Kronika Wakutoma
10 Afilisti akhamenyana na Izraeli. Amuna a Izraeli athawa Afilisti, pontho anthu azinji aphiwa Paphiri ya Jilbhowa.+ 2 Afilisti akhatowerera Sauli na anace, mpaka kufika dhuzi na iwo, natenepa Afilisti apha Yonatani, Abhinadhabhi na Malki-Suwa+ ana a Sauli. 3 Nkhondo ikhadakula kakamwe kuna Sauli; anyamauta an’gumana, mbam’phekesa.+ 4 Penepo Sauli apanga ntumiki wace akhan’thukulira pida pya nkhondo: “Bulusa supada yako toera undiphe nayo, toera amuna ale akukhonda kusidzwa akhonde kundionesa nyatwa.”*+ Mbwenye ntumiki wace akhan’thukulira pida pya nkhondo akhonda, thangwi iye akhagopa kakamwe. Natenepa Sauli akwata supada mbaigwera.+ 5 Ntumiki wace akhan’thukulira pida pya nkhondo pidaona iye kuti Sauli afa, iye agwerambo supada yace mbafa. 6 Natenepa, Sauli na anace atatu afa, pontho onsene a panyumba pace afa pa ntsiku ibodzi ene.+ 7 Aizraeli onsene akakhala ku gowa pidaona iwo kuti nsoka onsene wa anyankhondo wathawa, pontho pidaona iwo kuti Sauli na anace afa, abuluka m’mizinda yawo mbathawa. Buluka penepo, Afilisti abwera, mbakhala m’mizinda ineyi.
8 Mangwana mwace, Afilisti pidafika iwo toera kudula nguwo anthu adaphiwa na kukwata pinthu pyawo, iwo agumana kuti Sauli na anace afa Paphiri ya Jilbhowa.+ 9 Natenepa iwo an’dulisa nguwo, agwanda nsolo wace mbakwata pida pyace pya nkhondo; pontho iwo atuma anthu toera aende mu dziko yonsene ya Afilisti kalonga mphangwa zenezi kuna madzimunthu awo+ na mbumba zawo. 10 Buluka penepo, pida pyace pya nkhondo apiikha n’nyumba* ya mulungu wawo mbamanika nsolo wace n’nyumba ya Dhagoni.+
11 Anthu onsene a ku Yabhesi+ mu dziko ya Jiliyadhi pidabva iwo pinthu pyonsene pidacita Afilisti kuna Sauli,+ 12 anyankhondo onsene akwata manungo a Sauli na manungo a anace mbaenda nawo ku Yabhesi. Iwo aikha munthumbi magogodo awo pantsi pamuti ukulu ku Yabhesi,+ mbacita jejuu mu ntsiku zinomwe.
13 Natenepa, Sauli afa thangwi nee akhala wakukhulupirika kuna Yahova pidakhonda iye kubvera fala ya Yahova;+ pontho thangwi yakusaka ciphedzo kuna ng’anga,*+ 14 mbakhonda kusaka ciphedzo kuna Yahova. Na thangwi ineyi Iye ansiya toera aphiwe, mbapereka umambo wace kuna Dhavidhi mwana wa Yese.+