Samweli Wakutoma
11 Buluka penepo, Naasi mambo wa Aamoni+ akwata anyankhondo ace mbaenda kamanga misasa toera kumenyana na anthu a mu nzinda wa Yabhesi+ ku Jiliyadhi. Amuna onsene a ku Yabhesi apanga Naasi: “Citani cibverano na ife toera tikutumikireni.” 2 Naasi aapanga: “Ine ndinacita cibverano na imwe, basi ene mungacita ipi: Mʼbodzi na mʼbodzi wa imwe asafunika kupholwa diso yace yamadyo. Ndinacita pyenepi toera kupwaza Aizraeli onsene.” 3 Akulu a ku Yabhesi alonga: “Tipaseni ntsiku zinomwe toera titume anthu akalonge mphangwa zenezi mu dziko yonsene ya Izraeli. Angasoweka munthu toera kutipulumusa, tinadzaperekeka kuna imwe.” 4 Mukupita kwa ndzidzi, anthu adatumwa afika ku Jibheya+ mu nzinda wa Sauli,* mbalonga mphangwa zenezi kuna anthu, natenepa anthu onsene atoma kulira mwakugaluza.
5 Mbwenye Sauli akhabwera buluka kadyesa pifuyo, pontho iye akhali nduli mwa pifuyo pyenepi, penepo iye abvundza: “Ninji pidacitika? Thangwi yanji anthu akulira?” Natenepa iwo ampanga mphangwa zidalonga amuna a ku Yabhesi. 6 Sauli pidabva iye mphangwa zenezi, nzimu wa Mulungu wampasa mphambvu,+ mbaipirwa kakamwe. 7 Natenepa iye akwata ngʼombe ziwiri zimuna, azigwanda-gwanda mbapereka mapindi anewa kuna amuna adabweresa mphangwa toera aende nawo mu dziko yonsene ya Izraeli, iwo akhalonga: “Munthu anakhonda kutowera Sauli na Samweli, ngʼombe zace zinadzacitwambo pibodzi pyene!” Penepo anthu onsene agopa Yahova, mbaenda kunkhondo na cifuniro cibodzi cene.* 8 Buluka penepo, Sauli aalengesa ku Bhezeki; akhalipo Aizraeli 300.000 na amuna 30.000 a ku Yuda. 9 Natenepa iwo apanga amuna adabweresa mphangwa kuti: “Anthu a ku Yabhesi na a ku Jiliyadhi musafunika kuapanga tenepa: ‘Imwe munapulumuswa mangwana dzuwa ingapisa.’” Buluka penepo, amuna anewa aenda kalonga mphangwa zenezi kuna anthu a ku Yabhesi, iwo mbakomerwa kakamwe. 10 Natenepa anthu a ku Yabhesi apanga Aamoni: “Mangwana ife tinaperekeka kuna imwe, mbamucita kuna ife pyonsene pinafuna imwe.”+
11 Mangwana mwace, Sauli agawa anyankhondo mʼmisoka mitatu. Mʼbambakuca, iwo aenda mpaka pakati pa misasa, mbapha Aamoni+ mpaka dzuwa kupisa. Ale adapulumuka abalalika, natenepa nkhabepo adasala awiri pabodzi pene. 12 Buluka penepo, anthu apanga Samweli: “Mbani adalonga kuti: ‘Nkhabe funa kuti Sauli akhale mambo wathu?’+ Tipaseni anthu anewa toera tiaphe.” 13 Mbwenye Sauli alonga: “Nkhabepo munthu anafuna kuphiwa lero,+ thangwi Yahova apulumusa Izraeli.”
14 Buluka penepo, Samweli apanga mbumba: “Tendeni ku Jiligale+ toera tikapangize pontho kuti Sauli ndi mambo.”+ 15 Natenepa, mbumba yonsene yaenda ku Jiligale, kweneko iwo akhazikisa Sauli ninga mambo pamaso pa Yahova. Buluka penepo, iwo apereka ntsembe toera kupereka takhuta pamaso pa Yahova,+ pontho Sauli pabodzi na amuna onsene a Izraeli atsandzaya kakamwe.+