudzaphemba mambo anafuna kuatonga.”
10 Samweli apanga anthu akhaphemba mambo, pinthu pyonsene pidalonga Yahova. 11 Iye alonga: “Pinafuna kudzacita mambo anafuna kukutongani ndi ipi:+ Iye anadzakwata ananu amuna+ toera afambe na ngolo zace+ na kukhala anyamakavalo ace,+ pontho anango anadzathamanga kutsogolo kwa ngolo zace. 12 Iye anadzakhazikisa anango toera akhale atsogoleri a anthu 1.000+ na atsogoleri a anthu 50.+ Anango anadzalima minda yace,+ kubvuna pinthu pyace,+ pontho anadzacita pida pyace pya nkhondo na pida pya ngolo zace.+ 13 Iye anadzakwata ananu akazi toera akhale anyakucita mafuta akununkhira, anyakuphika na anyakucita mikate.+ 14 Iye anadzakwata minda yanu yadidi kakamwe, minda yanu ya mauva na ya milivera,+ mbaipasa anyabasa ace. 15 Iye anadzakwata khundu yacikhumi ya pinafuna kubvuna imwe mʼminda yanu ya tirigu na ya mauva, mbapipereka kuna akulu a panyumba ya mambo na kuna anyabasa ace. 16 Pontho iye anadzakwata anyabasa anu amuna na akazi, mbaaphatisa basa, anadzakwatambo ngʼombe zanu zadidi na maburu anu, mbapiphatisira mʼbasa yace.+ 17 Iye anadzakwata khundu yacikhumi ya pifuyo pyanu,+ pontho imwe munadzakhala anyabasa ace. 18 Inadzafika ntsiku yakuti munadzalira thangwi ya mambo adasankhula imwe,+ mbwenye Yahova nee anadzakutawirani.”
19 Mbwenye anthu nee abvera Samweli, iwo alonga: “Nkhabe, ife tisafunambo tikhale na mambo wathu. 20 Natenepa, ife tinadzakhala ninga madzindza anango onsene, pontho mambo wathu anadzatitonga, anadzatitsogolera na kutimenyera nkhondo.” 21 Samweli pidamala iye kubva mafala onsene adalonga anthu, alongambo mafala mabodzi ene kuna Yahova. 22 Yahova apanga Samweli: “Cita pinalonga iwo, pontho khazikisa mambo toera aatonge.”+ Buluka penepo, Samweli apanga amuna a Izraeli: “Mʼbodzi na mʼbodzi wa imwe asafunika kubwerera ku nzinda wace.”