Kronika Wakutoma
13 Dhavidhi abvundzisa atsogoleri a anyankhondo 1.000, atsogoleri a anyankhondo 100 kuphatanizambo atsogoleri anango onsene.+ 2 Buluka penepo, Dhavidhi apanga mbumba yonsene ya Izraeli: “Mungaona kuti mphyadidi kuna imwe, pontho ndi pyakutawirika kuna Yahova Mulungu wathu, titumizeni mphangwa kuna abale athu anango ali mu mbuto zonsene za dziko ya Izraeli, kuna anyantsembe na Alevi ali m’mizinda yawo+ toera abwere kudzagumanyikana na ife. 3 Pontho tibwerese Bokosi+ ya Mulungu wathu.” Iye alonga pyenepi thangwi Aizraeli nee atsalakana Bokosi ya Mulungu mu ntsiku za Sauli.+ 4 Anthu onsene atawira kucita pyenepi, thangwi mbumba yonsene yaona kuti mphyadidi. 5 Natenepa Dhavidhi agumanya Aizraeli onsene kutomera ku nkulo wa Ejitu mpaka ku Lebho-Amati,+ toera abwerese Bokosi ya Mulungu wandimomwene buluka ku Kiriyati-Jearimu.+
6 Dhavidhi na Aizraeli onsene aenda ku Bhaala+ kwakuti ndi ku Kiriyati-Jearimu mu dziko ya Yuda, toera akwate Bokosi ya Mulungu wandimomwene wakuti ali pa mpando wace waumambo padzulu pa akerubhi,+ Bokosi yakuti anthu asacemera dzina ya Yahova penepo. 7 Mbwenye iwo akwiza Bokosi ya Mulungu wandimomwene mu ngolo ipswa+ pidabuluka iwo nayo panyumba ya Abhinadhabhi. Uza na Aiyo ndiwo akhafambisa ngolo ineyi.+ 8 Dhavidhi na Aizraeli onsene akhatsandzaya pamaso pa Mulungu wandimomwene munjira yakuti bwerani mudzaone na mphambvu zawo zonsene, mbaimba nyimbo na maarpa, pyakuimba napyo pinango pya nkhambala na pya utale,+ pandero+ na matuluka.+ 9 Mbwenye pidafika iwo pa mbuwa ya Kidhoni, Uza afuthula nkono wace mbaphata Bokosi, thangwi ng’ombe zikhali dhuzi toera kuigwisa. 10 Penepo Yahova aipirwa na Uza, mbamupha thangwi iye afuthula nkono wace mbaphatirira Bokosi,+ natenepa iye afa penepo pamaso pa Mulungu.+ 11 Mbwenye Dhavidhi aipirwa thangwi ya ukali udapangiza Yahova kuna Uza; pontho mbuto ineyi isacemerwa Peresi-Uza* mpaka lero.
12 Pa ntsiku ineyi Dhavidhi agopa kakamwe Mulungu wandimomwene mbalonga: “Ndinakwanisa tani kuendesa Bokosi ya Mulungu wandimomwene mu nzinda wanga?”+ 13 Dhavidhi nee akwata Bokosi mbaenda nayo kukakhala iye mu Nzinda wa Dhavidhi, mbwenye apanga anthu toera aende nayo kunyumba ya Obhedhi-Edhomi wa ku Gati.* 14 Bokosi ya Mulungu wandimomwene yakhala panyumba ya Obhedhi-Edhomi, mbipitiriza kukhala panyumba pace miyezi mitatu, Yahova apitiriza kupasa nkhombo anthu a panyumba ya Obhedhi-Edhomi na pinthu pyonsene pikhali na iye.+